Read Wancho Naga Jeremia 52 Bible Online

Jeremia 52 - Wancho Naga bible

Jeremia 52

¹Chix Judah ma wanghom ang achang pongma Zedekiah a zangtsa büta changkya, ilaxle chixe Jerusalem ma zanglao bün-büta apün. Chix honu mün a Hamutal changkya, ilaxle she a Libnah tingnu ma ngokya Jeremia sacha changkya.

²Wanghompa Jehoiakim-e ochax lyenkya ningle wanghompa Zedekiah-e chuwüi JOWANPA zongto ochax lyen.

³Jerusalem hia Judah angkya khünaknu füi JOWANPA ang huanuma mongma ilaxle chixe hwom a chix mikngün ma ngokya sam ang tom. Zedekiah-e Babilon nok wanghompa Nebukadnezar füi alünle ajong,

⁴Zedekiah-e apünkya zanglao aku ma lyetjang bün lükya bün nyixkha Nebukadnezar nguilaxle Jerusalem tingtak. Hwome tingnu tokna ma hwom pom zaile kop, ilaxle ifüi apiale toknachi ma pan-katuk füi alyenle ziakop angkya akhople hax thokle lwon,

⁵ilaxle Zedekiah-e apünkya zanglao bün-büta nguikya kople ziakople thom.

⁶Ija zanglao ma anyi lükya lyetjang nyix aku to, tuinu-nuaknu ziama laxle khünaknu ang sax angkya süt chemchu chitüile changpongma,

⁷tingnu pan-katuk bakle pün. Tingnu a Babilon noke akhopkhakle nyele tüikoxchu, zangnak ma wüi süpahibu pangwüi paole azang. Hwom wanghom hwom tsawat lom makhange pao, pan-katuk anyi apongkya oba makhange laile pao, ilaxle Jordan haxsha chito laile pao.

⁸Ikoxlechu Babilon süpahibue wanghompa Zedekiah achuale zik, ilaxle Jeriko zui angkya haxsha ma chix kop, ilaxle chix süpahibu pangwüie chix danle tox.

⁹Zedekiah a wanghompa Nebukadnezar hato apüi. Ipongma chix a Hamath haxsüt angkya Riblah tingnu ma ngole tüikya. Ikhato Nebukadnezar-e chix mik amüt angkya kaxtsuak.

¹⁰Riblah ma Nebukadnezar-e hopa Zedekiah-e mikngün ma wüi-ole chix sasün langle awüt ilaxle chixe Judah nok alixachongbu chuwüi langle awüt.

¹¹Ifüima chixe Zedekiah mik lokle awüt ilaxle chix to janbüi füi aka üntoxle Babilon to kat. Chix zikya nyix kople Zedekiah a Babilon nok to kun ma ngole hüi.

¹²Wanghompa Nebukadnezar-e Babilon apünkya zanglao bün-aku lyetjang aga nyixbün lükya to, wanghompa zongto wangshem tüichong Nebuzaradan hia chix süpahi lompa, Jerusalem to nop.

¹³Chixe Zangshwom-Hom, wanghom homlo, ilaxle Jerusalem angkya okho-olo hwom hom-hax pangwüi zokle ashun;

¹⁴ilaxle chix süpahibue tingnu pan-katukbu pünle adüt.

¹⁵Ifüima Nebuzaradan-e tingnu ma danle toxkya khünakbu pangwüi Babilon to kat. Ikhama mwot-süt mankya khünak Babilon nok hato tok ahokyabu pangwüi wom.

¹⁶Ikoxlechu chixe Judah ma züizüi zasa-khaxsabu danle tox; ibu ang haxtok-homting chemchu chitüi ilaxle chixe ibu ang grep tong mo angkya hia mama manzai mwotbu kox.

¹⁷Babilon nok bue Zangshwom-Hom ma tüikya khop thongkhobu hia man-kanlinbu thuple akhix; ikhama khop makhange zingkya tibomnu chuwüi wom, ilaxle khop pangwüi Babilon nok to pao.

¹⁸Hwome tö-tsap atsao ang twonkya haxhok kho hia wündix hok khuabu, wüntik dan ang twonkya tui-mwotbu, tö koxkya müibu aji kop ang twonkya khupbu, ilaxle khop makhange zingkya tüi chempang Zangshwom-Hom mwot to twonpuix, ibu pangwüi tsui pao.

¹⁹Hun chichangba khop makhange zingpupu tüi pangwüi hwome pao; khupsa ahixkya; wünhan-khik hok ang twonkya khuakhao, tö koxkya müi ajibu kop ang twonkya khupbu, labu dankya khua, wüntik lotsapbu, ongan müikya sobu zok ang twonkya khupbu, ilaxle grepti-ju thokle li ang twonkya khupbu, ibu pangwüi pao.

²⁰Khop makhange Solomon-e Zangshwom-Hom hanpakma zingkya tuinabu: thongkho anyi, man-kanlinbu, tibom chongkya, ilaxle ibu nole thomkya maihupong bün-anyi: ibu a tuak ma thüt ang huanuma lix.

²¹Thongkho anyi a malom-malom to tüikya: pangnyi wüi fit 27 tsuale tamchu otom ma fit 18 tüikya. Ija nyi a omong akhakhale tüikya ilaxle jan a chakpat azom tütle tüikya. Thongkho pangnyi ma wüi su 8 pong tsuale thongkho tuipong tüikya, ilaxle akhopkhakle saosa füi müile zingkya pomegrenet noksabue aza-apuale tüikya, ibu pangwüi khop füi zingle tüikya.

²³Pangnyi thongkho angkya saosa füi watle noksa zingkya mwot ma, pangnu athüt koxle 100 pomegrenet tüikya, ilaxle ibu kha angkya 96 a haxkha makhange ngün ang tsuakle tüikya.

²⁴Ija to bole, süpahi lompa Nebuzaradan-e Nguakho Seraiah, chix fang angkya nguapa Zefaniah, ilaxle mama Zangshwom-Hom ma alixachong hwom mixsün azom, le kople pao.

²⁵Tingnu angkya chixe zankat lompa khama alixachong, ilaxle ipong kople tingnu ma tüile asukya wanghompa huakpa wangshem hwom anüt, süpahi lompa to fongmix owa ang süpahibu bama laiza thom angkya hünlix koxle thomkyahex, ilaxle mama khütkhaxkhaxkya mixsün hwom puzom, ibibi koplaxle pao.

²⁶Nebuzaradan-e ibu Babilon nok wanghompa hato apüi. Ipongma wanghompa a Hamath haxsüt angkya

²⁷Riblah tingnu ma tüile asukya. Ikhato wanghompa-e hwom to fit-müile chang ilaxle langle awüt. Ile Judah angkya khünaknu a hwom haxtok angkya zanda ang koplaxle pao.

²⁸Ibibi a Nebukadnezar-e zanda ang kople paokya khünaknu mowün laiza ma thomkya changle: chix wanghom ang ngokya zanglao anüt to wanghompa-e 3, 023 khünak tsui pao;

²⁹chix wanghom ang ngokya zanglao bünba achyet to, Jerusalem angkya 832 khünak tswonle pao;

³⁰ilaxle chix wanghom ang ngokya zanglao tsaba azom to 745 khünak—Nebuzaradan-e tswonle pao. Pangnu athütle, 4, 600 khünaknu tswonle pao.

³¹Babilon nok ma Ewil-merodak wanghom ang achangkya zanglao ma, chixe Judah nok wanghompa Jehoiakin hato chingcha aho kun tokya chix dokle alai. Jehoiakin zanda ang kople paokya zanglao 37 lyetbün anyi ma nyixtsa aga lükya to ija ile chang.

³²Ewil-merodak-e chix to chingchale hu ilaxle chix füi tomle Babilon nok ma zanda ang ngole tüikya mama-mama wanghombu to ataxle achuak-achenkya kox.

³³Ikhoma Jehoiakin ang chix kun khato ngopongma laxkya nyi-za lüi ang tom ilaxle chix tsüntsün ma wanghom tsap ma wanghompa füi tomle saxlingle ngo ang tom.

³⁴Chix ozün ma ngokya kople nyixfokya to, chixe lax-twonle chang angkya chix chak-twon ngun-syen koxle hüi.