Read Wancho Naga Jeremia 48 Bible Online

Jeremia 48 - Wancho Naga bible

Jeremia 48

¹Ija a Moab bama JOWANPA Khüthak Zang-e akaxkya kax: “Nebo khünaknu to chingchahu a— hwom tinglong a amadaoa! Kiriathaim a kopdaoa, shingmongkya hwom zanhunuibu pünle awütdaoa, ilaxle ija angkya khünaknu ang zak-akople;

²Moab sün jo müikya a paodaoa. Heshbon a zanpae kopdaoa ilaxle Moab nok amüt angkya huxtsing-loptsang mwot mokle. Madmen angkya tinglong a adangüi; süpahibu a ija zan to kaüi.

³Horonaim angkya khünaknu akhong: ‘Chakmok-janlang! Thama-thomshix!’

⁴“Moab a amadaoa; naosombu sopkya zing to apalax.

⁵Hwom asutle sopkya zing apalax Luhith to dongüi lomjang fole a, mongsik-ngünle sopkya zing Horonaim to juüi lomjang fole a.

⁶Hwome thüi: ‘Momlax, nang khang azang ang ziklax! Sak-hax tokya fao mantsak ningle ziklax!’

⁷“Moab, nange nang tsak-zong hia nang ma tüinangkya to mongongle, ikoxle athax a nang to ngaxchu lütlaxle kop angkya changle; nang baozang Kemosh a zanda ang pao angkya changle, chix füi tomle mamixbu hia zompu-zangpabu kople paoüi.

⁸Ija thama thoto tinglong tuita chu paole azangüi münchang; haxcha hia haxsha pangwüi amale toxüi. Ku, JOWANPAe akaxdaoa.

⁹Moab zukting longnu tuita küilax; ija a chwonle wüi ama angkya changle. Ija angkya tinglongbu a amale dantoxüi, ilaxle ikhato tamchatle owachu münngoüi.” (

¹⁰Künkox mongkoxle JOWANPA mwot chimokkyabu to thuakzomle changkox! Chang syet laxle mix chilangkya mix to thuakzomkox!)

¹¹JOWANPAe akax: “Moab a jento chem chaza angkya chitüile ngole hüidaoa ilaxle otuechu zanda ang kople münpaotox. Moab a othong naxsüi ang ajingle dan thomkya, pe ma lexlextaile chichangkya grepti-ju ningle changpu. Ija angkya oti chemtuechu chima, ilaxle othuithuima ija a tijongle ngo.

¹²“Ikhoma athaxpi, grepti-ju thokle awütkya ningle Moab thokle awüt tox angkya khünak ahüi angkya ku hanpak nguile hüidaoa. Hwome grepti-ju thua ibu ahuaüi ilaxle pe ibu akhixle awütüi.

¹³Ifüima Moab nok a hwom baozang Kemosh füi zakkopüi, ija a hwome mongongle tüikya baozang füi Bethel ma Israel noke zakkopkya ningle changüi.

¹⁴“Moab angkya khünaknu, hünzome omalax ang naomüibu, zanhok ma wanle anodaokya mongchongkya süpahibu changpule omalax ang akax ngo?

¹⁵Moab hia ija tingnubu a amadaoa, ima tüikya sünmüi-jomakya naosünbu a langdaoa. Ku wanghompa, JOWANPA Khüthak Zang, ilaxle kue ija akaxdaoa.

¹⁶Moab max angkya hanpak nguile; ija ama angkya chwonle wüi hüingole.

¹⁷“Ija jat-li hanpakma mangsoplax, hünzom hozui ma ngole tüikyabu, ija münfua awanle ngokya hünzom pangwüi. Akaxkox, ‘Tüle tsak-zongle apün-awang ngokya ija janzüi madaoa; ija fuazang hia tho-lünkya athaxpi müntüi.’

¹⁸Hünzom Dibon ma ngokyabu, hünzom achuak-achenle tüikya ngwotnui tokya thailax ilaxle hax ma labu khato ngolax; Moab ama angkya mix ima tüile ilaxle ija angkya zanhunuibu amale toxdaoa.

¹⁹Hünzom Aroar ma ngokyabu, lomnu ma ajongle tanle nuilax; zile paokya khünakbu ma atüilax, chempangle changpuix ija hwom makhange tikle laxlax.

²⁰Hwome lanüi, ‘Moab a nguakdaoa, ija bama soplax; ija a zakkop changpu. Arnon Shuanu fole tsing ang laxkox Moab pi amadaoa, le a!’

²¹“Haxnucha ma tüikya tingnu Holon, Jahzah, Mefath,

²²Dibon, Nebo, Beth Diblathaim,

²³Kiriathaim, Bethgamul, Bethmeon,

²⁴Kerioth, ilaxle Bozrah, ibu hato kaxfün hüidaoa. Moab angkya tingnu, tsailo hia nuisox to tüikyabu pangnu hato kaxfün a hüidaoa.

²⁵Moab a thule akhündao angpu; ija tsak-zong a ama daotüi angpu, JOWANPA, kue ija akaxdaoa.”

²⁶JOWANPAe akax: “Moab to jutok ang laxkox, chemthüikoxle ijae ku zongto chichangle tüidaoa. Moab a ma fat dingma alüile atüiüi, ilaxle khünaknue ija chanyile changüi.

²⁷Moab, nange Israel nok cha chemle nyikya dai texle atakcha? Nange hwom to ahuxmixbu kopkya to hwonkya lailaile hwondaoa.

²⁸“Hünzom Moab ma ngole tüikya khünaknu, hünzom tinglongbu dantox dao! Paolax ilaxle longzakzyenbu to ngolax! Longtsyentua to ozop zingkya osu-sa ningle ngolax.

²⁹Moab a müimamale ngamle! Ibu khünakbu chemtukux ngamle, künngam-mongngame awangle, tamchu mixdyen-mixlale tüipuix, hwome hwom hanpakma alüile chemtukux ajangtüipuix, ibu kue atatle hüidaoa.

³⁰Hwom künngam-mongngam bama JOWANPA ku jaoe awanle ngole. Hwom tsaichong-kaxbongkya ma chemchu müntüi, ilaxle hwome mokkya mwot tsünlole münngo.

³¹Ikhoma ku a Moab hia Kir Heres angkya khünaknu pangnusa hanpakma sop angkya changle.

³²Jazar angkya khünaknu to kaile Sibmah angkya khünaknu hanpakma ku sop angkya changle. Sibmah tingnu, nang a Omang Tinu akailaxle Jazar alople fuale paokya grep zu tuita ningle changle. Ikoxle athax a tsonu ma ziakkya nang ziak ilaxle nang grep a amadaoa.

³³Haxzao füikya Moab haxtok angkya mongmüi-pwonla a paodaoa. Grep-ti fyetnui tokhange grepti-ju jenle jukya kue azakdaoa; grepti-ju fyet laxle mongmüi-pwonla tungle akhong-akha angkya mix athax owachu müntüi.

³⁴“Heshbon hia Elialeh angkya khünaknu akhong,, ilaxle hwom akhongkya ozing a Jahaz alople; ija a Zoar angkya khünaknue atat ang kople, ilaxle ija a Horonaim hia Eglath Shelishijah alople jao atat ang kople. Mimrim shuasa ngaxchu wüi zople paole.

³⁵Moab noke zokle ashunkya töbu koxkya hia hwom zangshwom nuibu tokhange hwom baozangbu ang tö koxle changkyabu kue azaküi. Ku, JOWANPAe ija akaxdaoa.

³⁶“Owawae thuaput-waxmai angaole mangtsakya ningle Moab nok hia Kir Heres angkya khünaknu hanpakma ku mong sople, chemthüikoxle hwom ma tüipupu komle amütdaoa.

³⁷Hwom pangnusae wüi khosex ilaxle kaxmaimun ongle changdaoa. Hwom pangnusae wüi chakbu to zütle changdaoa ilaxle nyikhwonbu apongle changdaoa.

³⁸Moab nok pangnu homkho to tamchu tingkhua fa to mangsopkya boma chemchu müntüi, chemthüikoxle Moab a kue, owaechu laxse chitsukya tikkux ashixkya ningle ashix daokoxa.

³⁹Moab a ashixle awütdaoa! Akhongle soplax! Moab-e zakkop ang tomdaoa. Ija a pünle ama thomle, ilaxle tomzi nokbue ija chanyile. Ku, JOWANPAe ija akaxdaoa.”

⁴⁰Ozang pünlaxle olae shingkya ningle onok tuitae Moab to shing angkya JOWANPAe tsaodaoa,

⁴¹ilaxle ibue tinglongbu hia zanhunuibu hwople kopüi. Ija nyix a Moab nok süpahibu a nao ngün pongma shekonu tuita monghik ma hixüi.

⁴²Moab a amütüi ilaxle ojat-oli tuitale chingoüi, chemthüikoxle ijae ku zongto chisumüile tüidaoa.

⁴³Tuma-wanshix, tsün hia taibue Moab nok tanle ngole. JOWANPAe akaxdaoa.

⁴⁴Tuma-wanshix thoto paole azang ang azongkya khünak a tswon to dütüi, ilaxle tswomkha tokya laile paokya mix a tai ma manüi, chemthüikoxle JOWANPAe ile Moab nok amüt angkya hanpak zanghan tyale changdaoa.

⁴⁵Chingcha ashukkya pünpaobue Heshbon ma khangkhom angkya onui lom. Ija a kaitanto wanghompa Sihon-e tam apünle toxdaokya tingnu, ikoxle athax ija a wünchua khato tüi. Azan ang mongtsule ngokya Moab nok haxnukhobu hia tomzi longzibu wünkha to shundaoa.

⁴⁶Moab nok to chingchahu a! Kemosh to shwom-töle ngokya khünaknu amütdaoa, ilaxle hwom sasün hia sacha hwom a zanda ang koplaxle paodaoa.

⁴⁷Ikoxlechu athax füichima Moab nok a JOWANPAe tamchatle ahak-alua ang tomüi. Ibu chempang JOWANPAe akaxle changdaopuix, ibu pangwüi Moab noke apongle hüi angkya changpu.