Read Wancho Naga Ezekel 11 Bible Online

Ezekel 11 - Wancho Naga bible

Ezekel 11

¹Zang chasae ku dingkho to nwonle dün ilaxle ku a Zangshwom-Hom handünchikao fülom to pao. Ekhato fülom zui ma kue khünak tsaba-aga ngün. Azzur sasün Jananiah hia Benaiah sasün Pelatiah nyi chuwüi ikhama tüikya. Okhi a onok lompa nyi changkya.

²Zang-e ku füi akax: “Ziün angkya khünak, khünak ibue chichang-chizangkya mwotlom zingle alaile ilaxle tingnu ma oma lom apuale koxle.

³Hwome thüile, ‘Keme homhaxbu tamchatle chwonle wüi zingüi. Tingnu a tuita suisong tik ningle, ilaxle kem a ija ma songkya müi ningle tüile, ikoxchutix ijae muale thüingaxchu wün chak tokya abaxle.’

⁴Athax a, ziün angkya khünak, ibu dantox dao.”

⁵JOWANPA chasae ku to akumathum, ilaxle JOWANPAe ija kaxho khünakbu hato apua angkya ku hama akax: “Israel khünaknu, hünzome chem akaxpuix tamchu chempang mwotlom zingle ngopuix kue awan ngopu.

⁶Nange ija tingnu ma khünak huanuma langdaoa ikhoma tingjang lomnu a mange awangle tüile.

⁷“Ikhoma ija a ku, JOWANPA Khüthak Zang-e nang füi akax ngokya kax changpu. Changle ija tingnu a tuita suisong tik a, ikoxle müi a chem? Mang ojapang nange langpuix, ibu changpu! Nang a ikhama münngoüi: kue nang a tingnu tokna to tswonle awütüi!

⁸Nang changlobu thua zapia? Kue nang to sing ang changlobu füi süpahibu apüiüi.

⁹Kue tingnu angkya nang paoüi ilaxle nang a mixnokbu chak to koxüi. Kue nang a mik max ang tom angkya zangwün tsuakdaoa,

¹⁰ilaxle hünzom nok ma nang a zanhok ma langüi. Ilaxle ku a JOWANPA changle le noknusae awan ang kopüi.

¹¹Suitike ima tüikya müi to wünle chai ang chitomle abaxkya ningle ija tingnue nang kho awale münkopüi. Israel haxtok ma nang ojong khato ngokoxchu kue nang to sikangün angkya changle.

¹²Nange ku a JOWANPA changle le awan ang kopüi ilaxle nange tomzi nok wanlombu olom tole ngopongma nange kaxtombu amale ku wanlombu hia kax ma chilaxkya ku ngopu.”

¹³Kue ajele ngopongma, Pelatiah nguakle zi. Kue thün haxchi to aho ilaxle akhong: “Münchang, JOWANPA Khüthak Zang! Israel nok ma danle toxkya pangwüi nange langüihi?”

¹⁴JOWANPAe ku füi akax,

¹⁵“Ziün angkya khünak, Jerusalem ma ngole tüikya khünakbue nang mo wünle ilaxle zanda ang ngole tüikya hünzom khünakbue wüi wünle. Hwome thüile, ‘Zanda ang ngokyabu a JOWANPA to shwom ang chimüile tsailo towüi. Chixe kem ang tingtok kop angkya koxdaoa.’

¹⁶“Athax a kue chem akaxpuix ija nang füi tomle zanda ang ngole tüikya nang üithobu hama akaxkox. Tsailo nok to ngo ang mix chaxwan to hwom chiakle afankya a ku changpu. Ikoxlechu jantakya hanpak bama hwom ngole tüikya nok to ku hwom füi womle ngoüi.

¹⁷“Idaile ku, JOWANPA Khüthak Zang-e hwom füi akaxle ngokya kax hwom hama apuakox. Hwom chiakle asam thomkya haxtok tokya kue hwom asox-asüiüi, ilaxle Israel haxtok kue hwom ang wüi achatle koxüi.

¹⁸Chemtue hwom chatle chatüihex, hwome hwom thoma abangbang, chisumüikya hia zakkop chapabu füi asax-amokle münchang angkya oli.

¹⁹Kue hwom ang künzün mongzün koxüi. Kue hwom ma tüikya kax ma chilaxle tsakle tüikya long kün-mong awütle koxüi ilaxle kax ma laxkya künmong koxüi.

²⁰Ifüima hwome ku wanlombu thomüi ilaxle ku kaxtombu kax ma laxle tüiüi. Hwom a ku khünakbu ang changüi, ilaxle ku a hwom Zang ang changüi.

²¹Ikoxle chisumüikya, zakkop chapabu to shwomkya to mongkünkya khünakbu to kue sikangünüi. Hwome chem mokdaopuix ija khoma kue hwom to sikangünüi.” JOWANPA Khüthak Zang-e ija akaxdaoa.

²²Ozün zünmokbu ibu pi ang süt, ilaxle ochabu chuwüi hwom füi tomle pao. Zang womle tüikya fixfaxkya zangngai a hwom khangkho ma tüikya.

²³Ifüima ija fixfaxkya zangngaie tingnu dantox ilaxle handünchi ma tüikya haxhua to pao.

²⁴Mikngün-ohün ma ku a Zang-e dingkho to nwon ilaxle zanda ang ngokya Babilon nok to chatle apüitox. Ifüima ija mikngün-ohün sam,

²⁵ilaxle zanda ang ngole tüikya ku üithobu hama JOWANPAe ku hama ahokyabu pangwüi wünle kox.