Read Wancho Naga Jeremia 28 Bible Online

Jeremia 28 - Wancho Naga bible

Jeremia 28

¹Ija zanglaolao ma wüi, Hezekiah wanghom ang achangkya zanglao ali lükya lyetjang aga to, Azzur sasün Hananiah, Gibeon angkya ajepa tuita, Zangshwom-Hom ma ku füi akax. Nguapabu hia khünaknu tunthoma chixe ku füi,

²JOWANPA, Israel nok Khüthak Zang-e ku füi akaxkya kax ile akax: “Kue Babilon nok wanghompa tsak-zong amadaoa.

³Wanghompa Nebukadnezar-e laxlaxle paokya tuinabu pangwüi kue zanglao anyi mong ma wüi ikhato chatle apüi angkya changle.

⁴Kue, Jehoiakin sasün Jehoiakin, Judah nok wanghompa chuwüi, Babilon nok to zanda ang kople paothomkya chix khünaknu pangwüi koplaxle ikhato chat ang tomüi. Changle, kue Babilon nok wanghompa tsak-zong pünle ama angkya changpu. Ku, JOWANPAe ija kax akaxdaoa.”

⁵Ipongma ikhama ajongle tüikya nguapabu hia khünaknu tunthoma kue Hananiah ang thüi:

⁶“Ohünotün! JOWANPAe ija moküi changtüi angpu le kue ongpu! Nange ajekya kax otsingtomtata ang changle hüiüi ilaxle Babilon nok to paole thomkya Zangshwom-Hom tuinabu hia zanda ang thomkya khünaknu pangwüi chatle apüi ang tomüile kue ongtomtapu.

⁷Ikoxlechu kue nang füi tamchu khünaknu füi chem akaxpuix ija to apahüi.

⁸Ku hanpak hia nang hanpak hüiüi thoto wüi ajebue jat-libu hia tsak-zongle tüikya wangtingbu hato hüi angkya ochax-ozan, woknuak-tilan hia okak-olakbu bama ajele thom.

⁹Ikoxle aje owae tumüi bama ajepuix, chix a JOWANPAe ahüikya aje tuita changpule chixe ajekyabu kax changle ngaikya zuma tix awanle laxüi.”

¹⁰Ifüima Hananiah-e ku dingkux angkya danglang wütle lax ilaxle ija apakle akhix,

¹¹ilaxle khünaknu tunthoma akax: “Wanghompa Nebukadnezar-e pangnu jat-li dingkux ma alikle thomkya danglangbu a chixe ija danglang lailaile apak-akhixüi; ilaxle ija a chixe zanglao anyi mong ma wüi moküi.” Ifüima ku achexle pao.

¹²Ile changkya füima janbama wüi JOWANPAe ku ang

¹³Hananiah hato nguilaxle ija akax angkya kaxkox: “Nange pün danglang apak-akhix ang thokoxlax, ikoxle chixe ija jan füi lüile zingüile JOWANPAe thüile.

¹⁴Chixe ibu jat-li pangnusa ang wüi jan danglang alikle koxüi ilaxle Babilon nok wanghompa Nebukadnezar thothale chang ang tomüi; chixe faomüibu ang ngaxchu wanghompa Nebukadnezar thothale chang ang tomüile JOWANPAe akaxle.”

¹⁵Ifüima kue ija Hananiah hama wün ilaxle chizakle akax: “Apakoplax, Hananiah! Nang a JOWANPAe tsanle ahüikya chichang, ikoxle hünzome khünaknu ang othai to ong angkya atsing ngotüi.

¹⁶Ikhoma chixe nang jan ang tom angkya JOWANPA chix jaoe akaxle changdaoa. Ajakya zanglao makaiba wüi nang a zile paoüi chemthüikoxle nange khünaknu ang JOWANPA zan to kale chang angkya akaxdaoa.”

¹⁷Ilaxle Hananiah a ija zanglao ma lyetjang anüt lükya to zile pao.