Read Wancho Naga Jeremia 4 Bible Online

Jeremia 4 - Wancho Naga bible

Jeremia 4

¹JOWANPAe thüi: “Israel khünaknu, hünzom mong chat-se jangtsu, ku hato chat-hüi. Hünzome ku to mongong thom ilaxle kue tsakkya chapabu awütle jangchang,

²ku mün lünlaxle kaxlan fa angkya hünzom hanpakma sukya ang changüi. Ifüima pangnu jat-lie ku ang hwom to mohiman angkya akaxüi, ilaxle hwome ku achuakle changüi.”

³JOWANPAe Judah hia Jerusalem angkya khünaknu füi akax: “Mamokkya haxtokbu haxkhutle molax; huxpünbu khato hünzome otsangbu taxküi.

⁴Hünzom Judah hia Jerusalem angkya khünakbu, hünzome ku, JOWANPA füikya tsaotsüt thomlax, ilaxle ma lailai to ku ang atsaole koxlax. Hünzome ile chichang thüiningle, hünzome mokdaokya ochaxbu khoma wün füi zokkya ningle hünzom a ku mongtsik füi zoküi. Ijae hünzom zokle ashunüi ilaxle ija amüt angkya mix owachu müntüiüi.”

⁵Haxtok awangle nyazong mütkox! Tsingshole akhong-akhakox! Judah hia Jerusalem angkya khünaknu füi akaxkox ziakop laxle thomkya tingnu to pao angkya bama.

⁶Zaion chitole angkya lom apua laxkox! Khangkhosün ang ziklax! Shenle taxngo! Shuakuxchi tokhange JOWANPAe huanu thomjo hia thama apüile ngole.

⁷Azwonle ngokya mailang laile hüikya ningle, jat-libu hato ngui angkya thama achexüna. Chix a Judah amüt ang nguile ngole. Judah angkya tingnubu pünle ama toxüi, ikhato owachu münngoüi.

⁸Ikhoma nyikhwon aponglax, ilaxle awaole soplax chemthüikoxle JOWANPA mongtsik zadünkya Judah hatokya machat.

⁹JOWANPAe thüi: “Ija nyix a wanghom hwom hia nguakax-wangkhobu ang ngaxchu monghik ashukle changüi; nguapabu a chabüt-lasünle changüi ilaxle ajebu a khosamle jao abütüi.”

¹⁰Ifüima kue akax: “Khüthak JOWANPA, nang Jerusalem angkya khünaknu komkaile dyendaoa! Nang tumüi tüiüihex-ole thüi: ikoxle hwom dingkux ma changlo tüile.”

¹¹Sak-haxchi tokya hwom hato khamfoxkya zangwin hüile ngole le Jerusalem ma tüikya khünaknu hato apuakox angkya tunu nguile ngole. Ija a tsaxsa zaza jeple paokya cheitho zangwin chichangüi:

¹²JOWANPA kaxtom ma hüikya zangwin a tüle janzüi füikya zangwin changüi. Chix khünaknu hato kaxfün khuapukya a JOWANPA chixjao changpu.

¹³Hulax, zanpa a zangfwombu lailaile hüile ngole. Hwom man-kanlinbu a shangflo ningle, ilaxle hwom manbu a ola füi ngaxchu süzikle. Kem a samdaoa! Kem a maxdaoa!

¹⁴Jerusalem, nang mongkha angkya ochax sole atsao dao, ikoxtix nang azang ang thoüi. Ochax tutexbue awang laxle nang chemtukux ngole hüiüi?

¹⁵Dan tingnu hia Efraim haxnu tokya kaxhomixbue chimüikya kaxho apukle.

¹⁶Hwom a onokbu ang kaxkhün kox ang tamchu tsailo nok tokya zanpabu nguile ngokya bama Jerusalem hama apua angkya hanpakmale nguikya changle. Zan-nok ibue Judah nok tingnubu füi alünle akhongüi

¹⁷ilaxle zimfa nyele ngokya khünakbu lailaile hwome Jerusalem akhople kopüi, chemthüikoxle she angkya khünaknue JOWANPA zan to kale tüile. Ija kax JOWANPAe akaxdaoa.

¹⁸Nang ngokya zanglao hia nange mokle hüikya mwotbu makhange Judah nange ija nange alüile nang hato apüilaxpu. Nang ochaxbu makhange ija thangnak apong ang tomlaxpu; ijae nang mongtsang apatle tsundaoa.

¹⁹Kakle! Kue adu ang chithole kakle! Ku khaxtua! Ku khaxtua zongbakle jao twople! Ku dangjale ngo ang müntho; Kue nyazongbu zing atatle azan ang akhongkya zingbu a.

²⁰Thangshix tuita füima tuita azuile hüi; haxtok pangwüi pünle ama toxdaoa. Kem pombu allele pünle ama; ibu tuknyibu a akyetle akhix awüt.

²¹Zanhok shixkya to kue chemtukux hule ngoüi ilaxle nyazongbu mütle angaokya apale ngoüi?

²²JOWANPAe thüi: “Ku khünakbu a ongat; hwome ku müntik. Hwom ongat naosombu ningle changle; hwom ma tsing-wankya chemchu müntüi. Chem ochax hex ija mok ang hwom müimale anaxle, ikoxle chem müipuix ija mok ang hwome chithole changle.”

²³Kue chaxwannu to hu—ija a puamün chitüikya haxtok tuita changle; zangkho to hu—ikhato zangngaikya chitüi.

²⁴Kue haxnubu to hu—ibu a sile aloxle ngo, ilaxle haxhuabu a paotox chattoxle aloxle ngo.

²⁵Ikhato khünak owachu müntüile kue ngün; ikha angkya osabu ngaxchu wüi pile pao.

²⁶Haxzao füikya haxtok a tuita sak-hax ang achangle pao; ima tüikya tingnubu pünle ama thomdaoa zadünkya JOWANPA mongtsik tokhange. (

²⁷Zangfang pangwüi awütkya haxtok ang achang angkya JOWANPAe akaxdaoa, ikoxle ijae ija komkaile amütüile münchang.)

²⁸Chaxwannu ang nuzaokya tüiüi; zangkho to zangnake awangüi. JOWANPAe ija akaxdaoa ilaxle chixe ija chix mong münalüix. Chixe chix mongzangwünle tsuakdaoa ilaxle tam aküile huüi münchang.

²⁹Mankho ma azankya hia sanhap füi azankyabu zing thoto pangnusa wüi zikle paoüi. Züizüi a faokha to paoüi; mamabu a longnu khobu to ngaüi. Tingnu pangwüi ahuasakle dantoxüi, ilaxle ibu ma otuechu tamchatle khünak münngo.

³⁰Jerusalem, nang a maxdaoa! Nange haxkhi-zangsumle omalax ang aza-apua ngo? Nange omalax ang likwünbu lax tamchu mikbu to zong füi lyetle changpu? Nange oba to nang sün jo amüile zing-ngole! Nang mongküne nang awütdao a ilaxle nang mik amüt-se tsule.

³¹Kue sopkya ozing tuita atat, mixcha tuita nao ngün ang sopkya zing ningle, mixcha tuitae pongwang lükya nao ngün ang awaokya ningle. Ija a wikha akalaxle zaksyet ang azongle Jerusalem sopkya zing tuita, she chak pünlaxle she-e thüi: “Ku a maxdaoa! Hwom a ku lang ang nguile ngole!”