Read Wancho Naga Jeremia 51 Bible Online

Jeremia 51 - Wancho Naga bible

Jeremia 51

¹JOWANPAe thüi: “Kue Babilon hia ima tüikya khünaknu zongto thama adün angkya zangchei ahüi ngopu.

²Zangwin to tsaxsa jeple paopu ningle Babilon amüt angkya hanpakma kue mixnokbu ahüiüi. Chemtue ija thama angkya nyix nguile hüipuix, hwome pangnu chitokhange singüi ilaxle haxtok a hingzang ngaxchu chipuakya kha ang dantoxüi.

³Ija angkya süpahibu ang hwom sanhap hap angkya chichangba hwom chang-hi-pax laxle achwon angkya chakba taxkox. Naosünbu danle taxtox! Hwom süpahi pangwüi amütdao!

⁴Hwom to mak-khaüi ilaxle hwom tingnu angkya tingjang lomnu to hwom ziüi.

⁵Israel nok Otsaopa, JOWANPA Khüthak Zang ku zongto ochax lyenle changdao koxchu kue Israel hia Judah a owüiole awütle chitox.

⁶Babilon angkya zikle paolax! Nang khang azang ang zikle paolax! Babilon nok ochax khoma mik max ang taxtom. Athax kue olüix khomle ngopu ilaxle koxkoxle asukya sikngün kue hwom ang koxle ngopu.

⁷Babilon a ku chak ma hun wansa tuita ningle, zangfang pangnu to tokle ngokya dai. Chaxwannu noke ija ju ling ilaxle hwom ang khangka samle pao.

⁸Babilon a allele nguakdaoa ilaxle ija a amütdaoa! Ija mang sopkox! Ija mak hanpakma hinghai apüikox, owatsing ija mak müile chu changtüilax.

⁹Ikhato ngokya mixnokbue thüi: ‘Kwome Babilon nok to fong ang azongpu, ikoxle tule le bangpu. Athax ija dantox hax ilaxle ma hom to chat-hax. Chixtsak chixzong ma JOWANPAe Babilon nok to sikangünle ilaxle ija olithule amütdaoa.’”

¹⁰JOWANPAe thüi: “Ku khünakbu akhong kox, ‘JOWANPAe kem a sule ngopule ahodaoa. JOWANPAe chempang mokdaopuix ija bama Jerusalem ma ngole tüikyabu hama apuahax.’”

¹¹Chixe Babilon nok amüt-sele tsukya khoma JOWANPAe Medi nok wanghombu to cheile amwop. Ijaningle chixe chix Zangshwom-Hom amakya olüix khom angkya changle. Zansing lompa-e kaxkox: “Hünzom changlobu wunle anax kox! Hünzom dibu achwonkox!

¹²Babilon nok pan-katuk to sing angkya mowan ahole laxkox. Nyetmixbu to mixbo laxkox! Nyetmixbu angwot kox! Zankat othom ziakople chang ang tomkox!” Babilon nok to moküihex-o lükya JOWANPAe chix mwot mokdaoa.

¹³Ija nok ma shuajenbu hia tuinabu huanuma tüile, ikoxle ija ang hanpak kaidaoa, ilaxle ija khüzün jakzi afündaoa.

¹⁴JOWANPA Khüthak Zang-e Babilon nok to sing angkya hanpakma khünaknu naxthwop ningle ahüiüi, ilaxle hwome zan to lütkya sungdünle akhongüi.

¹⁵JOWANPAe chaxwannu chix tsak-zong füi zing; chix je-hwon makhange haxwannu zingle alai ilaxle zangding pünle dan.

¹⁶Chix kaxtom ma zangdingkho tokya tibu lüixle achap; chixe zangfwombu haxtua-zangnam tokya apüi. Chixe zangwat pongma zangjang ajep ang tom ilaxle chix tüithün-nui tokya zangwin ajo.

¹⁷Ija ngünkya zuma, khünaknu ang ongat ningle jepale max; opange chapabu zingpuix ibue zakkop chemthüikoxle hwome zingkya baozangbu a othai tamchu hwom ma khüzün chitüi.

¹⁸Hwom ma laxli chitüi ilaxle ajao-ahaile chang angkya wüi; hwom füi asax-amok ang JOWANPA nguikya zuma hwom a amüt angkya changle.

¹⁹Jakop Zang a hwom lailaikya münchang; chix a jalinusa zingpupa changle, ilaxle chixe Israel a chix khünaknu ang zünle kopdaoa. JOWANPA Khüthak Zang a chix mün changle.

²⁰JOWANPAe thüile, “Babilon, nang a ku jantu changpu, azan pongma ku chang-hi-pax a. Kue nang a chaxwannu nok jat-li hia wangtingbu thuple akhix ang twonpu,

²¹man hia ibu ma ngakyabu olithu ang, man-kanlin hia ija zopkyabu tha ama ang,

²²sheko hia lükabu mik amüt ang, zunu-zupa hia naosom lang ang, lüka naosom hia sheko naosombu lang ang,

²³chunnyetmixbu hia hwom chunbu lang ang, manzaimixbu hia hwom manzaile koxkya manbu lang ang, apün-awangkyabu hia nguakax-wangkhobu zutle amüt ang.”

²⁴JOWANPAe thüi: “Jerusalem to hwome chichangchizangle chempang hwon daopuix ibu bama kue hwom to jannong alüikya hünzome ngünüi.

²⁵Babilon, nang a chaxwannu pangnu amütkya haxnu tuita ningle changle, ikoxlechu ku, JOWANPA a nang zanpa changpu. Kue nang to künle kopüi, kue nang a hax to anamüi, ilaxle lajuak ang achangle dantoxüi.

²⁶Nang maxkya ma womdaokya longtom tuita tamchatle zing angkya olom to twonüi münchang. Nang a othuithuima khünak chingokya tamting ang ngoüi. Ku, JOWANPAe ija akaxdaoa.

²⁷“Sing angkya mowan laxkox! Chaxwannu noke atatle nyazong mütkox! Chaxwannu nok Babilon füi azan ang achwonlax! Ararat, Minni, hia Ashkenaz wangtingbu füi sing angkya kax laxkox. Ija zansing lom azüi angkya lompa kamkox. Naxnu-naxlangbu ningle manbu apüikox.

²⁸Chaxwannu nok Babilon füi azan ang achwonkox. Medi nok wanghombu, hwom lompabu hia nguakax-wangkhobu, tamchu hwome ole thomkya onok tokya süpahibu se ang apaokox.

²⁹Chaxwan jaojao aloxle chemthüikoxle Babilon nok otuechu khünak chingokya tamting ang achang angkya ija mwot JOWANPA chix jaoe aziakya chang koxle.

³⁰Babilon nok lompabue azankya zak ilaxle hwom zanhunuibu ma ngole homle. Hwome ang monghixdaoa ilaxle khosam ashukle tüile. Tingnu zünkaibu a pünle adütdaoa, ilaxle homhaxbu a wünkha towüi.

³¹Pangnuchi tokhange tingnu pünle ama hüikya kaxho ang Babilon nok wanghompa hato kaxhomixbu ta füima tale zikle ngui.

³²Sai tale zan-nokbue chaxwan koptsuakdaoa ilaxle zanhunuibu to wünlangle changdaoa. Babilon nok süpahibu a abüt-abanle changdaoa.

³³Lebama wüi hwom a zanpabue hütle langüi ilaxle tsaxnak nui to tsax to nakpupule hwom to tingle akhün toxüi. Ku, JOWANPA, Israel nok Khüthak Zang-e ija akaxdaoa.”

³⁴Babilon nok wanghompa-e Jerusalem hütle lang ilaxle ija saxle awüt. Tikkux tuita ahuakya ningle chixe tingnu ahuale dan; baoma tuita ningle chixe ija jokle ling. Chix mong atsutsu chixe laxle pao ilaxle mamabu a tswonle awüt.

³⁵Zaion angkya khünaknue thüikox, “Kwom to chakmok janlangle changkya bama hünlit a Babilon noke naxlaxkox!” Jerusalem angkya khünaknue thüikox, “Kwome apongkya sikngün bama Babilon nok ma wüi tsaitox-kaxfele naxchang kox!”

³⁶Ilaxle JOWANPAe Jerusalem angkya khünaknu füi akax: “Hünzom zangwün otong kue kopüi ilaxle hünzom to chempangle hwondaopuix ija tsangmüt hünzom zanpabu ang thom ang tomüi. Kue Babilon nok angkya ti azopüi ilaxle ima tüikya shuajenbu zanle pao ang tomüi.

³⁷Ija haxtok a mixmüt tamting faomüibu ngwotnui ang achangüi. Ija a mikngün ma za-adünkya ang changüi; ikhato owachu münngoüi, ilaxle ija ngünkyabu pangwüi abütle changüi.

³⁸Babilon nok pangwüi mailang ningle ahungüi ilaxle chaxnu hosabu ningle akhwomüi.

³⁹Hwom nüfux füikyabu hia? Kue hwom hanpakma püntux ang achwonüi ilaxle hwom to jutokle mongmüi-pwonla ang tomüi. Hwom jipüi ija tamchatle chizoüi.

⁴⁰Kue hwom a, chun hosa, zwon hia chunla, ibu ningle lang ang laxlaxle paoüi. Ku. JOWANPAe ija akaxdaoa.”

⁴¹JOWANPAe Babilon bama akax: “Zangfange achuakle ngokya tingnu a zan chak to dongdaoa! Chaxwannu nok mikngün zongto Babilon a chemtukux khomtsikya ang changpuix!

⁴²Tinu a Babilon ding to ule hüile ilaxle ija to tinu-tichap füi chwopdaoa.

⁴³Tinglongbu a mikngün ma za-adünkya nui ang changdaoa ilaxle ibu a ti chitüikya sak-hax ningle changdaoa. Ikhato owachu münngo chichangba aham-atüile münchang.

⁴⁴Kue Babilon nok baozang Bel to sikangünüi, ilaxle chix angkya ahuxle apüikya tuinabu danle apao ang tomüi; ilaxle jatlibue chix to tamchatle münshwomüi. “Babilon pan-katukbu a nguakdaoa.

⁴⁵Israel khünaknu, ikha angkya zikle paolax! Ku mongtsik chak tokya nang khang khom ang zikle paolax.

⁴⁶Hünzome atatkya kax-hi-zangwin khoma hünzom ang mong taxhi chichangba taxza. Zanglao foto zangwün mali-mali atsatle wünle: haxtok ma chakmok-janlangle tüikya zangwün ilaxle wanghom tuita mama wanghom füi achax-azanle changkya zangwün.

⁴⁷Ikhoma Babilon nok chapabu to kue chakmok angkya tunu nguile hüingole. Onok pangwüi zakkop ang tomüi, ilaxle ija angkya khünakbu pangwüi langüi.

⁴⁸Shuakuxchi tokhange ija amüt ang nguikya khünakbu chak to chemtue Babilon nguile changpuix, ding-hi-hax ma tüikya jalinusa pangwüi mongmüile akhongüi.

⁴⁹Babilon noke zangfang pangnu khato khünak mik max ang tomle, ilaxle athax a hwome Israel nok huanuma amütle changdaokya khoma Babilon a nguak angkya hüipu. Ku, JOWANPAe ija akaxdaoa.”

⁵⁰Babilon ma tüikya chix khünaknu füi JOWANPAe akax: “Hünzom zihaxkux azangle hüidaoa! Athaxpi paolax! Tan-nyele taxngo! Hünzom hom makhange tsailo towüi chang koxlechu, ku, hünzom JOWANPA texle ataklax ilaxle Jerusalem texle ataklax.

⁵¹Hünzome thüitüi, ‘Kwom a thajao wünhaile chang ang tomdaoa; kwom a monghik ashukle tüile chemthüikoxle mixnokbue Zangshwom-Hom angkya otsao nuibu bakle kopdaoa.’

⁵²Ikhoma kue thüipu, kue Babilon nok chapabu to twon angkya hanpak zanghan nguile hüile, ilaxle thomzün-maklaxle changkyabu haxtoktok awangle awaole wotüi.

⁵³Babilon nok zangdingkho to dong ang tsuakkoxle chu, ikhato hwom zanhunuibu zing ang tsuakle changkoxchu, ija ama ang chuwüi kue khünak adünüi. Ku, JOWANPAe ija akaxdaoa.”

⁵⁴JOWANPAe thüile: “Babilon nok ma sopkya ozing apalax, hwom haxtok amakya khoma sopkya zing a.

⁵⁵Kue Babilon ama ngopu ilaxle ija adangpu. Tinu tichap lailaile süpahibu zutle nguile ilaxle sungdünle akhongkya füi ito single.

⁵⁶Hwom a Babilon ama ang nguikya changpu; ija angkya süpahibu a hwople kopdaoa, ilaxle hwom sanhapbu a amadaoa. Ku a ochax to sikangünkya Zang changpu, ilaxle Babilon to ijae lomkya ningle kue hwonüi.

⁵⁷Ija ma apün-awangkyabu to kue jutok ang tomüi— jetüi-hwonlangkya khünakbu, lompabu, ilaxle süpahibu, ibu pangwüi to. Hwom jipkya tamchatle zo ang müntom. Ku, wanghompa-e ija akaxdaoa; Ku a JOWANPA Khüthak Zang changle.

⁵⁸Pangnu to lütle ngokya Babilon tingnu pan-katukbu a hax to tswonle awütüi, ilaxle haxtsua-zangthakya ija zünkaibu zokle ashunüi. Chaxwannu noke mokkya mwot a chem angchu münchang; hwom azong-amongkya a wünkhut ang achangdaoa. Ku, JOWANPA Khüthak Zang-e ija akaxdaoa.”

⁵⁹Wanghompa Zedekiah chix huak wangshempa a Seraiah changkya. Chix a Neriah sasün ilaxle Mahseiah susün changkya. Judah ma Zedekiah wanghom ang achangkya zanglao ali lükya to, Seraiah a chix füi tomle Babilon to kale ngokya, ilaxle kue chix füi züizüi olom adangle fa.

⁶⁰Babilon nok hato ngui angkya thama bakle kue lai ma zale kop, ibomachu Babilon bama mama chuwüi zale kop.

⁶¹Kue Seraiah ang thüi: “Nang chemtue Babilon to nguiüihex, ikhama zale tüikya pangwüi khünaknu noke atatle akhongle pangwüi e angkya taxalak.

⁶²Ipongma zangjoplax, ‘JOWANPA, ikhama khünak hia müi, ozün zünmokbu chemchu chingole chang angkya hanpakma ija onui ama laxle jento tuita sak-hax ang achangle thom angkya nange akaxpu.’

⁶³Seraiah, chemtue nange khünaknu hato ija lai e-le ahokya ashuküihex, nange ija long ma adangle kha laxle Eufrat shuanu to tswonle awütkox

⁶⁴ilaxle thüikox, ‘Babilon nok to ija ningle changüi: ija ti to singüi ilaxle otuechu chatle chiajongüi chemthüikoxle JOWANPAe she hato iningkya thama ahüile ngole.’” Jeremia Kaxbu ima ashukle.