Read Wancho Naga Mansop 1 Bible Online

Mansop 1 - Wancho Naga bible

Mansop 1

¹Hanpak tuita ma khünake awangle tüikya Jerusalem, chemle wandangjale tüipuix! Hanpak tuita ma zangfange chathua zale tüikya, athax she a thanu ang changdaoa; Tingnubu khama sümüipupa a da tuita ang changdaoa.

²She a jamütungle sople apüi; she bwomzong to mikfi jenle ju. She üinu ozang hwom khama, she mong asom ang tuita ngaxchu chitüi. She füi nokmüile changkyabue she ale ilaxle athax a hwom pangwüi she zongto zan ang chang.

³Judah angkya khünaknu a chingcha ashukle dabu ang hwomkha angkya atsangle pao. Hwom a mixnok chaxwanbu to ngo, mamixle nyak angkya owa chitüikya nok to— Zanbue akhoplaxle, paole azang angkya olom jao chitüile.

⁴Otsao nazak nyix Zangshwom-Hom to zangshwom ang nguikya athaxpi khünak tuita chitüi. Ikhama tsai ngaole ngokya naochabu sikngün ma ngo, ilaxle nguapabu wotle awao angkya boma chemchu chitüi. Tingnu panja ahuasak, ilaxle Zaion a künduk-mongthang ma ngo.

⁵She zanpabue she to lüt; hwome ma tsak-zong füi she to künle kop. She huanu ochax khoma JOWANPAe she füi sikngün apong ang tom; She naosombu a koplaxle tsui pao.

⁶Jerusalem sünmüi a kaile toxdaokya zangwün ang achang. Hwom lompabu a woknuake lopkya müikhibu ningle, Hwom a müihap mixbu zantho to fütle paokya bama huanuma zongsho.

⁷Maxkya chifün ma she tata athax, Jerusalem-e she sünmüi-joma thütle atak. Chemtue she a zanpabu chak to dongpuix, she to asunle fa angkya mix tuita chitüi; She to anaokya zuma lütkyabue she chanyile wanjai.

⁸She achuak-achenkya paodaoa; she a tomhua ma ilaxle mongtextex ma nutnuile. She awao ilaxle azakle thün khom. Jerusalem-e khomtsikya ochaxbu füi she alüile zakkop ang tom.

⁹She chitsaokya ochwon ma ngünle lax, ikoxle she shoma hanpakma she to ojao chikak. She asongle dütkya a khomtsikya tuita; owaechu she joxle amüi ang chitho. She zanpabue lütdaoa, ilaxle she a JOWANPA ma chingcha jule akhong.

¹⁰Zanpabue she tuina komkaile pale pao. She hwom a Zangshwom-Hom jao to nopüi ngün, JOWANPAe ikhato mixnokbu a chiadün angkya kax tüikya.

¹¹She khünaknue hidaole ngaxchu sax angkya süt tüichale lom pongma awao; Hwom ozün ma thom angkya kux male hwome ma tuinabu osüt-oling füi alüix. Tingnu akhong: “JOWANPAe ku max-samle ngokya chifün to huhüi.”

¹²“Ku to hulax!”, le-zyenüi khünakbu pangwüi füi akaxle she akhong: “Ku to kakkya ningle owa tochu makak tox, Chix mongtsik pongma JOWANPAe ku hato ahüikya okak a.

¹³“Chixe thakchi tokya wün ajole, ija wüne ku mongkha ashunle. Chixe ku hanpakma kam tha ilaxle ku haxkha to ahüi. Ifüima chixe ku danle tox ilaxle ku a jento tsütle kakkya füi ngo.

¹⁴“Chixe ku ochax pangwüi akhi-atak ilaxle ibu pangwüi tuita ma athop; Chixe ibu ku dingkux ma alikle kox, ilaxle ijae lixle ku ang zongsho. Jowanpa-e ku a ku zanpabu chak to kox, ilaxle ku hwom tuto chem angchu chichangle max.

¹⁵“Ku süpahi atsakkyabu cha Jowanpa nyi; Ku naosombu amüt ang chixe süpahibu akat. Grep-ti fyetkya nui to grep zutle asyep pupule chixe ku khünaknu zutle asyep.

¹⁶“Ikhoma ku mikbu a mikfie awangle tüile. Ku mong owaechu asomle fa ang müntho; owaechu ku mong achenle chichang. Zanpa ku to anaole changdaoa; ku khünaknu chak ma chemchu müntox.

¹⁷“Kue ku chakbu thüi: Ikoxlechu ku to owaechu münfongüi. JOWANPAe pangnu chitokya zanbu ku zan to ka ang se; Chilaxle tüi tuita ningle hwome ku ashikle akhix.

¹⁸“Ikoxlechu JOWANPA a sukya changle, chemthüikoxle kue chix kax ma chilax. Ku kax to apalax, khünaknue pangnu khato; ku tsütle kakle ngokya to hulax. Ku naosom sheko hia lüka pangwüi zanda ang kople paodaoa.

¹⁹“Ku füi nokmüima ngokyabu kue se, ikoxlechu hwome ku to fongse chitsu. Nguapabu hia lompabu tingjang lomnubu ma zi, Hwom azangle ngo angkya hanpakma sütlomngale a.

²⁰“Hulax, O JOWANPA, ku künmax-mongshan to, chasa ma ku chamax-muasamle changkya to! Ku mongkha a ku ochax bama mongmaxkya ma ashixle changdaoa. Tingjang lomnubu to mix langkyabu tüile; hommong khato ngaxchu mang tüile.

²¹“Apalax ku wotkya zing to; ku ang mong asomle fang angkya owachu chitüi. Nange ku hato thama ahüikya ngünlaxle ku zanpabu ang tüle mongmüile. Apüihüi nange tsaosaxkya nyix; ku sikngündaokya ningle ku zanpabu sikngün ang tomkox.

²²“Hwom chichang-chizangkya ochax pangnu khoma hwom thaile le ajaokox; Nange ku to ku ochaxbu khoma chemle sikangünle changdaopuix ija ningle hwom tochu sikangün kox. Ku mongmaxle awaopu, ilaxle ku a mongkha ma kakle.”