Read Wancho Naga Jeremia 32 Bible Online

Jeremia 32 - Wancho Naga bible

Jeremia 32

¹Judah ma Hezekiah wanghom ang ngokya zangbün lükya to JOWANPAe ku füi akax, ija a Babilon nok wanghompa Nebukadnezar-e apünle hüikya zanglao bünba-achyet lükya to changkya.

²Ipongma Babilon nok wanghompa süpahibue Jerusalem to single asukya, ilaxle ku a khwa lopsha ma hakle thomkya.

³Wanghompa Zedekiah-e ku kun to shole thom ilaxle chixe ku ma: “Kue ija tingnu a Babilon nok wanghompa ang kop ang tomüi,

⁴ilaxle wanghompa Zedekiah a paole azang ang müntho angkya changle. Chix a Babilon nok wanghompa chak to koxle apao angkya changle; chixe thün-khang asaole chix huak füijao zangwünüi.

⁵Zedekiah a Babilon nok to paoüi, ilaxle kue chix füi zangwünle machang tanto chix a ikhato ngoüi. Chixe Babilon nok füi azanle changkoxchu, chixe lütüile münchang. Ku, JOWANPAe ija akaxdaoa”, lükya JOWANPA kaxho kue apüipule kaxhux fe.

⁶JOWANPAe ku akax,

⁷“Hünpasa Shallum sasün Hanamel nang hato nguiüi ilaxle Benjamin haxsüt Anathoth ma tüikya chix haxtok shakle tüilax, chemthüikoxle ija haxtok shakle tüi angkya khünak nang boboma owachu müntüi, le thüiüi.”

⁸Ifüima, JOWANPAe chemle akaxpuix ilailaile, Zangshwom-Hom khwa to ku hato Hanamel ngui ilaxle ija chix haxtok shakle tüi angkya akax. Ikhoma ija kax ku hato JOWANPA tokhange hüikya wüi changpule kue tikle lax.

⁹Kue Hanamel angkya ija haxtok shakle tüi ilaxle chix ang ngun thütle kox; ija otha a khop ngunkhix huakbün anüt thama lang.

¹⁰Kue sohi shing ilaxle shak-sünkya laiza zale kop, ija ma ngünmixbu lax, ilaxle ngunkhix huak a tuak ma thütle kox.

¹¹Ifüima kue shakkya laiza hia sohi shing laxle tüikya tsaifün-kaxwün laiza pangnyi ilaxle daple tüikya laiza ku chak ma kop:

¹²ilaxle ibu a Baruk, Neriah sasün, Mahseiah susün chak to kox. Kue ibu a Hanamel tunthoma tamchu ngünmix sohi shingle changkyabu tamchu khwa ma thungle tüikya khünakbu noknue ngünle kox.

¹³Hwom pangwüi tunthoma kue Baruk ang thüi:

¹⁴“JOWANPA, Israel nok Khüthak Zang-e nang ang ija laiza, ashak-asünkya sohi shing laxle tüikya laiza hia daple tüikya laiza pangwüi pongle koplaxle ibu tikkux ma shole füichi hanpak ang sünle thom angkya kaxtom koxdaoa.

¹⁵JOWANPA, Israel nok Khüthak Zang-e, hom-haxbu, manzai haxtokbu ilaxle grep manzai haxtokbu ikhato pangwüi shakle chang angkya akaxdaoa.”

¹⁶Shakkya laiza Baruk chak to koxle changkya füima kue zangjop,

¹⁷“Khüthak JOWAN Zang, nange nang tsak-hi-zong chongkya makhange chaxwannu hia zangdingkho zingle alaipu; nang zongto huanuma tsakkya oli chemchu chitüi.

¹⁸Nange chizakle nang mongkün ojat-ojat hato ahopu, ikoxle hwom pupa hwom ochaxbu khoma nange khünaknu to sikchu angünpu. Nang a tüle tsak-zongle tüikya Zang tuita changle; nang a Khüthak JOWAN Zang changpu.

¹⁹Nange je füi mwottho zing ilaxle chongkya-chongkya mwotbu mokpu; khünaknue mokkya oli pangwüi nang ngünpu, ilaxle nange hwom ang hwom mwot füifüile hingho fapu.

²⁰Kaitanto Ijip nok to nange ohünotün hia khomtsikya mwotbu mokpu, ilaxle nange ibu chizakle anyix chuwüi mokle hüipu, Israel haxtok machu tamchu mixjat-mixli hwom khato chuwüi, ikhoma athax nang mün a pangnu khato awan ang koppu.

²¹Kwom zanpabu za ang tomkya ohünotün hia khomtsikya mwotbu makhange nange nang tsak-zong hia janzüi, Ijip nok tokya nang khünaknu apüi ang twonpu.

²²Nange hwom ang ija ahak-aluale tüikya hia haxzaoe awangkya haxtok koxpu; ija a nang hwom pupa hwom füi tsaotsüt daokya ningle changpu.

²³Ikoxle chemtue hwom ija haxtok to nguipuix ilaxle ija kop ang sütpuix, hwome nang kaxtombu kax ma chilaxle ilaxle nang hwom-nwot ningle hwom chingo; nange hwom ang kaxtom fakya mwot hwome chemchu chimokpu. Ikhoma nange hwom hato ibibi thomshix thama ahüipu.

²⁴“Babilon noke tingnu akhople hax thokle atsua ilaxle hwome single ngo. Ochax-ozan, woknuak-tilan hia okak-olak ibue ija tingnu a hwom chak to adün-saxpu. Nange chem akaxpuix ibu pangwüi changle ngaikya nange ngün ang kople.

²⁵Ikoxlechu JOWANPA Khüthak Zang, ngünmix khünakbu tunthoma ija haxtok shak ang ku ang kaxtom koxkya a nang changpu, ipongma tingnu a Babilon noke hwople kopüi khakha tüikya.”

²⁶Ifüima JOWANPAe ku füi akax,

²⁷“Ku a JOWANPA, khünaknu nok Zang changle. Ku zongto müimamale tsakkya oli chemchu müntüi.

²⁸Ija tingnu a kue wanghompa Nebukadnezar hia chix süpahibu ang kox angkya changle; hwome ija hwople kopüi

²⁹ilaxle ija to wün langüi. Hwome homkho to Bal ang ongai müikya so zokle changkya hia mama baozangbu ang töbu koxkya füi ku ang mongtsik adünle changkya hom-haxbu füi afomle, hwome ija tingnu zokle ashunüi.

³⁰Israel hia Judah nok pukax pongwang tokhange wüi, hwom mwot makhange ku ang mong amale hüipu.

³¹Ija zaile alaikya nyix makhange wüi ija tingnu angkya khünaknue ku ang küntsik-mongma ang tompu. Kue ija amüt angkya mongzangwünle tsuakdaoa

³²chemthüikoxle Judah hia Jerusalem angkya khünaknue, hwom wanghombu hia lompabu, hwom nguapabu hia ajebu füi tomlaxle chichang-chizangkya mwot müimamale mokle hüidaoa.

³³Hwome ku hato tok aho; ilaxle kue chizakle hwom hama anwot-anole changkoxchu, hwome ku kax to chiapa ilaxle awanle kop ang chithüi.

³⁴Hwome, ku to shwom ang zingkya Zangshwom-Hom ma nushix dongkya chapabu to apüile danle ilaxle ija akhu ang tomle.

³⁵Hwom baozang Molek ang hwomsu-hwomsabu tö ang kox angkya hanpakma Hinnom Haxsha ma hwome Bal ang tö-tsapbu zingle kox. Ija mok angkya kue hwom ang kaxtom chifa, ilaxle hwom ija ningkya mwot mokle Judah khünaknu ang ochax lyen ang tom angkya ku mongkho ma jao chidong.”

³⁶JOWANPA, Israel nok Zang-e ku füi akax: “Jeremia, Ochax-ozan, woknuak-tilan hia okak-olak tokhange ija tingnu a Babilon nok wanghompa chak to dong angkya kax khünaknue akax ngole. Athax kue chem akax angkya tüipuix ija to apahüi.

³⁷Ku mongtsik-mongma tokhange kue hwom chiakle asam thomkya chaxwan pangkha tokya wüi kue khünaknu asox-asaüi angkya changle, ilaxle kue hwom ija haxtok to tamchatle ngui ang tomüi ilaxle ija khama chem chaza angkya chitüile ngo ang tomüi.

³⁸Ifüima hwom a ku khünaknu ilaxle ku a hwom Zangle ngo angkya changle.

³⁹Kue hwom ang tsün ma mwotli tuita wüi koxüi: ija a, hwom tamchu hwom su-sa hwom fünmüi angkya hanpakma, hwome othuithuima ku chathua zale ngo angkya.

⁴⁰Kue hwom füi oshuk-chitüikya tsaotsüt tuita zingüi. Kue hwom hanpakma müikya mwot mokkya tam-münzak, ilaxle hwom mong makhange abakle ku chathua zale ngo ang tomüi, ikoxle tix hwome ku hato tok chiahoüi.

⁴¹Hwom hanpakma müikya mwot mokkya to mongmüiüi, ilaxle kue hwom a ija haxtok ma othuithui hanpak ang ating-anokle ngo ang tomüi.

⁴²“Chemle kue thama ija ibu khünaknu hato apüipuix, ija lailaile ku ma tüikya müikya olichu pangwüi kue tsaodaokya ningle hwom ang kox angkya changle.

⁴³Ija haxtok a khünak hia müi chemchu chingokya sak-hax ningle changüi ilaxle ija a Babilon nok ang koxdao angkya changle, ikoxle ija angkya haxtok-zangdombu a tamchatle shakle lax angkya changle le khünaknue akax ngole.

⁴⁴Ibu a khünaknue shakle laxüi, ilaxle shakkya laiza sohi shingle zaüi, ilaxle ngünmixbu kaxkhün laiza tüiüi. Ija a Benjamin haxsüt, Jerusalem akhople tüikya tingkhuabu, Judah tinglongbu, ilaxle haxhua tokya tinglongbu, haxcha tokya tinglongbu, ilaxle shuathongchi Judah, ibu onuibu ma changle hüiüi. Kue khünaknu a hwom chaxwan towüi chatle ating-anokle chang ang tomüi. Ku, JOWANPAe ija kax akaxdaoa.”