Read Wancho Naga Ezekel 10 Bible Online

Ezekel 10 - Wancho Naga bible

Ezekel 10

¹Kue ozün zünmokbu khangkho ma tüikya zangdingkho to hu ikoxle ibu khangkho ma safir makhange zingkya lailaikya tüntong tuita ngün.

²Jaknyi awunlaxle tüikya khünak füi Zang-e akax: “Zünmokbu fang ma tüikya ochakanbu obamale-kox ilaxle nang chak ma awangle chuale ngokya wünhandix koplax. Ifüima ibu wünhandixbu a tingnu dingma chiakle awütkox.” Kue chix paoüi to hule ngo.

³Chix nople changpongma ozün ma tüikya zünmokbu a Zangshwom-Hom zongma shuathongchi ma ajongle tüikya, ilaxle hom mongkha a wünkhute awangle tüikya.

⁴Zünmokbu ding angkya JOWANPA womle tüikya wünnyan ajong ilaxle Zangshwom-Hom fülom to achex. Ipongma Zangshwom-Hom a wünkhute awang, ilaxle hom mongkha a wünzung to nyanle tüikya.

⁵Zünmokbu baozangbu makhange alaikya ozing a nuitho tokhange ngaxchu wüi atatle ang kop. Ija a Khüthak Zang zangwün zingma azing.

⁶Zünmokbu fang ma tüikya ochabu oba angkya wün tswonle kop angkya chemtue jaknyi awunlaxle tüikya khünak ang JOWANPAe kaxtom koxle changpuix, ija mixsün dong ilaxle ocha tuita zui ma ajong.

⁷Zünmokbu kha angkya müi tuitae hwom bama tüikya wünkha to chix chak thüi: wünhandixbu hidaole tswonle lax, ilaxle ibu a jaknyi awunlaxle tüikya mixsün chak ma dan. Ija mixsüne wünhandixbu lax ilaxle ikha angkya achexle pao.

⁸Hwom baozangbu fang ma tyale zünmokbu ma khünak chak lailaikyabu kue ngün.

⁹Ochakan ali talailaikyabu, zünmok zui ma tyale ocha tuipong tüikya kue ngün. Ocha a thalix long lailaile nyan, ilaxle hwom pangnu ma wüi tsaxchi cha adopkya khama apongle mama ocha tuipong kue ngün.

¹¹Chemtue zünmok ibu amokle changpuix, ibu azi-azople chichang homtoxle tangtho tangthole pao ang tho. Paose tsukya chito chiazikzop ngo homle tüta chito hex hwom tomtomle pao.

¹²Hwom tsangtsa, tokfüi, ochak, ozang, ilaxle ocha, ibu pangwüi to mike awangle tüikya.

¹³Kue ile nyakkya kaxzing tuita atat: “Anguikya ochabu.”

¹⁴Zünmok pangwüi ma othün ali pong tüikya. Pongwang angkya thün a maihupong lailaile tüikya, tuita a khünak thün lailaile tüikya, azom lükya thünza a mailang thün lailaile tüikya, ilaxle ali lükya thün a ola thün lailaile tüikya.

¹⁵(Ibu zünmokbu pangwüi kue Kedar Shuanu zui ma ngünkyakya wüi changkya.) Chemtue zünmok ibu dingkho to dong

¹⁶ilaxle ahamle changpuix, ochabu a hwom füi tomle pao. Chemtue hwome pi angle baozangbu pünle changpuix, ochabu chuwüi hwom füi tomwüile pao.

¹⁷Chemtue zünmok ibu zakpuix, ochabu chuwüi zak; ilaxle chemtue zünmok ibu pipuix, ochabu a hwom füi tomtomle pao, chemthüikoxle ibu a zünmokbue zopkya chang koxle.

¹⁸Ifüima JOWANPA womle tüikya wünnyan zangzunge Zangshwom-Hom fülom danle tox ilaxle ibu zünmokbu khangkho to thung ang ngui.

¹⁹Kue hule ngopongma wüi hwome baozangbu pün ilaxle chaxwan tok angkya pile dingkho to dong, ilaxle ochabu chuwüi hwom füi tomle dong. Hwom a Zangshwom-Hom handün chikao fülom ma zak, ilaxle fixfaxkya wünnyan hwom khangkho ma tüikya.

²⁰Ibu a kue Kebar Shuanu zui ma Israel nok Zang chitong ma ngünkya zünmokbu changle le kue tsinglelax ang kop.

²¹Hwom pangwüi ma othün ali pong tüikya, ozang ali pong tüikya, ilaxle ozang nam ma tyale khünak chak lailaile chak tuipong tüikya.

²²Hwom thünzabu a kue Kedar Shuanu zui ma ngünkya thünzabu lailaile tüikya. Zünmok pangwüi matangtang to küithole aham.