Read Wancho Naga Jeremia 44 Bible Online

Jeremia 44 - Wancho Naga bible

Jeremia 44

¹Ijip nok ma, Migdol tingnu, Tahpanhes tingnu hia Memfi tingnu, ibu ma ngole tüikya tamchu hwom haxtok shuathong chito ngole tüikya Israel khünaknu hato kaxho fa angkya JOWANPAe ku füi akax.

²JOWANPA, Israel nok Khüthak Zang-e thüi: “Kue Jerusalem hato thama tsangmüt apüikya hünzom tomtatae tamchu mama Judah tingnubu ma tüikya pangnusae ngünle laxdaoa. Athax kople ibu a pünle ama thompu, ilaxle ibu ma khünak owachu chingo

³chemthüikoxle hwom khünakbue ochax mwot mok ilaxle ku ang mongtsik adünle changdaoa. Hwome mama baozangbu ang zokle ashunle töbu kox ilaxle hünzomechu tamchu hünpu hünpa hwome shwomle chihüikya baozangbu thothale changdaoa.

⁴Kue chizakle hwom hato ku dapa ajebu ahüile ngopu; ilaxle hwome hünzom hama kue anukya iningle khomtsikya mwot chimok angkya akaxpu.

⁵Ikoxle hünzome chiapa ilaxle ojao mong chikox. Hünzome mama baozangbu ang zokle ashunle töbu koxle ngokya tamchizaktox.

⁶Ikhoma kue ku mongtsik hia mongma Judah tingnubu hia Jerusalem tingjang lombu ding ma thokle adüt, ilaxle kue ibu wün to zokle ashun. Ibu pünle amatox, ilaxle ibu a, anyix kople tüikya ningle mikngün zongma tuita khomtsi angkya oli ang ngole hüi.

⁷“Ikhoma, ku, JOWANPA, Israel nok Khüthak Zang-e, athax hünzome büthüikoxle iningkya ochax mwot mokpule alüile ma ma atüile. Hünzome, lüka, sheko, naosom hia pexlaksa hwom opupuchu ota chitoxle bakle naxmaxdaole thütpia?

⁸Hünzom ngo ang nguikya Ijip haxtok, ikhato hünzome chapabu to shwom ilaxle mama baozangbu ang töbu koxkya füi ku ang mong büthüikoxle atsikpu? Zangfang angkya khünaknue hünzom chanyi-wanjaile tamchu hünzom mün othuak-ozom lom to lünle changkya füi hünzom alüile olithule naxmax ang ile mok pia?

⁹Judah tingnubu hia Jerusalem tingjang lomnu to hünpu hünpa hwome, Judah nok wanghom wangcha hwome, tamchu hünzom hia hünzom kakonubue chichangchizang ochax mwot mokle changkyabu hünzome alakdao pia?

¹⁰Anyix kople hünzom puinaikya kha jao matüi. Hünzome ku achuak-achenkya chitüi chichangba hünzom ang tamchu hünzom pupa hwom ang koxle hüikya ku wanlom kax ma laxle hünzom ngole chihüi.

¹¹“Jangchangba, ku, JOWANPA, Israel nok Khüthak Zang hünzom zongto zanpa ang changüi ilaxle Judah pangwüi amütüi.

¹²Ota toxkya tamchu Ijip nok to kale ngo angkya mongzang wünlaxle ngokya Judah khünaknu, kue hünzom pangwüi amüt tsuakchale huüi. Hwom pangwüi, chongkya chu hixkya chu, ochax-zan ma chichangba woknuak ma Ijip nok to ziüi. Mikngün ma hwom a za-adünle changüi; khünaknue hwom chanyile changüi ilaxle hwom mün a othuak-ozom lom to lünüi.

¹³Chemle kue Jerusalem to sikangünpuix, ija lailaile Ijip to ngokya khünakbu to kue ochax-ozan, woknuak-tilan, ilaxle okak-olak, ibu füi sikangünüi.

¹⁴Ota toxkya Judah khünak opang Ijip nok ngo ang kapuix, hwom tuita chu paole azang ang chichangba ozün ma ngo ang müntom. Hwom ikhama ngosele tüle sungle changkoxchu hwom opupuchu Judah to chatle münchat. Pünpao tuita hia anyi boma owachu chatle münngui”

¹⁵Ma kakonubue mama baozangbu ang töbu koxle changkya awan ang kopkya lüka mixpabu pangwüi, ilaxle ikhama ajongle tüikya sheko mixnubu pangwüi, shuathongchi Ijip nok ma ngole tüikya Israel khünakbu chu womle: khünaknu huanuma athütlaxle: hwome ku ang thüi:

¹⁶“JOWANPA mün ma nange kwom füi akaxkya zangwün to mün-apale kwom angampu.

¹⁷Kwome moküihexle akaxkya pangwüi kwome moküi. Kwome Zangkangting Baozangchanu ang töbu koxüi, ilaxle she to kwome ju füi liüi; ija a kwome tamchu kwom pupa hwome, kwom wanghom hwom hia lompabue Judah tinglongbu ma tamchu Jerusalem tingjang lomnu to mokle hüikya ningle changüi. Ipongma kwom tüle ahak-aluale ngopu, ilaxle chem tingtui chitüile ngopu.

¹⁸Ikoxle kwome Zangkangting Baozangchanu ang tö koxkya hia ju thokle koxkya zakkya füi tomle kwom ang chemchu chitüile maxpu, ilaxle khünaknu a ochax-ozan hia woknuak-tilan ma zipu.”

¹⁹Ilaxle shekobue chizakle akax: “Chemtue kwome Zangkangting Baozangchanu ningle anbu zingpuix, ilaxle she hato tö apüile kox ilaxle ju thokle wanuale changpuix, kwom kakobue kwome mokkya mwot müihule le achuakpu.”

²⁰Ilaxle kue ku kax to ile lankya lüka hia sheko, ibu pangwüi füi akaxpu,

²¹“Hünzome tamchu hünpu hünpa hwome, hünzom wanghom hwom hia lompabue tamchu khünaknue Judah tinglongbu hia Jerusalem tingjang lomnu to töbu koxkya: ibu a JOWANPAe awanle münngo tamchu alakle awütdaoale hünzome thütdaicha?

²²Anyixkha hünzom haxtok a pünle ama thomdaoa ilaxle ikhato owachu münngo. JOWANPAe hünzom chichang-chizangkya hia ochax mwotbu füi adu ang chithokya tokhange, ija a mikngün zongma za-adünkya tuita ang changdaoa, ilaxle khünaknue ija mün a othuak-ozom lom ma lünle.

²³JOWANPA kaxtombu kax ma chilaxle hünzome chix zongto ochax lyen ilaxle mama baozangbu ang töbu koxle changkya khoma athaxkya thama-thomshix hünzom hato hüipu.”

²⁴Kue khünaknu pangwüi füi, tamnüile chu shekobu füi, JOWANPA, Israel nok Khüthak Zang-e Ijip nok to ngole tüikya Judah khünaknu füi akaxkya ija kax akax: “Hünzome tamchu hünzom kakobue Zangkangting Baozangchanu füi tsaotsütle changdaoa. She hato töbu apüile kox angkya tamchu she to ju füi uale li angkya hünzome tsaosax, ilaxle hünzome ija ningle mokle hüi. Müihule! Hünzom tsaotsüt chiamale thomlax! Hünzom kaxtsao mokle lelax!

²⁶Ikoxle athax a, Ijip nok to ngole tüikya Israel nok pangnusa füi JOWANPA, kue Khüthak Zang mün ma tsaotsütkya to apale koplax: Athax makhange otuechu, ‘JOWANPA Khüthak Zang mün ma ku tsaopu’ le tsaotsüt angkya hanpakma ku mün owa angchu lün ang müntom.

²⁷Ija bama hünzom ahak-aluale chichang angkya ikoxle thama ma maxle max angkya to kue huüi. Ochax-ozan ma chichangba okak-olak ma, hünzom opupuchu ota chitoxle, pangwüi zi angkya changle.

²⁸Ikoxlechu hünzom kha angkya züizüi chizile azang paoüi ilaxle Ijip tokya Judah to chat ang kopüi. Ifüima chizile azangkyabue ku kax changle ngaipia hia hwom kax changle ngaipuix, ija awan ang kopüi.

²⁹Kue hünzom to ikhama sikangün angkya tamchu hünzom hato kue thomshix-thama ahüi angkya ku kaxtsao, ibu otsing ang achangle angai angkya bama JOWANPA, kue ahole kox angkya changpu.

³⁰Kue Ijip nok wanghompa Hofra a chix langsele tungle ngokya chix zanpabu chak to koxüi; ija a Judah nok wanghompa Zedekiah, chix langsele tungle ngokya chix zanpa Babilon nok wanghompa Nebukadnezar chak to koxle apaokya ningle changüi.”