Read Wancho Naga Mansop 4 Bible Online

Mansop 4 - Wancho Naga bible

Mansop 4

¹Jikjeple ngokya kwom hun bidaoa; Zangshwom-Hom angkya longbu tingjang to chiakle thomle.

²Zaion angkya naozün thom kem zongto hun büta thalix changkya dai, ikoxle athax ibu a zangjang haxtikbu tha ang changdaoa.

³Shwon honue ngaxchu hosa hwom apu-achangle, ikoxle ku khünaknu a ostris obu ningle, ma sa hwom zongto tüle shix-male.

⁴Hwome ma naosombu woknuak-tilan ma zi ang tomle; hwom ang owae ngaxchu chifa angkhato naosome süt jule ngole.

⁵Amipongma sütmüi-lingma saxlaxle ngokya khünakbu athax tingjang to woknuak ma zitüi; shix-shix-khaxle saxlax ngokyabu oma-oshix awütkya khato fyetle süt lomtüi.

⁶Sodom to ngaxchu kaile ku khünaknu to sikangün, ija khoma allele hwom a Zang chak fangma lam angkya hato ahüi.

⁷Kwom wanghomsabu a naklyen-khosyenle machangkyabu ilaxle jun büta tsaothale tüikyabu, nong-naxkya tamchu tsakle, otom süi-wüi-süile tüikya.

⁸Athax a ibu opupuhex ngaxchu chitikle hax to nguakle tüile, hwom thünbu a mangthün ang achangle naknakle; hwom tsangtsa khwon, pünzan ma zanle, zabu to khwople pixzuakle.

⁹Pongwang ma zan ma maxkyabu wüi ofüima zikyabu füi müikya ang chang, chemthüikoxle hwom a ma ozün ma thom angkya süt chitüi laxle zazele woknuake tix lang.

¹⁰Ku Khünaknu hato hüikya thama-thomshixe tüle khomtsi ang tom; mongkün honu hwome süt ang sax ang masu masa hwom müi song.

¹¹JOWANPAe chix mongtsik janzüi khak-kha atsok; chixe Zaion ma wüntak laxle ija labu ang achangle zokle ashun.

¹²Owaechu tütakhatochu, mixnok chaxwan apünkyabue ngaxchu, Jerusalem pan daple zandong ang tho angkya fang münchangle thütle ngokya.

¹³Ikoxlechu ija changle tsuak, chemthüikoxle she ma tüikya ajebue ochax lyen ilaxle nguapabue thaile mok, ija khokho male chemngax chichangkya khünaknu mik max.

¹⁴She lompabu tingjang lomnu to mikpwompabu ningle samle aham; owaechu hwom to twon ang chimüile aji khisumle a.

¹⁵Khünaknue akhong: “Paoün! Hünzom a akhudaoa!” Ikhoma hwom onok tuita angkya onok tuita to samle aham, owaechu hwom wünpwonle chikop.

¹⁶JOWANPA ma athaxpi hwom tokya chingchajaja ojao chitüi; chix-mixe hwom chiakle asam. Chixe kem nguapa hia lompa hwom to e-sekya ojao chitüi.

¹⁷Fongkya ojong tochu chiatak angkhato, kwome mik-hu ngwomle shule hu. Fongkya ojao chifa angkya khato kwome onok tuita to ngwomtokle hule tan.

¹⁸Zanpa tuitae kwom tanle ngo; kwom a tingjang lomnu to aham ang ngaxchu chitho. Kwom hingchak zanghan kaidaoa; athaxpi oshuk hüidaoa.

¹⁹Zangdingkho tokya lawang zangshop laxle jukya füi ngaxchu sütsexle momle hwome kwom achuale ajo. Haxnukho tokya hwom kwom mantole ju; hwome kwom to sak-hax ma allele shing.

²⁰Hwome kwom khüzün otong hwople kop, JOWANPAe zünle kopkya kwom wanghompa, pangnu zansing chak tokya kwom kho awa ang thoüile kwome chix to mongongle tüikya.

²¹Edom hia Uz nok, nyikox ilaxle mongmüi ang tsuakle tüipongma mongmüikox. Hünzom max angkya chuwüi nguingole; hünzom chuwüi tomhua ma zakkop-pale hule ajongüi.

²²Zaion-e she ochax tsang thomdaoa; JOWANPAe kwom tamchatle zanda ang thomüi münchang. Ikoxlechu Edom, JOWANPAe nang to sikngün koxüi; chixe nang thaikya mwot kotok to alaiüi.