Read Wancho Naga Ezekel 1 Bible Online

Ezekel 1 - Wancho Naga bible

Ezekel 1

¹Zanglao tsübün achyet angkya lyetjang ali to nyix aga lükya ma, Buzi sasün, nguapa Ezekel, ku a Judah nok zanda ang kople paokyabu füi tomle Babilon angkya Kebar Shuanu zui ma ngole tüikya. Zangdingkho kadap, ilaxle kue Zang mikngün-ohün tuita ngün. (

²Wanghompa Jehoiakin zanda ang kople paokya füima ija a aga lükya zanglao changkya.)

³Babilon nok to Kebar Shuanu zui ma, JOWANPAe ku füi zangwünkya kue atat, ilaxle ku ma chix tsak-zong nguikya kue awan.

⁴Kue angakle hu ikoxle shuakux chitokhange zangchei-cheinu tuita hüile ngokya ngünle lax. Chongkya zangfwom tokhange zangchang ajeple nyan, ilaxle ija akhople zangdingkho jik-jeple tüikya. Ija zangchang ajeple tüikya khama, khop-jan ningkya tütalie nyan.

⁵Inu zangtsak-zangdung osungkha ma khünak alele le ozün zünmokbu kue ngün,

⁶ikoxle hwom pangwüi ma okhang ali pong ilaxle ozang ali pongle tüikya.

⁷Hwom baozangbu a tangthole tüikya, ilaxle maihupong tuita ma tüikya lailaile hwom ma chisokbu tüikya. Ibu a khop-jan fwotle atsyenkya ningle nyan.

⁸Ibu hwom okhang ali hia ozang ali to obo ang, hwom pangwüi ma khünak chak ali, ozang tuita fang ma chak tuipongle zaile tüikya.

⁹Zünmok tuipong to ozang anyi pong pünle, tata füi zangza apongle tüikya, ijae hwom zongzongzüile tüikya. Chemtue hwom amokpuix, hwom othom ma tata tsangtsa to chipole tomwüi amok.

¹⁰Ibu zünmok ma mali-mali okhang ali pong tüikya: thüntho ma tuita khünak thünza ningle tuita, tsaxchi ma mailang thün lailaile tuita, maihupong thün lailaile nongchi ma tuita, ilaxle tokfüichi ma ola thün lailaile tuita.

¹¹Zünmok pangwüie ozang anyi pong a hozui ma tüikya mama zünmok zangza füi apongle nwonle tüikya, ilaxle mama ozang anyi pong a ma tsangtsa füi fole shople thom.

¹²Ibu zünmok pangwüi toktok apongle machi chito thün ahole tüikya, ikhoma hwom pangwüi alik-alople chichang homtoxle othom ma aham ang tsuak.

¹³Ibu zünmok khama wünnyan lailaikya tuita tüikya, ija a chizakle amok ngo. Wün khisumle lai ilaxle imakhange zangchangjep haple apao.

¹⁴Zünmok ibu a zangchangjep lailaile momle paotox chattoxle aham.

¹⁵Kue ibu zünmok ali to hule ngopongma, hwom pangwüi tang ma ocha tuipong-tuipong füikya chakan kue hax to thaikya ngün.

¹⁶Ocha ibu pangwüi talailaile tüikya; pangwüi mik-hu ma thalix long lailaile nyan, ilaxle ocha pangwüi ma tsaxchi zong füi asople mama ochabu tüikya.

¹⁷Ile changkox tix wüi ocha ibu a pangnu chito aham ang tsuak.

¹⁸Ocha angkya okanbu a mike awangle tüikya.

¹⁹Chemtue ija zünmok ahamle changpuix, ochabu chuwüi hwom füi tomle aham, ilaxle ibu zünmok haxkha tokya ding to dongle changpongma chuwüi ochabu azuile dong.

²⁰Zünmok ibu hwom paose atsutsu khato pao, ilaxle ochabu chuwüi zünmokbu füifüile azüi, chemthüikoxle ocha ibu a zünmok ibue akumathumle chang koxle.

²¹Ikhoma chemtue zünmok ibu ahampuix chichangba atongpuix chichangba zangwin to pile changpuix, ocha ibuechu ilailaile mok.

²²Ibu zünmok okhangbu khangkho ma fixfaxkya long makhange zingkya NOMLONGKANTUM lailaikya tuita tüikya.

²³Ija NOMLONGKANTUM fang ma ibu zünmokbu ajongle tüikya. Zünmok ibue ozang anyi pong a hozui ma tüikya mama zünmokbu füi zangza apongle pünle mathünthün to khung ilaxle mama ozang anyi füi a tsangtsa fole shople tompo to thom.

²⁴Ibu pikya zangzing kue atat; ibue pi pongma tinu-tichap ningle ozing alai, süpahibu othom mwopkya ningle azing, Khüthak Zang zangwün zingma azing. Pikya zakkya zuma hwome baozangbu shwom,

²⁵ikoxle hwom khangkho angkya NOMLONGKANTUM makhange chizakle ozing laile ngo.

²⁶Ija NOMLONGKANTUM dingma safir makhange zingkya lailaile chongwang tüntong tuita tüikya, ilaxle ija tüntong kho ma khünak lailaikya tuita thungle tüia.

²⁷Ngünkya zongma ija a wünsung khato khopjane nyankya lailaile tüikya. Ija pangnu khato wünzung füi nyanle zang angai,

²⁸ija zangngai ma nomlong ma tüikya zongbu pangwüi tüikya. Ija a JOWANPA womle tüikya zangzung changkya. Chemtue kue ija ngünle laxpuix, kue haxchi to thün ahole akhux. Ipongma kue kaxzing tuita atat,