Read Wancho Naga Mansop 2 Bible Online

Mansop 2 - Wancho Naga bible

Mansop 2

¹Jowanpa-e chix mongtsik füi Zaion to zangnake chwop ang tomdaoa. Zangdingkho tokya ija sünmüi chixe oma ang achangdaoa. Chix mongtsikle mongmakya nyix chixe chix Zangshwom-Hom ngaxchu wüi dantoxle.

²Judah angkya tingkhua pangnu Jowanpa-e chingchingchichale amütdaoa Ilaxle haxtok khosele ngokya zanhunui pünle adütdaoa. Chixe wangting hia ija apünle ngokyabu hato thünkhux-thajao apüidaoa.

³Chix mongtsiktsik ma chixe Israel nok janzüi thule asumdaoa; Zan hüikya tuk ma chixe kwom to münfongle angam. Pangnusa amütle wün lailaile chix ang kem füi mongtsik.

⁴Zanpa to zipupule chixe chix sanhap kem to zi; Chempang kem mongmüi hia mongtex changkya hex ibu pangwüi chixe lang. Ija Jerusalem ma keme chix mongtsike zokkya okham awanle lax.

⁵Zanpa tuita ningle, Jowanpa-e Israel nok amütdaoa; Chixe she zanhunui hia chongwang homlobu ama toxdaoa. Chixe Judah angkya khünaknu hato chiashuk toxkya mongma ahüidaoa.

⁶Kwome chix to shwomle ngokya Zangshwom-Hom thuple akhix toxdaoa; Chixe Otsao nuikya nyix hia Sabath nyix hato oshuk ahüitoxdaoa. Wanghom hwom hia nguapabue taningle chix mongtsik janzüi apong ang tomdaoa.

⁷Jowanpa-e chix tö-tsap awüt ilaxle chix otsao Zangshwom-Hom chilaxle dantoxdaoa; Chixe zanpa ang ija pan-katuk pünle adüt ang kox. Kwome mongmüi atungle zangshwom ngokya nui ma hwome sungdün ngadongle akhong.

⁸Zaion angkya pan-katuk atsunle adüt angkya bamaJOWANPAe mongzangwünle tsuak; Ibu komkaile ama angkya kuxmale chixe ibu thütle tsuakle. Zanhu nui hia pan-katuk athaxpi tomwüile tsunle nguak ngo.

⁹Zünkaibu to pan-katuk tsunkyae sheple kop, ibu luapoxbu thuple akhix awüt. Wanghom hia pünlix-wangchong hwom a zanda ang koplaxle paole tüi. Wanlom anwot-anokya athax chitüi, ilaxle ajebu angJOWANPA tokhange kaxho hüikya chitüi.

¹⁰Jerusalem angkya zupabu hax ma dangjale thungle ngo, Hwom khangbu to haxbu fu ilaxle tsangtsa ma nyikhwon awunlaxle. Naochabu hwom khang haxchi to akhux.

¹¹Ku mikbu a sopkyakyae fingle tüile; ku chasa a chamax-muasamle tüile. Ku khünaknu maxkya bama mongmakyae ku na-juale maxdaoa. Süshix naosom hwom a tingjang lomnu to zakmaxle ngole.

¹²Woknuak hia tilan ma maxle, hwome honu hwom lomle sopngo; Hwom a thomzün-maklaxdao pupule tingjang lomnu to nguakle ngo, Ilaxle zaze-zazele hwom a honu hwom chak ma zile pao.

¹³O Jerusalem, ku mongkün Jerusalem, kue chemle wünthoüi? Kue chemle nang jox thoüi? Ija ningkya sikngün owaechu tüma-apong. Nang thama ma othüt chitüi tinukha lailai; monghom atak angkya olom ojao chitüi.

¹⁴Nang ajebue nang hama kaxthai zangwün boma mama kaxho angkya chitüi; Hwom hwon-nwote nang ochaxbu kotok to chialaile nang dyenle thom. Hwome nang ang künlop-monglüi angkya mwot müntüile ajang ang tom.

¹⁵Le-zyenüi khünaknue nang to khomtsile hu. Hwome hwom ngom akho-akhe ilaxle Jerusalem maxkya chanyi: Ija osün müikya tingnu changchami? Ija a chaxwannu mongngam changchami?

¹⁶Nang zanpa pangwüie nang wanjaile ilaxle nang to nushix dongle hule. Hwome tun apexle ajao: “Keme ija ama tsuakdaoa! Anyix ija a keme tanle hungokya hanpak changle!”

¹⁷JOWANPAe oshukma chixe moküile azakya mokdaoa: Chixe kem chingcha ojao chitüile amadaoa, kaitanto wüi chixe kaxkhün koxle thomdaokya ningle. Chixe kem zanpabu ang lütkya koxdaoa, kem nguakkya to hwom mongmüi ang tomdaoa.

¹⁸O Jerusalem, nang pan-katuke Jowanpa hato akhong kox! Nang mikfibu a zangnak zangngai shuajen ningle jen ang laxkox; Mangsopkya hia mongmaxkyae malailai to zoshunle changkox

¹⁹Chatwüichatle Jowanpa to nyak ang zangngaile zokox; Nang mong thokle laxkox ilaxle chix ang nang naosom to chingcha angkya chingcha jukox— Tingjang lomnu pangkha towüi woknuak ma zile ngokya naosombu to a!

²⁰Hulax, O JOWANPA! Nange kwom to ile büthüikoxle sikangün ngopu? Mixnu hwome mongkünle tüikya naosom hwom müi saxle ngole! Nguapabu hia ajebu a Zangshwom-Hom jaoma mik amütle.

²¹Naosom hia zunu-zupa tomwüile tingjang lomnubu to mang ma pangle tüile, Naocha hia naosün hwom, zan changlo fang ma lamkyabu a. Nang mongtsik nyix nange ojao chingcha chitüile ibu langle awüt.

²²Ku zui akhople faomüi ningle azang ma saxle awüt angkya thamae ku zui akhople chang angkya nange ahyen, Ilaxle ija nang mongtsik nyix owachu paole azang ang chitho. Hwome ku su-sa hwom lang, kue künkak mongkün füi tuxle atsünkya naosombu a.