Read Wancho Naga Jeremia 5 Bible Online

Jeremia 5 - Wancho Naga bible

Jeremia 5

¹Jerusalem angkya khünaknu, hünzom tingjang lomnubu fole ziklax! Akhople hulax! Ma hanpakpak to hulax! Thalex-juatai nuibu lomlax! Sukya mwot mokle tüikya mix tamchu Zang to mongong shingmongle ngo ang azongkya mix khünak tuita ngaxchu hünzome atat ang cha? Hünzome atakle jangtsuak, JOWANPAe Jerusalem thaikya alaküi.

²Hünzome JOWANPA to shwompule akaxkoxle chu, hünzome ija kaxwa akax wüi.

³JOWANPAe otsing tomtata ma mongong tüikya mix lompu. Chixe hünzom to hongpu, ikoxle hünzome ojao nakhwop chikex; chixe hünzom zutle akhixpu, ikoxlechu hünzome awanle münkoppu le angam. Hünzom ang mong-khüi ilaxle ochaxbu tokya hünzom mong münchatpule na tüt.

⁴Ifüima kue ajang: “Ibu a mixshix-zasa hia chemchu chitsingkyabu changle. Hwome ongat ningle mok-mole; hwom Zang-e lomkya hwome chemchu chitik, JOWANPAe hwom amokse tsukyabu a.

⁵Khünaknu hato ku tsak-zong füi paoüi ilaxle hwom füi zangwünüi. Hwom Zang-e lomkya hwome tütakoxchu awanle ngole, JOWANPAe hwome naxmoksele thütkyabu.” Ikoxlechu hwom pangnusae JOWANPAe apün-adakya chilaxle awütle ilaxle chix kax ma münlaxpule angamle.

⁶Ikhoma faokha tokya mailang tuitae hwom langüi, faokha tokya shwonbue hwom ashikle akhixüi, ilaxle fuachaxbu hwom tinglong afünle leüi. Khünak ibu kotok to laile jangchang, hwom a ashikle akhixüi chemthüikoxle hwom ochaxbu a huanu changle ilaxle onoxnox to hwome Zang hato tok ahole.

⁷JOWANPAe atüi: “Kue ku khünaknu thaikya ochaxbu chemkhoma alak angkya? Hwome ku chilaxle dantoxpu ilaxle changjao chichangkya baozangbu to hwome shwompu. Kue hwom ang wok afwotle machang machangle ku khünaknu tuxpu, ikoxlechu hwome chinunchakkaile changpu ilaxle hwom hanpakbu a tsangtsa hangkyabu füi alyetpu.

⁸Hwom a wok afwotle tuxle thomkya huanuma mongzok füikya manbu lailaile, hwom pangnusae wüi ma tomzi kakonu to osingle.

⁹Kue ibu khoma hwom to sikangünle tamchu onok to iningle olüix khomle münchangüi hia?

¹⁰Ku khünakbu grep haxtok züt ang kue zanpabu ahüiüi, ikoxle ibu komkaile oli thu angkya hanpakmale münchang. Kue hwom ang okangsasa tum angkya akaxüi, chemthüikoxle okang ibu a ku kux münchang.

¹¹Israel hia Judah khünaknue ku kho abakle hangle tsuakdaoa. Ku, JOWANPAe ija akaxdaoa.”

¹²JOWANPA khünakbue chix pongle chikop ilaxle akax: “Chixe chemli-chemlichu münmok.”

¹³Ajebu a chemchu münchang ikoxle zangwin nyitsong changpu ilaxle hwom ma JOWANPA tokhange hüikya kaxho chemchu müntüile hwome thüile. JOWANPA Khüthak Zang-e ku füi akaxle thüi: “Jeremia, ibu khünakbue ile akaxkya khoma, kue ku kax a nang wikha ma wün ningle achangüi. Khünaknu a ha ningle changüi ilaxle ija wün füi hwom zokle ashunüi.”

¹⁵Israel khünaknu, JOWANPAe tsailo nok hünzom to sing ang ahüi ngole. Ija a kai wüikya tamchu tsak-zongle tüikya, hünzome hwom zangwün chitsingkya onok tuita changle.

¹⁶Sanhap füikya hwom süpahibu opange chingcha jao chitüile mix mik amütpuix, ibu a huanuma janzüi füi tüile.

¹⁷Ibue nang sax-tua hia sütling jokle joküi; hwome hünzom sasün hia sacha hwom langüi. Hwome hünzom chun hia maihu zyembu langüi ilaxle hünzom grep zu hia fupsa pünbu amale awütüi. Hünzom chalomle ngokya ziakople thomkya tingnubu a hwom süpahibue pünle amaüi.

¹⁸JOWANPAe thüi: “Ija tuke ngaxchu kue ku khünaknu komkaile olithu ang müntom.

¹⁹Kue ibu chemthüikoxle mokpuixle hwome atüikya zuma, chemle hwome ma haxtok ma ngolaxle ku hato tok aho ilaxle mixnok baozangbu to shwomle changpuix, ija lailaile ma haxtok chichangkya khato hwome mixnokbu thotha-manzaile chang angkya, Jeremia, nange hwom hama akaxkox.”

²⁰JOWANPAe akax: “Jakop su-sa hwom ang akaxle laxkox, Judah khünakbu ang akaxle laxkox:

²¹Na thale apalax, hünzom ongat-ongüi tamchu chemchu chitsingkyabu, hünzom ma mik tüipu ikoxlechu chingün, na tüipu ikoxlechu chiatat.

²²Ku a JOWANPA changle; hünzom a ku thua büthüikoxle chiza? Ku tunthoma hünzom büthüikoxle zale abünkya chitüipu? Kue otuechu chikai angkya jento ngo angkya tinu füikya longzi tuita a sak danpu. Tinu tüle-tüle achap lechu chang koxlax; ikoxlechu ija a tanle thomdaokya longzi akaile ija münchong; tichap huanuma azaxle chu chang koxlax, ikoxlechu ibue ija longzi mün ama.

²³Ikoxle hünzom khünaknu! Hünzom a mongkhüi tamchu zan-mong füikyabu; hünzom a ku dantoxlaxle mama chito jüile pao.

²⁴Kue tsosa zangwat hia watun zangwat ajo laxle zanglao foto otutu ma puamün ang tomkox ngaxchu, hünzom ku achuak-achen angkya mong ma otuechu texle chiatak.

²⁵Itülüi, hünzom ochaxbu khoma müikya oli ibu hünzome kop ang chitomle abaxle tüile.

²⁶“Ochax mwot mokle ngokya khünakbu hünzom khama ngole tüile; osabu aman ang nya thakya ningle hwome tanle ngole, ikoxle hwome ibu a khünak aman ang tsünkya changle.

²⁷O hap mix tuitae osa füi tsong awangkya ningle, hwome hwom homkha a tsui apüikya tuina füi awangdaoa. Ikhoma hwom ma tsak-zong tüile ilaxle ahak-aluale,

²⁸hwom a nutüna ilaxle zaoüna. Hwome mokkya ochax mwot ma chem othüt müntüi. Hwome zasa-khaxsabu ang süntswon münfa chichangba afangle thomkyabu hanpakma sukya tsaifün-kaxwün münfa.

²⁹“Ikoxlechu, ibu khokho ma kue hwom to sikangün angkya changle; ija nok to kue jannong alüile changüi.

³⁰Khomtsikya hia chabüt-lasün mwot haxtok ma changle hüidaoa:

³¹ajebue kaxthai zangwünkya boma chemchu münwün; nguapabue ajebu kaxtom ningle apünle, ilaxle ku khünakbue ija to münchangle chithüi. Ikoxle ibu pangwüi ashukle hüikya zuma hwome chemle thüithüi?”