Read Wancho Naga Jeremia 43 Bible Online

Jeremia 43 - Wancho Naga bible

Jeremia 43

¹JOWANPA, hwom Zang-e hwom füi akax angkya zangwün ku ang koxle apaokya komkaile kue hwom hama wünle tsuak.

²Ifüima Hoshaiah sasün Azariah hia Kareah sasün Johanan ilaxle kax ma chilaxle tüikya khünaknue ku hama akax: “Nang a atse ngole. Kwom Ijip nok to kale chingo angkya hanpakma kwom füi akax ang JOWANPAe ahüikya münchang.

³Neriah sasün Baruk-e, Babilon noke kwom to lütlaxle kwom a zanda ang hwom chaxwan to kople pao chichangba mik-amütle chang angkya kuxmale, nang ang kwom tu ama angkya mongkho adünle koxpu.”

⁴Ikhoma Johanan-e wüi changlax chichangba süpahi lompabue wüi changlax chichangba khünaknu opupuechu Judah haxtok ma ngole chang angkya JOWANPA kaxtom kax ma münlax.

⁵Ifüima Johanan hia süpahi lompabue Judah ma danle toxkya khünaknu pangwüi koplaxle Ijip nok to ka; ikhama manoknok to chiakle asam thomkya chatkya khünak ibibi chuwüi tüikya:

⁶lükabu, shekobu, naosombu, wanghom sacha hwom, ibibi. Süpahi lompa Nebuzaradan-e Gedaliah chak ma danle toxkya khünak pangwüi, Baruk kukhi ngaxchu wüi womle tüikya.

⁷Hwome JOWANPA kaxtombu kax ma chilax ilaxle Tahpanhes tingnu alople jao pao.

⁸Ikhato JOWANPAe ku füi akax,

⁹“Longnu chongkyabu lomle apüilax ilaxle ibu a khünak aham angkya lomtang ma tingnu angkya sotkari homnu thüntho ma atsamle amongle dankox. Ilaxle hünzome ija mokle ngokya owawa Israel khünake ngünle lax ang tomkox.

¹⁰Ifüima hwom hama, ku, JOWANPA Israel nok Khüthak Zang-e ija khato ku dapa wanghompa Nebukadnezar apüiüi, ilaxle chixe ilaxle hünzome akhünle thomkya longnubu tok ma chixe chix chongwang ngwotnui danüi. Ibu ding ma chixe chongwanghom nyihom pünle ajongüi.

¹¹Nebukadnezar nguiüi ilaxle Ijip nok to lütüi. Okak-olak ma maxse khünakbu okak-olak ma wüi maxüi, zanda ang kople paosesechu pangwüi zanda ang kople paoüi, ilaxle zan ma maxsese chuwüi zan ma maxüi.

¹²Kue Ijip nok baozangbu to shwomkya onuibu to wün langle changüi, ilaxle Babilon nok wanghompa-e hwom baozangbu laxlaxle paoüi chichangba zokle ashun toxüi. Chunnyetmixbue hwom nyizabu tsui chitüi homtoxle tsaothale tswonle kopkya ningle, Babilon nok wanghompa-e Ijip haxtok tsaothale tsuiüi ilaxle hwom to anaole dantoxüi.

¹³Chixe Ijip nok Heliopolis ma otsao long chapabu amaüi ilaxle Ijip nok baozangbu to shwomkya hombu zokle ashun toxüi.”