Read Wancho Naga Jeremia 3 Bible Online

Jeremia 3 - Wancho Naga bible

Jeremia 3

¹JOWANPAe thüi: “Khünak tuitae chix kakonu füi fan-janle jangchang, tamchu she paolaxle mama mix kakonu ang jangachang, chixe she tam achatle lax ang müntho. Ijae haxtok jaojao komkaile chitsaokya ang achangüi. Ikoxle, Israel, hünzom ang mongkünbu huanuma tüile hüidaoa, ilaxle athax nang a ku hato chat-sele tsupu!

²Haxnukhobu to hulax. Tsangtsa hangkya mixcha tuita ningle nange mwotma mamokkya kha tüicha? Arab noke zan tanpupule lomnu kax ma nange nang mongkünbu tanle nuipu. Nang ma tsangtsa hangle changkya makhange haxtok jao akhule amadaoa.

³Ikhokhoma zang chiwatle zak, ilaxle tümikbu ma ti fuakle chilai. Nang a tsangtsa hangkya mixcha lailaile jao ngünpu; nang ma thünzak ojao chitüi.

⁴“Ikoxle athax nange ku ang thüipu, ‘Nang a ku apa changle, ilaxle nange ku to naosa tanto khange wüi mongkünle hüipu.

⁵Nang a othuithuima mongtsikle münngoüi; ku füi nang jento mongmale münngo.’ Israel, ija kax nange akaxpu, ikoxle nange tsuakkya kople ochax mwot mokpu.”

⁶Josiah wanghom ang ngotanto JOWANPAe ku füi akax: “Eja mongong chitüikya mixcha, Israel-e chem mokdaopuix, ija nange ngünchami? She-e ku hato tok ahodaoa, ilaxle haxnukho hex athüithüi to ilaxle pünnu tong hex athüithüi to she-e tsangtsa hangkya mwot mokdaoa.

⁷Kue thütpu, she-e ibu pangnu mokle tsuak füima, she a ku hato chat angkya changle. Ikoxle she a tamchichat, ilaxle mongong chitüikya she nanao Judah-e ibu ngünle lax.

⁸She a ku hato tok aho laxle tuita tsangtsa hangkya mixcha ang achangle paokya khoma kue Israel chilaxle jwonle apaokya Judah-echu ngünle lax. Ikoxle Judah, tuita mongong chitüikya Israel nanaonu ija ngünlaxle ojao chiza. She chuwüi tsangtsa hangkya mixcha ang achangle pao

⁹ilaxle she zakmaxle thünba. She-e haxtok akhu ang tom, ilaxle long hia pünbu to shwomkya makhange she-e chinunchakkaile achax.

¹⁰Ibu pangnu ile chang füima, Judah, mongong chitüikya Israel nanaonu, ku hato chat-tong-ole dyenla; she ma mongpak-fünthokya ojao chitüi. JOWANPA, kue ija akaxdaoa.”

¹¹Ifüima, ku hato tok ahole paole samkoxchu mongong chitüikya she zongto nanaonu Judah füi she wüi sümüipu, le Israel-e ahokya kax JOWANPAe ku füi akax.

¹²“Mongong chitüikya Israel, ku hato chat-hüi. Ku a chingcha mix changle ilaxle mongtsikkya müntüiüi; ku nang füi othuithuima mongtsikkya müntüiüi.

¹³Nang thaidaoa, JOWANPA nang Zang zongto nang zanpa ang changle hüidao ale ngaikox. Nange ku kaxtombu kax ma chilax ikoxle pünnu tong hex athüithüi ma nang mongkün a mixnok baozangbu ang koxle tüidaoa. Ija kax JOWANPAe akaxdaoa, le Israel füi akax angkya kax chixe ku füi akax.

¹⁴“Mongong chitüikya khünakbu, chatlax; hünzom a ku kux changle. Kue hünzom kha angkya tingnu foto khünak tuipong, saxthom foto khünak tuipongle laxüi ilaxle hünzom a kue Zaion Haxnu to chatle apüiüi.

¹⁵Kue hünzom ang ku kax ma laxkya lompabu koxüi, ilaxle hwome hünzom thakma je-hwon hia awan-atsingkya füi apünüi.

¹⁶Chemtue ija haxtok ma hünzom huanuma tsale changüihex, khünaknue ku Tsaotsüt Suak bama zangwünkya müntüiüi. Hwome ija bama ajangkya müntüiüi ilaxle ija texle münataküi; hwome ija laxngo angkya jao münchangüi, chichangthüiba hwome mama zingle chu münchangüi.

¹⁷Chemtue ija hanpak nguile hüipuix, Jerusalem ang ‘JOWANPA Tüntong’ le nyaküi, ilaxle pangnu jat-li ikhato ku to shwom ang asoxüi. Athaxpi hwome hwom mongkhüikya hia ochax kün-monge hwom füi chemle akaxpuix ija kax ma münlaxüi.

¹⁸Israel nok a Judah füi athütüi, ilaxle hwom tomtomle shuakuxchi nok to zanda ang ngole hüikya haxtok tokya, kue hwom pupa hwom ang onyem ang hwom haxtok ang lax ang koxkya haxtok to chatüi.”

¹⁹JOWANPAe thüi: “Israel, kue nang kusa ang pongle kopse tsupu ilaxle nang a mongtex ma nguikya haxtok koxse tsupu, chaxwan tok ma osün sümüikya haxtok a. Hünzome ku ang apale namnyakbae texpu ilaxle ku hato tamchatle tok chiahole changbae le thütpu.

²⁰Ikoxlechu mongong chithomkya kakonu tuita lailaile, hünzome ku to mongong chithomtsuak. Ku, JOWANPAe ija akaxdaoa.”

²¹Haxnukho to ozing tuita atat: ija a Israel khünaknu sopkya hia chingcha jukya zing changle chemthüikoxle hwom a ochax ma ngole hüilaxle JOWANPA hwom Zang alakle changdao kox a.

²²JOWANPA hato tok ahole paokyabu hünzom pangwüi chat-hüi; chixe hünzom kak amüiüi ilaxle mongong tüikyabu ang achangüi. Hünzome thüi: “Changle, kwom a JOWANPA hato chatpu chemthüikoxle chix a kwom Zang changle.

²³Haxnukho to kwome songsari baozang shwom ma kwom ang chem olüi chitüi. Israel nok hato ofong-otsox a JOWANPA, kwom Zang makhange tix hüipu.

²⁴Ikoxle kaitan tokhange kwom pupa hwome mokle hüikya pangnuli: zakkop baozang Bal to shwomkyae kwom a samle ngokya chun othom, sasün hia sachabu ang achangle.

²⁵Kem a zakkop ma jiplaxle thünzake kem to thünzak füi chwop ang tomkya li. Keme ilaxle kem pupa hwome JOWANPA kem Zang zongto jento achaxle hüidaoa; keme otuechu chix kaxtombu kax ma chilax.”