Read Wancho Naga Mansop 3 Bible Online

Mansop 3 - Wancho Naga bible

Mansop 3

¹Ku a Zang-e chem sikngün fa angkya hex ija awankya mix changpu.

²Chixe ku süzu-süzule zangnak fangto jwonle apao

³Ilaxle ku to chatchatnaole chingcha jaojao chitüikya chaktom füi chiet.

⁴Chixe ku müi chaole ohing ma dantox, ilaxle chixe ku zabu apak.

⁵Küntsik-mongma ashukle ngo angkya kun khato chixe ku hakle thom.

⁶Otyatya ma ngo angkya zangnak hia zikmüt-mangkho fang to ngo angkya chixe ku atsang.

⁷Chixe ku to janbüi füi khale thom; ku a paole azangthoüile monghom ojao chitüikya kun ma thomkya mix tuita changle.

⁸Fong angkya mix lomle ku zongbakle akhong, ikoxlechu Zang-e ija to mün-apapule angam;

⁹Ku aham pongma khile hu; ku alele to long katuk füi tsyenle tüi.

¹⁰Chep tanpupule chixe ku tan; mailang ta ningle chixe ku to puix.

¹¹Lomnutang to chixe ku achua, ku ashikle akhix, ilaxle danle tox.

¹²Chixe hapnu dokle alai ilaxle chixe ku to san füi zi.

¹³Chixe chix sanbu ku tsangtsa to zule haple anop.

¹⁴Han ahomle khünaknue ku wanjaile nyi; hwom pangnu zongto ku a nyit-tong ang achang.

¹⁵Chixe ku ang sütling makhange zoshunle sikngün apong ang tom.

¹⁶Chixe hax to ku thünzut ilaxle longtok to zutle ku wa akhai.

¹⁷Tsangtsa fanmüile ngokya hia tumüi tamchu mongmüi-pwonla chem changkya dai kue alakdaoa.

¹⁸Ku ang tsünlole ngo angkya alüile müntüi; JOWANPA tokya ku monghom paodaoa.

¹⁹Ku to tsütle kakkya ajangkya, ku ang hom-hax chitüikya, ija a ku zongto khaxkya zik-hing ang changle.

²⁰Ku ija bama janchiabale ajang ngole, ilaxle ku chasa a mongmaxle changdaoa.

²¹Ikoxlechu kue ija oli tuita ajang pongma monghom tamchatle nguile:

²²Mong chiathokya JOWANPA mongkün chingcha otyatya wüi tüile,

²³Swomsa ma puakale tüikya ningle, atsingshokya zanghannu dün ningle.

²⁴Ku ma tüikya JOWANPA wüi, ikhoma kue chix ma ku monghom thompu.

²⁵Chix to mongongle tüikya pangnusa hanpakma JOWANPA a müikya changle,

²⁶Idaile thuakjokle tan angkya a kem zongto amüikya changle—kem khosün bama chix thatan angkya a—

²⁷Ilaxle ija thuakjokle adu ang awanle kop angkya a tsünzün ma tüipongkhae sümüi.

²⁸Chemtue keme sikngün apongpuix, kem a ma tata thuakjokle dangjale nui angkya changle;

²⁹Kem puile akhux angkya changle, owatsing monghom angkya athaxchu tüitüilax.

³⁰Fit-müile hia thajao wünhaile changbachu, ibu pangwüi keme pongle kop angkya oli changle.

³¹Jowanpa ma chingcha tüile ilaxle chixe kem othuithuima awütle münthom.

³²Chixe keme hato mongtsik-mongma apüi ang tsuak, ikoxlechu chixe kem to mongkünkya a chithai angkya tamchu tsak-zong changle.

³³Kem to mong amale hia kakle chang ang tomkya zuma chix ang mong münmüi.

³⁴Kem chasa kun khato zutle akhix thomkya Jowanpa-e awanle ngole;

³⁵Chixe kem ang fakya shomüi kem hato chiahüile changkya ma chixe awanle;

³⁶khwalo ma sukya kaxfün ajoajüile changpongma chixe awanle.

³⁷Jowanpa mongtex jento mokle alyetpu.

³⁸Müikya hia chimüikya tomwüile chix kaxtom ma chang ang tompu.

³⁹Kem ochax khoma kem to sikangünle changpongma keme büthüikoxle kaxthup-ngaotün angkya?

⁴⁰Keme kem lomtangbu ajangle anohax ilaxle JOWANPA hato chat-hax.

⁴¹Zangkangting tokya Jowanpa hato keme kem mongka daple koxhax ilaxle jop-hax:

⁴²“Kwome ochax lyendaoa ilaxle nang zan to kadaoa, ilaxle JOWANPA, nange kwom ang thailakkya chitüi.

⁴³“Nange kwom to achua ilaxle kwom langle awüt; nang mongtsike nang chingcha tukle thom,

⁴⁴Kwom zangjope akaile le ang chithole nang mongtsik zangfwom huanuma tüt.

⁴⁵Nange kwom a zangfang oma-oshix athünkya nui ang achang.

⁴⁶“Kwom zanpabu noke wüi kwom chanyile wanjai.

⁴⁷Kwom a thama-thomshix hia amale toxkya ziamong makhange le; kwom a thomzün ma hia zakya chifün ma ngo.

⁴⁸Ku khünaknu thama ngünkya zuma ku mikfiti shuajen ningle jenle ju.

⁴⁹“Ku mikfiti a ojen chifünkya shuasa ang achangle thokle jen

⁵⁰Zangkangting tokhange hulaxle JOWANPAe kwom ngünle machang tanto.

⁵¹Tingnu angkya shekobu to chempangle changpuix ibu ngünpongma ku mong huanuma ma.

⁵²“Ku to miktsak angkya opong chemchu chitüi khato zanpabue ku a kam ma o amanpupule aman.

⁵³Hwome ku ozün ma wüi tswomkha to tswonle awüt ilaxle longnu tuita füi hwome ija tswomkha ka hakle tox.

⁵⁴Ku to tie chwop ang süt, ilaxle athaxpi zipuale kue thüt.

⁵⁵“Tswom othong tokhange, O JOWANPA, kue nang to nyakle akhong.

⁵⁶Ilaxle ku sopkya zing atat angkya hanpakma kue chemtue nang ma chingcha jupuix, nange atatle lax.

⁵⁷Nange ku kax to lan ilaxle chiza angkya hanpakma ku füi akax.

⁵⁸“Jowanpa, nang a ku azün ang ngui ilaxle ku kho sünle kop.

⁵⁹Kuchi ma sele kaxfün fahüi; ku zongto thaile mokkya nange awan-ngopu.

⁶⁰Ku zanpabue ku to chemle miktsakpuix ilaxle hwome ku chemle tsünpuix ibu nange awan ngopu.

⁶¹“O JOWANPA, hwome ku ajao-adakya nange atatpu; hwome ku zan to kakya nange pangwüi tikle ngopu.

⁶²Han-ahomle hwome ku mo-mo wüi wünpu ilaxle ku zan to ka angkya mwottho zingpu.

⁶³Swomsa makhange hansong kople hwome ku ajao-adale changpu.

⁶⁴“O JOWANPA, hwome mokle tsuakdaokya bama hwom ang sikngün fakox;

⁶⁵Hwom to thuakzomle changkox ilaxle hwom a küntsik-mongmakyae awang ang tomkox!

⁶⁶Hwom lomle tsuakkox ilaxle chaxwan thün angkya hwom samle pao ang tomkox!”