Read Wancho Naga Jeremia 6 Bible Online

Jeremia 6 - Wancho Naga bible

Jeremia 6

¹Benjamin khünakbu, ma khangkhom ang paolax! Jerusalem angkya paole azanglax! Tekoa ma nyazong mütle angaokox ilaxle Beth Hakarem ma münwan ahole wüntakkox. Thama hia olithu angkya shuakux chitokhange nguingole.

²Zaion tingnu a tuita osün müikya changle, ikoxle ija a pünle amadaoüi;

³wanghombue ikhato süpahibu füi tomle pom zaile ngoüi. Hwome tingnu akhople hwom nyihombu ajongüi, ilaxle hwom pangnusae ma mong atsutsu ma pom zaile athongüi.

⁴Hwome thüiüi: “Jerusalem tingtak ang achwonlax! Achwon-athalax! Keme tungto shene singüi!” Ikoxle hwome thüiüi: “Ija a müimamale shendaoa, athax hanhomle changüi khakha, ilaxle hansong chaxba ojang lole changdaoa.

⁵Keme zangnak ma tix singüi; keme tingnu angkya zanhunuibu pünle amaüi.”

⁶JOWANPA Khüthak Zang-e wanghom ibu ang pündak laxle Jerusalem tingnu hwople kop ang athünle zing angkya kaxkox. Chixe akax: “Kue ija tingnu to sikangünüi chemthüikoxle ikha a zothupmixbue awangle tüile.

⁷Tüküi tuitae ikha angkya ti tsaothale thomkya ningle, Jerusalem-e ma ochax tsaothale thomle. Changnong-pünthomkya zing hia pünle amakya zing tingnu ma kue atatle; okak-olak hia thomzün maklaxkya, ibubu ngün ang kople.

⁸Jerusalem angkya khünaknu, ija sikngün a hünzom khünzai angkya hanpak khünzai kax ang naxchang, ile chichang thüiningle kue nang danle awütüi; kue hünzom tingnu a tuita sak-hax ang achangüi, ikhato owachu münngoüi.”

⁹JOWANPA Khüthak Zang-e ku ang thüi: “Grep ziak bakle khaidaokya zu likpupule Israel nok a likle atsao angkya changpu. Idaile hanpak tüile ngopongma nange atsuaktsuak pangwüi sünle kop angkya changle.”

¹⁰Kue lan: “Kue hwom füi zangwünle ija kaxkhün koxkoxle ku kax to owae apaüi? Hwom mong huanuma khüile ilaxle nang kaxhobu to mün-apapu le angamle; nange ku füi chempang zangwün wünle fa angkya kaxle koxpuix, hwome ibu cha nyile.

¹¹JOWANPA, hwom füikya nang mongtsike ku to ngaxchu zokle, ilaxle athaxpi kue ija kople thom ang müntho.” Ifüima JOWANPAe ku ang thüi: “Ku mongtsik a tingjang lomnu tokya naosombu hia naocha-naosünbu asoxle ngokya ding to thokkox. Kakonu hia kakopabu a tswonle paoüi, azupi hia azupa hwom ngaxchu shanle müntox.

¹²Hwom hom-haxbu, hwom haxtok hia kakonubu chuwüi mix ang koxdaoüi. Ija haxtok angkya khünaknu to kue sikangün angkya changle.

¹³Khünak pangnusae, chongkya-hixkya noke, huxtsing-loptsang lom tokhange ngun-syen athün ang azongle; ile ajebu hia nguapabue ngaxchu wüi khünaknu dyenlale changle.

¹⁴Hwome ku khünaknu janthün a muale büizüikya man ningle ahole. Chemli chu müile chitüikya tuke, hwome pangwüi müile tüile le thüile.

¹⁵Ibu zakkop mwotbu moklaxle hwom azak zipia? Münchang, hwom ojao münazak; hwome azakle thünkhi angkya ngaxchu müntik. Idaile mix chemle nguakpuix iningle hwomchu nguak angkya changpu; chemtue kue hwom to sikangünüihex, hwom hanpakma oshuk ang ija changüi. JOWANPA, kue ija akaxdaoa.”

¹⁶JOWANPAe chix khünaknu füi akax: “Lompong ma ajonglax ilaxle hulax. Kaikya lomzang hia sümüikya lomtang bama atüilax. Ija ma ahamlax, ikoxle hünzom mongsom ma ngo ang kopüi.” Ikoxle hwome thüi: “Münchang, kwome ile münmoküi!”

¹⁷Ifüima kaxkhün fakya nyazong zing to apa angkya hanpakma JOWANPAe humixbu kam. Ikoxle hwome thüi: “Kwome ija to münapa.”

¹⁸Ikhoma JOWANPAe thüi: “Apakoplax, hünzom jat-libu, ilaxle ku khünakbu hato chempangle chang angkya hex awanle koplax.

¹⁹Apalax, Chaxwannu! Hwom mongjang mwot pangwüi ama angkya hanpakma kue ibu khünaknu hato thama apüiüi, chemthüikoxle hwome ku hwon-nwot pongle münkop ilaxle ku zangwünbu kax ma münlax.

²⁰Hwome ku hato Sheba tokya ongan müikya so apüile zokkya to, chichangba tsailo nok tokya suingan amüikyali apüikya to kue hume angkya chemtüi? Hwome koxkya töbu kue pongle münkop ilaxle hwome koxkya zokle ashunkyabu füi ku ang mong müiüi münchang.

²¹Ikhoma kue ibu khünak ang chikho thule nguak ang tomüi. Nu-pa hia su-sa hwom zile paoüi, ija lailaile zuikhui hia tomzi-longzibu chuwüi changüi.”

²²JOWANPAe akax: “Tsailo tokya khünakbu shuakuxchi nok tokhange azan ang achwonle hüile ngole.

²³Hwome hwom hapnu hia changlobu chak ma kopdaoa; hwom a chingchajaja chitüile shix-makyabu changle. Hwom mankho ma ngale changpongma ibu zing a tinu-tichap zing ningle tüile. Hwom a Jerusalem füi azan ang achwonle tüile.”

²⁴Jerusalem angkya khünakbue thüi: “Kwome kaxho atatdaoa, ilaxle kwom chakbu a ofai-oshok ang achangdaoa; kwom a sikngün-mongthange sheko tuita nao ngün wok-kake koppupule kople amütdaoa.

²⁵Kwom a tingtui-panja hia lomnu ma aham ang mong münchong tsuak, chemthüikoxle akhyep-adi laxle kwom zanpabu tha-nyemle tüile ilaxle thomshix-thamae kwom akhoplaxle tüile.”

²⁶JOWANPAe chix khünaknu füi akax: “Nyikhwon aponglax ilaxle haxbu khato wotlax. Nange tuita wüi tüikya nao zile paopongma chemle sopse hex ile mongmaxle sopkox, chemthüikoxle nang thomjo ang nguile ngokya mixe allele singüi.

²⁷Jeremia, nange kho-jan to wanle anokya ningle ku khünaknu to wanle anohu, ilaxle hwom chemningle tüipuix atak-hu.

²⁸Hwom a khop hia jan ningle tsakle tüikya mongwüi khüi tangtangle alün-aloxle tüikyabu changle. Hwom pangwüi khuafaole ahamkya hia za-amanle ngokya füi komkaile amadaoa.

²⁹Wün haxkhi-zangsumle tak, ikoxlechu jandixbu a chule chipao. Ku khünaknu achukle zing ang azong ngokya ma chem olüi müntüi, chemthüikoxle opang ochax-hex ibu a süile chiawüt.

³⁰Hwom ang chilaxli jandix le nyaküi, chemthüikoxle hwom a JOWANPA kue chilaxle awütdaoa.”