Read Wancho Naga Jeremia 35 Bible Online

Jeremia 35 - Wancho Naga bible

Jeremia 35

¹Josiah sasün Jehoiakim Judah ma wanghom ang ngopongma, JOWANPAe ku füi akaxle thüi:

²“Rekab hwom homjen khünak hwom hato paolaxle akaxkox. Ifüima hwom a Zangshwom-Hom angkya nui tuita to apüikox ilaxle hwom ang ju alingkox.”

³Ikhoma kue Rekab hwom saxthom pangwüi laxlaxle tox: Jazaniah (Jeremia sasün, chix a Habaziniah sasün changkya) ilaxle pasa-tüinao hwom hia ibu sasün hwom pangwüi:

⁴ilaxle hwom Zangshwom-Hom to apüi. Kue hwom a Igdaliah sasün ajepa Hanan wangshem hwom nui to apüi. Ija nui a, Shallum sasün Maseiah sasün, Zangshwom-Hom ma alixachong tuita nui hia mama alixachong nuibu zui ma tüikya.

⁵Ifüima kue Rekab khünakbu tunthoma jue awangle tüikya wansabu dan ilaxle kue hwom ang thüi: “Hidaopong ju linghüio.”

⁶Ikoxle hwome lan: “Kwome ju münlingzai. Rekab sasün Jonadab kwom putonge, kwomechu ilaxle kwom su-sa hwom opupuechu ju lingle chang angkya münchanghex-ole akaxle.

⁷Chixe kwom ang hom-hax zingle chichang angkya chichangba haxtok mo-zangle chichang angkya ilaxle grep haxtok mole chichang angkya chichangba ibu shak-sünle chichang angkya akaxdaoa. Chixe kwom ang othuithuima nyihom ma ngole chang angkya kaxtom koxle, ikoxtix püntüi lailaile kwom ngole tüikya ija haxtok ma kwom jento ngo ang kop angkya changle.

⁸Jonadab-e kwom ang adangle fakya kax pangwüi kwome laxle hüipu. Kwom jaoe ju otuechu münlingzai, ija ningle kwom kakonubuechu, kwom sasün hia sacha hwom opupuechu münlingzai.

⁹Kwom ngo angkya hanpakma kwome hom-hax münzing: kwom nyihom ma ngopu: ilaxle kwome makux ang grep haxtok, manzai haxtok, saxziak, ibu chemchu koplaxle münngo. Kwom putong Jonadab-e kwom ang koxkya kaxtom kax ma komkai laxlaxle kwom ngopu.

¹¹Ikoxlechu chemtue wanghom Nebukadnezar-e chaxwan tingtakle hüipuix, Babilon nok hia Siria nok süpahibu füi atsaile ngo ang Jerusalem to ngui angkya kwome zangwün tsuakpu. Ikhoma anyix kwom Jerusalem ma ngole tüipu.”

¹²JOWANPA, Israel nok Khüthak Zang-e Judah hia Jerusalem angkya khünaknu hato nguilaxle akax angkya ku füi akaxle thüi: “Ku, JOWANPAe, hünzome ku kax to münapa tamchu kue adangle fakyabu kax ma münlaxle büthüikoxle angampule atüipu.

¹⁴Jonadab su-sa hwome ju chiling angkya chix kaxtom kax ma laxle, ilaxle anyix kople hwom opupuchu ju-khan münling. Ikoxle kue chizakle hünzom füi zangwünle ngopu, ikoxle hünzome ku kax ma ojao chilax.

¹⁵Kue chizakle hünzom hato ku da ajebu ahüile ngopu, ilaxle hwome hünzom ang chichangchizangle ngokya ochax lom dantoxlaxle sukya mwot mokle hüi angkya akaxpu. Kue hünpu hünpa hwom ang tamchu hünzom ang koxle thomkya haxtok ma hünzom ngole hüi angkya kux male, hünzome baozangbu to shwom-töle hia ibu thothale chichang angkya hünzom ang kaxkhün koxle hüipu. Ikoxle hünzome ku kax chiapa chichangba ku kax to mongjao chikox.

¹⁶Jonadab su-sa hwome hwom putonge hwom ang koxkya kaxtom kax ma laxle hüipu, ikoxle hünzome ku kax ma ojao chilaxpu.

¹⁷Ikhoma athaxpi, JOWANPA, Israel nok Khüthak Zang-e kue thama-thomshix chempang ahüi angkya tsaole thompuix, ibu pangwüi Judah hia Jerusalem hato ngui ang tomüi. Kue zangwün pongma hünzome chiapa, tamchu kue nyakpongma hünzom chitsa, ile changkya khokho ma kue ija mwot mok angkya wüi changpu.”

¹⁸Ifüima kue Rekab homjen hama JOWANPA, Israel nok Khüthak Zang-e hwom füi akaxkya kax kue apua: “Hünzome hünzom putong Rekab-e koxkya kaxtom kax ma laxle changdaoa; hünzome chixe adangle fakya pangwüi kax ma laxle, ilaxle hünzom ang kaxtom fakya pangwüi hünzome mokle hüipu.

¹⁹Ikhoma JOWANPA, Israel nok Khüthak Zang, kue thüipu, Rekab sasün Jonadab ang ku thotha manzai angkya hanpakma lüka süntswon tüile changüi.”