Read Wancho Naga Jeremia 7 Bible Online

Jeremia 7 - Wancho Naga bible

Jeremia 7

¹Judah khünakbu zangshwom ang nguile ngokya zünkai hato JOWANPAe ku apao. Chixe ku ang, JOWANPA, Israel nok Khüthak Zang-e hwom füi chem akaxse zangwün ija khuapule ima ajong angkya akax: “Hünzom ngole hüikya zanglom-saikha lüilax ilaxle mokle hüikya mwottho lüilax, ile jangchangba kue hünzom ikhama ngo ang tomüi.

⁴Hünzome: ‘Kwom to chem münthüi! Ija a JOWANPA Zangshwom-Homnu changle, ija a JOWANPA Zangshwom-Homnu chang, ija a JOWANPA Zangshwom-Homnu changle!’, le thüikya dyen-lakya zangwün to mongongkya zakdao.

⁵“Hünzom ngole hüikya olom lüilax ilaxle hünzome mokle ngokya mwotbu zaklax. Hünzome tata füi mapai-mixzünkya taxtüi.

⁶Pünpao, khaxsa hia zomnu hwom to adix-adakya zakün. Ija haxtok ma chemngax chichangkya khünakbu lang-huakle ngokya zakün. Mixnok baozangbu to shwomkya zakün, chemthüikoxle ijae hünzom olithuüi.

⁷Hünzome monglüile jangchang, kue hünpu hünpa hwom ang tsüntsün to hwom kux hex-ole koxkya ija haxtok ma hünzom ngo ang tomüi.

⁸“Hulax, dyenlale tox angkya zangwünbu to hünzome mongongle.

⁹Hünzome ahuxle, mix langle, chinunchakkaile, tsaosaxle kaxthai zang wünle, Bal ang töbu koxle, ilaxle amipongma hünzome chitikkya baozangbu to hünzome shwomle.

¹⁰Kue anukya mwot ibu hünzome mokle, ilaxle hünzom a ku ngwotnui, ku Zangshwom-Hom jaojao to nguilaxle ajongle üntoxle akax tsuakle: ‘Kwom to chem münthüi!’

¹¹Ku Zangshwom-Hom a ahuxmixbu azwon nui changpule hünzome thütpia? Hünzome chem mokpuix ija kue ngünle laxdaoa.

¹²Shiloh to paolax, owangpa ma zangshwom nui ang kue zünle kopkya tingnu changpu, ilaxle hulax, ku khünaknu Israel nok ochaxbu khoma kue ija tingnu to chemle hwonpuix.

¹³Hünzome ibu ochaxbu pangwüi mokle hüidaoa, ilaxle kue hünzome füi chatwüi chatle akax ngokoxchu, hünzome ija to mün-apapule angam. Kue hünzom se pongma hünzome chilan.

¹⁴Ikhoma kue chemle Shiloh to hwonpuix ija ningle, hünzome mongongle ngokya ku Zangshwom-Hom to kue hwonüi. Ijongkha oja kue hünpu-hünpa hwom ang tamchu hünzom ang koxle thompuix, itochu kue Shiloh to hwonpupule hwonüi.

¹⁵Kue hünzom füikya mamix, Israel khünaknu chemle jwonle apaopuix ilailaile ku miksho angkya hünzom jwonle apaoüi. Ija kax ku, JOWANPAe akaxdaoa.”

¹⁶JOWANPAe thüi: “Jeremia, khünak ibu hanpakma zangjople taxchang. Hwom mün ma taxsop tamchu zangjople taxchang; ku ma tsaiju-kaxjule taxchang, chemthüikoxle kue nang tsai nang kax to apaüi münchang.

¹⁷Judah tingnu hia Jerusalem tingjang lomnu to hwome chempangle mokle ngopuix ngüncha?

¹⁸Naosombue ha afox, mixpabue wüntak, ilaxle hwome baozangchanu le nyakkya baozang ang kox angkya hanpakma mixnu hwome an atswomle atsan. Hwome ku mong thomzünle chang angkya hanpakma mama baozangbu ang chuwüi ju apüile töbu kox.

¹⁹Ikoxle hwome mong amakya otsing tomtata ma ku changchami? Münchang, hwome hwom to alüile mak-khapu ilaxle alüile hwom hato wüi thünzak apüipu.

²⁰Ikhoma ku, JOWANPA Khüthak Zang-e za-adünkya ku mongtsik ija Zangshwom-Homnu ding ma thoküi. Kue ija khünakbu hia müibu ding ma tomwüi thokle adütüi, ilaxle pünzua hia tsaxsa-hikhabu pangwüi ding ma thoküi. Ku mongtsik a owaechu amüt ang chithokya wünnu ningle changüi.

²¹“Ku khünaknu, hünzome tö züizüi a tö-tsap ma komkaile zokle ashunpu, ilaxle züizüi a hünzom ang sax ang tompu. Ikoxle JOWANPA, kue akax ngokya a ija, hünzome ibu pangwüi sax ang tsuaküi.

²²Kue hünpu-hünpa hwom Ijip nok tokya apüi pongma, töbu zokle ashun angkya chichangba tütaningkya töchu chikox angkya kue hwom ang kaxtom koxpu.

²³Ikoxle kue hwom ang ku kax ma laxle tüi angkya kaxtom koxpu, ile ku hwom Zang ang ngo angkya hanpakma tamchu hwom a ku khünaknu ang ngo angkya hanpakma. Ilaxle kue hwom ang koxkya kax ningle hwom ngo angkya kue hwom füi akaxpu, ile chang koxle jalinusa hwom hanpakma ma omüimüi angwüi naxchang kox ang.

²⁴Ikoxlechu hwom ija kax ma chilax chichangba na thale chiapa. Itülüi, hwom mongkhüi hia ochax kün-mong ma chem mongkho dongpuix, ibibi ma hwome mokle hüipu. Ikhoma hwom fün süma-sümale male paopu.

²⁵Hünzom pupa hwom Ijip nok tokya laile paokya nyix makhange anyix kopkya mong ma hünzom hato kue ku da ajebu ahüile wüi ngopu.

²⁶Ikoxlechu khünak tuitata ngaxchu apakya hia nathakya chitüi. Itülüi thüikox, hünpu-hünpa hwom to kaile hünzom sisi mix mongkhüi tamchu alün-aloxle tüitüi.

²⁷“Ikhoma, Jeremia, nang ibu zangwün ku khünaknu füi akaxüi, ikoxlechu hwome nang kax to chiapaüi; nange hwom seüi ikoxle hwome nang kax to chilanüi.

²⁸Hwome JOWANPA hwom Zang kax ma chilaxle tüikya bama chichangba hwome apongkya sikngün makhange awanle lax angkya nange hwom hama akax angkya changle. Hwom zongto mongong tüikya a omang ang achangdaoa. Athax ija mo ojao wünle münngo.

²⁹“Soplax, Jerusalem angkya khünaknu; hünzom kho sexle awütdao. Haxkhobu to mangsop tsai ngaokox, chemthüikoxle, JOWANPA, ku ang mongtsikle ilaxle ku khünakbu chilaxle awütdaoa.

³⁰“Judah angkya khünakbue ochax mwot mokdaoa. Kue anukya chapabu hwome Zangshwom-Hom ma danle ilaxle ija chitsaokya ang achangdaoa.

³¹Hwome wünkha to zokle hwom sasün hia sacha hwom tö ang koxtsuak angkya kuxmale hwome Hinnom Haxsha ma Tofeth-e tö-tsap tuita zingle. Kue ija ile mok angkya hwom ang kaxtom chikox: ija ile chang angkya ku mongkho jaojao ma chidong.

³²Ikoxle ikha ang Hinnom Haxsha chichangba Tofeth chichangle Mixlangnui le nyak angkya tunu hüi angkya changle. Hwome ikhama khünak mangbu akhünüi chemthüikoxle ibu akhün angkya hanpakma mama onui chitüile changüi.

³³Khünak mangbu a fao osabu hia faomüibu hanpakma osüt ang changüi, ilaxle hwom to hule khuakhom angkya mix tuita chitüiüi.

³⁴Haxtok a sak-hax ang achangüi. Judah tingnubu hia Jerusalem tingjang lomnu to mongmüi-pwonlale tamchu mongmüi atungle tuiju-nasomle changkyabu ozing zak ang tomüi.