Read Wancho Naga Jeremia 36 Bible Online

Jeremia 36 - Wancho Naga bible

Jeremia 36

¹Josiah sasün Jehoiakim Judah ma wanghom ang achangkya zanglao ali lükya to JOWANPAe ku füi akax,

²“Laitün tuita koplax ilaxle Israel nok hia Judah nok tamchu chaxwannu nok pangwüi hanpakma kue nang hama akax daokyabu ku kax pangwüi lai ma zale koplax. Josiah wanghom ang ngopong tokhange athax kopkya mong ma kue nang füi chempang akaxle hüidaopuix ibu pangwüi zale koplax.

³Owatsing chemtue Judah khünaknue, kue hwom hato ahüi angkya thama-thomshix bama atat ang kopkya zuma, hwom ang mongchat laxle chichang-chizangkya lomtang pangwüi danle tox lechu changtüilax.”

⁴Ikhoma kue Neriah sasün Baruk se ilaxle JOWANPAe ku füi akaxkya zangwün pangwüi kue chix hama akaxle kox ilaxle zale kop ang tom. Ilaxle Baruk ibu pangwüi laitün tuita ma zale kop.

⁵Ifüima kue Baruk ang ibibi kax adangle fa: “Ku a Zangshwom-Hom to ngui ang müntom.

⁶Ikoxle khünaknue anaole chisax-chilingle zangjop laxkya zuma ikhato nang dong koxle müiüile thütpu. Nange ija laitün akhongle eüi, ilaxle JOWANPAe ku füi akaxkya kax kue nang hama chemle taile zexzai fapuix ibu pangwüi noknue atat ang kopüi. Noknusae nang kaxzing atat ang tho angkya onui ma nang ija ile mokkox; hwom tinglongbu tokhange nguile tüikya Judah khünakbuechu ija kax atat angkya oli changpu.

⁷Owatsing hwome JOWANPA to zangjopüi ilaxle chichang-chizangkya khatokya hwom mongchatle chang ang tsuak, chemthüikoxle zongbakbak ma chix mongtsik mongma ashukle JOWANPAe khünaknu aza-anale changdaoa.”

⁸Ikhoma Baruk-e kue chix hama akaxkya lailaile Zangshwom-Hom ma JOWANPA kax e.

⁹Judah ma wanghompa ang Jehoiakim ngokya zanglao aga lükya lyetjang aku to, JOWANPA chingcha kop angkya hanpakma khünaknue chisax-chilingle zangjop lax. Jerusalem ma ngole tüikya hia Judah nok tinglongbu tokhange nguikya khünakbue ija zangjop lax.

¹⁰Ile khünak noknusae apale ngopongma, kue akaxkya pangwüi Baruk-e ija laitün angkya ele apua. Chixe ija ile Zangshwom-Hom ma, khwa laiza mix Gemariah, Shafan sasün nui makhange mok. Chix nui a homdingkho angkya khwa ma Zangshwom-Hom Zünkai Hozün zui ma tüikya.

¹¹Mikaiah, Gemariah susün Shafan sasün, chixe JOWANPA kax laitün angkya Baruk-e ekya atat.

¹²Ifüima chix wanghom homlo to pao ilaxle nguakax-wangkhobue katzua laxle ngopongkhae, khwa chakza mix nui to ngui. Khwalo chakzamix Elishamah, Shamaiah sasün Delaiah, Akbor sasün Elnathan, Shafan sasün Gemariah, Hananiah sasün Zedekiah, ilaxle mama nguakax-wangkhobu pangwüi ikhama tüikya.

¹³Baruk-e khünaknu hama ele ahokya chixe atatkya zangwün pangwüi Mikaiah-e hwom hama wün.

¹⁴Ifüima nguakax-wangkhobue, chixe ekya laitün apüi angkya Baruk füi akax ang Jehudi tsanle apao. (Chix a Nethaniah sasün, Shelemiah susün tamchu Kushi sutai changkya.) Baruk-e ija laitün hwom hato apüile kox.

¹⁵Hwome thüi: “Thunghüi, ilaxle ija laiza kwom hato e-le ahohüi.” Ikhoma Baruk-e ija e-le aho.

¹⁶Chixe ija e-le tsuak füima, hwome na nwonle tata chito hu ilaxle Baruk ang thüi: “Kwome ija wanghompa hato kaxkox angkya wüi changpu.”

¹⁷Ifüima hwome chix ma atüi: “Athaxpi nange ibu chempangole zale koppuix kwom hama wünhu. Ija nang hama Jeremia-e akaxle koxkya changpuix nyi?”

¹⁸Baruk-e lan: “Ikha angkya kaxmuak pangwüi ku hama Jeremia akaxle koxkya changpu, ilaxle kue ibu pangwüi khanti füi lai ma zale koppu.”

¹⁹Ifüima hwome chix ang thüi: “Nang üntoxle Jeremia hünkhi a paolaxle azwonle ngo angkya changle. Hünkhi ojongto ngopuix owa angchu awan ang taxkox.”

²⁰Nguakax-wangkho ija laitün a Elishamah, khwa chakzamix nui ma thom, ilaxle wanghompa khwa to pao, ilaxle ikhato hwome wanghompa hama pangwüi wünle kox.

²¹Ifüima wanghompa-e ija laitün apüi ang Jehudi tsanle apao. Chixe Elishamah nui angkya ija lax ilaxle chixe ija wanghompa hia ikhama chix akhople thungle tüikya nguakax-wangkhobu pangnu hato e-le apua.

²²Ija a zangwa changkya ilaxle wanghompa a chix zangwa wanghom homlo ma wünzui ma thungle tüikya.

²³Jehudi-e ija laitün ofa azom hia ali tukux e-le tsuakkya füima, wanghompa-e ibu bit-sa tuita füi zütle akyet ilaxle ibu a wünkha to tswonle awüt. Ija laitün komkaile zokle ashunle machang machangle chixe ile chang.

²⁴Wanghompa hia ikhama tüile asukya alixachongbu opange ija atat ang koppuix, owachu chiza chichangba mong ma kakkya mix chitüi.

²⁵Elnathan, Delaiah, Gemariah hwome ija laitün zokle chiashun angkya wanghompa joxle changkoxchu chixe hwom kax to ojao na chitha.

²⁶Ifüima chixe, wanghomsa Jerahmel ang, Azriel sasün Seraiah hia Abdil sasün Shelemiah hwom füi tom üntoxle ku chakzamix Baruk kukhi kop angkya kax kox. Ikoxlechu kukhi a JOWANPAe khomle thom.

²⁷Kue Baruk hama akaxle koxle zale kopkya laitün wanghompa Jehoiakim-e zokle ashunle chang füima, JOWANPAe

²⁸mama laitün tuita zinglaxle owang pongkya laitün ma tüikya tsai-kax pangwüi zale kop angkya ku füi akax.

²⁹Wanghompa füi akax angkya kax ija JOWANPAe ku füi akax: “Nange laitün a zokle ashundaoa, ilaxle Babilon nok wanghompa nguilaxle ija haxtok pün-pakle ama angkya ilaxle ima tüikya khünaknu hia müi pangwüi langle awüt angkya chixe chemkhoma zapule Jeremia ma atüidaoa.

³⁰Ikhoma JOWANPAe kue nang wanghompa Jehoiakim füi akaxpu: Dawid wangting ma nang sixli owaechu athax füichi ma apün-awangle münchangpu. Nang mang a kothofa to tswonle awütüi ilaxle ikhato ija a anyixningle zanghan to lomüi ilaxle awünningle a nyenti to akongüi.

³¹Hünzome mokkya ochax mwot pangwüi khoma kue nang to, nang sixli hwom to, nang pünlix-wangchong hwom pangwüi to sikangünüi. Nangechu ilaxle Jerusalem hia Judah ma tüikya khünaknu owaechu kue kaxkhün fakya to na chitha, ikhoma chempang thama-thomshix bama kue hünzom khünzai ang koxdaoa puix, ibu thama hünzom pangwüi khangkho ma adütüi.”

³²Ifüima kue mama laitün lax ilaxle ija ku chakzamix Baruk ang kox, ilaxle kue akaxle koxkyakya pangwüi kax chixe ija ma zale kop. Pongwang angkya laitün ma tüikyabu chuwüi pangwüi chixe zale kop ilaxle kue chix ang akaxle koxkya ilailaikya mama kaxhobu chuwüi zale kop.