Read Wancho Naga Jeremia 33 Bible Online

Jeremia 33 - Wancho Naga bible

Jeremia 33

¹Ku a khwa ma kunkha ma ngole tüipongma, ku hato tamchatle chuwüi JOWANPA kaxho hüi.

²JOWANPA, owae chaxwannu zingle alaipuix, owae ija alailaxle ija onui ma danle changpuix, chixe ku füi akaxle. Chix owa ang JOWANPA le amünpuix, chixe thüi:

³“Ku nyaklax, kue nang kax to lanüi; nange tsingle chingokya ohünotün hia khomtsikya jali nang hama wünüi.

⁴Akhople koplaxle zan-noke single changkya khoma Jerusalem ma tüikya hom-haxbu hia Judah ang wanghom homlo, ibu a pünle ama angkya changle.

⁵Züizüie Babilon nok füi azanüi, ilaxle hwome ku mongtsik hia mongma füi hongle anguak angkya khünak mangbu füi hom-haxbu awang ang tomüi. Ija ma tüikya khünaknue mokkya ochax mwotbu khoma kue ija tingnu hato tok ahole paopu.

⁶Ikoxlechu ija tingnu hia ima tüikya khünaknu okak-olak pangwüi kue zingle achatkoxüi. Kue hwom hato okhonguikya mongsom hia zazyen angkya chitüile ngo angkya chingcha ahole koxüi.

⁷Kue Judah hia Israel a huanuma ahak-alua ang tomüi, ilaxle kue hwom a amipongkya lailaile zingle amüi koxüi.

⁸Hwome ku zongto thaile mokdaokya ochaxbu tokya hwom atsaole koxüi, ilaxle hwom ochaxbu hia ku zan to kale tüikyabu, kue hwom ang thailak tüiüi.

⁹Jerusalem a ku hanpakma mongmüi, achuak-achenkya hia mongngam otong ang changüi; Jerusalem angkya khünaknu to kue mwotmüi mokle koxkya hia ija tingnu hato ahak-aluakya apüile fakya atatkya zuma zangfang angkya onok pangwüi zaüi ilaxle chikux ahongle changüi.”

¹⁰JOWANPAe akax: “Khünaknu thüile, ija onui a sak-hax ningle tüile, ikhama khünak hia müi chemchu müntüi. Ilaxle hwom a otsingtsing changle; Judah angkya tinglongbu hia Jerusalem tingjang lomnu pangwüi ahuasakle tüile; ikhama khünak hia müi chemchu münngo. Ikoxlechu ija onui ma hünzome tamchatle ozing atat ang kopüi,

¹¹mongmüile akhongkya hia tuiju-nasomle puakya ozingbu a. Khünaknue Zangshwom-Hom to töbu apüile changpongma tsai ngole changkya zing hünzome atat ang kopüi; Hwome thüile: ‘Khüthak JOWANPA Zang ang münchong fakox, chemthüikoxle chix a müile ilaxle chix mongkün ma oshuk müntüi.’ Kue ija haxtok a amipongkya lailaile ahak-aluale chang ang tomüi. Ku, JOWANPAe ija akaxdaoa.”

¹²JOWANPA Khüthak Zang-e thüi: “Ija haxtok oja sak-hax ningle tüipuix, ojongkha ma khünak hia müi chemchu chingo puix, ikhato tamchatle chunnyetpabue hwom chun nyele changtsuak angkya müi fumtsüt nui tüiüi.

¹³Haxhua tokya, haxcha tokya hia shuathongchi Judah tokya, Benjamin haxsüt ma tüikya tinglongbu, Jerusalem akhople tüikya tingkhuabu ilaxle Judah angkya tinglongbu ma chunnyetmixbue tamchatle hwom chunbu akiakle changüi. Ija kax JOWANPA, kue akaxdaoa.”

¹⁴JOWANPAe thüi: “Israel hia Judah angkya khünaknu füi kue tsaotsütle changkya changle ngai angkya tunu nguile ngole.

¹⁵Ipongma kue Dawid sixli hwomkha angkya otsao wanghompa tuita lomüi. Ija wanghompa-e haxtok pangnu khato wüi changkya hia sukyakya moküi.

¹⁶Judah hia Jerusalem angkya khünaknu kho a sünüi ilaxle hwom a cha-ao-mongsao chemchu chitüile ngo ang kopüi. Ija tingnu ang ‘JOWANPA, kem Khosünpa’ le nyaküi.

¹⁷Ku, JOWANPAe tsaopu, Israel nok wanghom ang Dawid sixli jento tüile ngo angkya

¹⁸ilaxle ku ang zokle ashunkya tö, saxziak tö hia mama töbu koxle ku thotha-manzai angkya hanpakma Liwi homjen angkya zompu-zangpabu jento tüile ngo angkya kue tsaopu.”

¹⁹JOWANPAe ku ang thüi:

²⁰“Ibu othuithuima tex-tyale thomkya tuthüt ma hüi angkya hanpakma kue zangnak hia zangngai füi tsaosaxpu; ija ku tsaotsüt otuechu pünle ama ang müntho angkya changle.

²¹Ija lailaile kue ku dapa Dawid füi chix sixli makhange jento Israel nok ma wanghom tüile ngo angkya tsaopu, ilaxle hwome jento ku thothale chang angkya hanpakma Liwi homjen zompu-zangpa hwom füi tsaosaxpu; ilaxle ija tsaosüt a otuechu ama ang münthoüi.

²²Kue ku dapa Dawid hwom sixli hia Liwi hwom homjen zompu-zangpabu pu-tsale chang ang tomüi, ikhoma hwom khünak huak a ding angkya lyettsi hia tinu kax angkya fix büta okiak chithole tsaüi.”

²³JOWANPAe ku ang thüi:

²⁴“Kue zünle kopkya homkha anyi, Israel hia Judah nyi kue chilaxle awütle le khünaknue akax ngokya nange ngünchami? Ikhoma hwome ku khünaknu to adale hule ilaxle ibu a tuita jat-li ang chilaxle changle.

²⁵Ikoxle ku, JOWANPAe zangnak hia zangngai füi tsaotsüt thompu, ilaxle ding-hi-hax ziakople thom angkya wanlom kue zingpu.

²⁶Kue ija otsing tomtata ma chemle mokpuix ilailaile Jakop hia ku dapa Dawid hokhi füikya ku tsaotsüt kue otya ma thoma angkya changpu. Abraham, Isak hia Jakop hwom su-sa hwom thakma apün angkya kue Dawid sasün hwomkha angkya tuita zünle kop angkya changle. Kue ku khünaknu to chingchale tüiüi ilaxle hwom a tamchatle ahak-aluale tüi ang tomüi.”