Read Wancho Naga Mansop 5 Bible Online

Mansop 5 - Wancho Naga bible

Mansop 5

¹Texle ataklax, O JOWANPA, kwom to chemle pang changdao puix. Kwom to hulax, ilaxle kwom thünzak ngünlax.

²Kwom tuinabu a mixnokpa chak to tüile; kwom haxtok ma ngole tüikya mixnokpa chak to a.

³Kwom apa hwom a zanpae langdaoa, ilaxle athaxpi kwom anu hwom a thanu ang changdaoa.

⁴Kwome lingkya ti mün kwom kox angkya changle; kwome tak ang ha kwome shakle tak angkya changle.

⁵Mantsakbu hia utbu ningle atsangle jwonle, kwom a na-juale, ikoxle kwom nazak ang ngaxchu müntom.

⁶Ozün ma ngo angkya hanpakma okhonguile süt kop angkya, Kwome Ijip nok hia Asiria nok to jusax ang pao.

⁷Kwom pupa hwome ochax lyen, ikoxle athax hwom a chitüi, ikoxle kwom a hwom ochaxbu khoma sikngünle ngopu.

⁸Kwom lompabu a dabu tha ngaxchu münchang, ilaxle hwom tsak-zong chak tokya kwom owaechu azün ang müntho.

⁹Tingtui-panja to mix lang mix mixbu aham-atüile changle; kwom nuaklom ang aham pongma kwome ma khang hangle ahamle.

¹⁰Woknuake kwom tundün kak ang achangle ilaxle kwom tsangtsa khwon a fongbak tukuxle akhamle.

¹¹Kwom kakonubu to Zaion Haxnu ma jao shingnünle chang; Judah nok tingkhua pangnu khato wüi kwom sacha hwom to shingnünle chang.

¹²Kwom lompabu kople paolaxle afünle lang; kwom tüichong mixmüibu to ngaxchu chingchakya nox chitüi.

¹³Kwom naozün hwom ang da ang laxle saxthu ang tom; naosünbu a atsangle ha hün laxle wang ang tom.

¹⁴Azupa hwom tingnu zünkai ma athax a chithung, ilaxle tsünzünbue thuaput-waxmai mütle chichang.

¹⁵Kwom tsün angkya mongmüi paole sam; kwom azüizüitha ngokya lüi ma mongsop angkya hüi.

¹⁶Kwom mongngamle ngokya oli chemchu danle chitox. Kwome ochax lyen, ilaxle athax kwom a maxdaoa.

¹⁷Kwom ang mongtsang ma tsangle kakle ilaxle mikfitie tixle kwome ngün ang chitho,

¹⁸chemthüikoxle Zaion Haxnu owachu chitüile chix tata ngo, ilaxle ija maxkya tamting ma fao hijanbu akhwomle ahamle ngo.

¹⁹Ikoxle, O JOWANPA, nang a othuithuima wanghom changpu ilaxle chaxwan zanghan oshuk kople nange apünüi.

²⁰Nange kwom ipong okuilole chemkhoma awütle thom? Nange kwom chatle texle münatat puixnyi?

²¹Kwome nang hato chat ang tomüi, JOWANPA! Kwom chat ang tomhüi! Kaitantokya kwom fuazang achatle fahüi.

²²Chichangba nange kwom othuithuima awütdaopia? Nang mongtsik ma othüt müntüi hia büle?