Read Wancho Naga Jeremia 9 Bible Online

Jeremia 9 - Wancho Naga bible

Jeremia 9

¹Ku khang a tüküi tuita namchang koxba, tamchu ku mik a mikfi tümik namchang koxba, zangnak zangngai ku sopngose dai langdaokyanu ku khünakbu hanpakma a.

²Sak-hax to ku ang ngwotnui tuita namtüikoxba ku khünaknu füi atsaile ku ikhato ngose dai. Hwom pangwüi mongong chitüikya khünakbu, mixkho hang ang mwopkya othom.

³Jento hwom a atse ang achwonle tüile; otsingtsing lüima wanlom chitokyabue haxtok apünle ngole. JOWANPAe thüile, “Ku khünakbue ochax mwot tuita füima tuitale mokle ilaxle hwome ku a hwom Zang changpule jao mün-e.”

⁴Ma zuikhuibu zongto pangnusasa wüi mik-hingle ngo angkya changpu, ilaxle haxnu-homsa to owaechu mongong angkya müntüi; chemthüikoxle mamixbu chuwüi pangwüi Jakop lailaile mix dyenle tüile, ilaxle pangnusasae wüi ma zuikhuibu ajao-ahaile changle.

⁵Hwom pangwüie ma zuikhuibu othai lom to alyetle, ilaxle opupuechu kaxtsing zang münwün; hwome hwom lebu ang atse angkya anole koxdaoa ilaxle hwome tsai ngaokya otuechu müntox. Hwome tata zongto tüikya mwot tuita füima tuitale mokle, ilaxle tamdyenkya füi lüile chat chuwüi dyenle. Chix khünakbue chix chilaxle awütkya JOWANPAe akaxle.

⁷Ile changkya khoma JOWANPA Khüthak Zang-e thüile, “Kue ku khünaknu jan atsao pupule atsaoüi ilaxle hwom to thwonle anoüi. Ku khünakbue ochax mwot mokdaoa— kue hwom to chemle mok angkya tamtüi?

⁸Hwom lebu a mik-amüt angkya sanjunbu ningle; hwome jento kaxthai zangzang wüi wün. Hwom pangwüie tomzibu füi zuikop zangzang wüi wünle, ikoxle ija hwome ibu hanpakma aman angkya kam thakya tuita changpu.

⁹Ibu khoma kue hwom sikangünle münchang puixnyi? Iningkya jat-libu to olüix khomle münchang puixnyi? Ku, JOWANPAe ija kax akaxdaoa.”

¹⁰Kue akaxpu: “Kue haxhuabu mang sople changüi ilaxle müitsomnuibu hanpakma mikfi ajenüi, chemthüikoxle ibu a zile zandaoa, athaxpi ibu akaile owachu münaham. Tsom-pom ahamkya zing ikhato münatat; fao osa hia fao müibu pangwüi paole samdaoa.”

¹¹JOWANPAe thüi: “Kue Jerusalem a pünle amadaokya tamting ang achangüi, hijanbu ngwotnui ang achangüi; Judah tingnubu a sak-hax ang achangüi, owachu chingokya onui tuita ang a.”

¹²Kue atüi: “JOWANPA, ija makhange khünak tuitale ang chikople chemkhomale ija haxtok awütpu ilaxle sak-hax bütale ozan ang achangpu? Ija bama tsingle tsuaktang jepa owa tüi? Hwome mix hama wüntsuak tangle nang ija bama owa hama zexdaoa?”

¹³JOWANPAe lan: “Kue hwom ang koxkya hwon-nwot ku khünakbue chilaxle changkya khoma ibu ile changpu. Hwome ku kax ma chilax chichangba kue akaxkya ningle hwome chimok.

¹⁴Itülüi, hwom pupa hwome hwom hama anwot-anole toxkya ningle hwom ang mongkhüi ilaxle Bal chapabu to mix shwom.

¹⁵Ikhoma, ku, JOWANPA Israel nok Khüthak Zang-e chemle moküihex apalax: Kue ku khünakbu a khaxkya pün sax ang koxüi ilaxle zik-hing ti ling ang tomüi.

¹⁶Hwome chu tamchu hwom pupa hwome ngaxchu chemtuechu atat ang chikopkya nok to kue hwom chiakle sam ang tomüi, ilaxle hwom komkaile amütle machang machangle kue hwom amüt ang süpahibu akatüi.”

¹⁷JOWANPA Khüthak Zang-e akax, “Chempang changle ngopuix ibu bama ajangle anolax! Mangsop mixbu sop ang ahyen lax, mangsop tsaibu ngaokya shekonu a.”

¹⁸Khünaknue thüi: “Kwom hanpakma mangsop tsai ngao angkya hwom ang kangmomlaxle thüikox, kwom mik ma mikfi ti jenle machang machangle, tamchu kwom mik-kaxbu sopkya mikfi tie awangle machang machangle.”

¹⁹Zaion ma sople akhongkyabu zing apalax: “Kem a amütdaoa! Kem ang komkaile zak akopdaoa! Keme kem haxtok dantox angkya wüi; kem hom-ham bakle atsundaoa.”

²⁰Kue thüi: Hünzom shekobue JOWANPA kaxzing to apalax, ilaxle chix zangwünbu to nathalax. Hünzom sacha hwom hama sop angkya anole laxkox, ilaxle hünzom zuikhuibu hama mangsop tsai ngao angkya anole laxkox.

²¹Kem thangmikbu makhange mik max angkya hüile ilaxle kem wanghom homlobu to nople; ijae naosombu tingjang lomnu to asexle awütle ilaxle hat-sütnui to naocha-naosünbu langle.

²²Mangbu a pangnukha to chiakle tüile, haxtok ma haxzao thokle athünpupule a, saxzüt mixbue zütle athop füima tokfüi to toxpu saxziak ningle, owaechu chitswonle saxtsang chiakle toxpupule a. JOWANPAe ku ang akax ang tomkya zangwün changle.

²³JOWANPAe thüi: “Jepa tuita chix hwon-je bama, longpa tuita chix tsak-zong bama, chichangba hakpa tuita chix ma tüinangkya bama, tsaichong-kaxbongle chitüi angkya oli.

²⁴Owawae tsaichong-kaxbongle tüise jangtsu, ibu hwome ku tsing-wankya bama tsaichong-kaxbongle chang ang tsuak, chemthüikoxle ku mongkün ma ojem münfün, ilaxle kue chem supuix tamchu chem changpuix ijatix mokpu. Ku mong amüi angkya mwotli a ibutix changpu. Ija a, JOWANPA, kue akaxdaoa.”

²⁵JOWANPAe akax: “Hwome ma kho sexle amoxlaxle ngokyabu. Ijip nok, Judah nok, Edom nok, Amon nok, Moab nok, ilaxle sak-hax tokya khünaknu to kue sikngün fa angkya hanpak nguile hüile.”