Read Wancho Naga Ezekel 12 Bible Online

Ezekel 12 - Wancho Naga bible

Ezekel 12

¹JOWANPAe ku füi akax,

²“Ziün angkya khünak, nang a alün-aloxle tüikya khünakbu khato ngole. Hwom ma mik tüile, ikoxchu hwome chemchu chingün; hwom ma na zaile, ikoxchu hwome chemchu chiatat, chemthüikoxle hwom a alün-aloxle tüikyabu chang koxle.

³“Athax, ziün angkya khünak, pünpao tuita ningle nang hün zinglax ilaxle zangngai mik ma wüi achexle paokox. Nang achexle mama khato paoüi pangnusae ngün ang laxkox. Owatsing ibu alün-aloxle tüikya khünakbue nang ngün ang kopüi.

⁴Zangngaile tüipongma wüi, pünpao ang pao hünzingle changlax, ile changkox tix hwome nang ngünle lax ang tsuaküi, ilaxle hansong ma pünpao cha achexkya ningle nang cha achexüi to hwome hule naxngo.

⁵Hwome hule ngopongma, nang hom wole donglax ilaxle ija okha makhange nang hün alaile paolax.

⁶Nang hün nang suakto ma danlaxle nange chingüntsuak angkya hanpakma nang mik to zim laxle zangnak fang to laile paokya hwome hule naxngo. Nange chem mokpuix ija a Israel nok hanpakma kaxkhün tuita ang changüi.”

⁷JOWANPAe ku füi chemle akaxpuix ija ningle kue mok. Ija nyix kue pünpao tuita pao ningle ku hünzing, ilaxle ija hansong ma zangnak hüile changpongma kue ku chak füi katuk wo ilaxle laile pao. Khünak noknusae hule ngopongma, kue ku hün suakto ma dan ilaxle achexle pao.

⁸Ofüinop JOWANPAe ku füi akax.

⁹Chixe thüi: “Ziün angkya khünak, athax Israel nok ibu alün-aloxle tüikyabue nang chem mokpuix ija bama atüile,

¹⁰hwom hama JOWANPA Khüthak zang, kue nang füi chem akaxpuix ija apuale laxkox. Ija kaxho a Jerusalem ma apün-awangle ngokya wanghomsa hanpak tamchu ikha ma ngole tüikya khünaknu hanpak changle.

¹¹Nange chem mokpuix ija a hwom hato chempang changle hüi angkya hex ibu hanpak changle le thüikox: hwom a pünpaobu tamchu zandabu ang changüi.

¹²Hwom thakma apünle ngokya wanghomsae chix hün chix suakto ma koplaxle chix hanpakma zole thomkya katuk okha makhange zangnak fangto paole azangüi. Chixe ma mik to zimle kopüi ilaxle chix ochito paole ngopuix münngünüi.

¹³Ikoxlechu kue ku sha pünle bangüi ilaxle chix a ima amanüi. Ifüima kue chix a Babilon tingnu to paoüi, ikhato chix a ija osün chingüntox homle ziüi.

¹⁴Chix khwa ma mokle ngokya okax-okhobu hia adangpabu tamchu chix nyetmixbu pangwüi kue machiak masaisai to afale pao ang tomüi, ilaxle hwom mik amüt ang lomle ngokya khünakbue hwom langüi.

¹⁵“Kue chemtue hwom mama haxtok hia mixnok chaxwanbu to afale apaoüihex, izuma hwome ku a JOWANPA changpule awanle laxüi.

¹⁶Kue hwomkha angkya züizüi a zan chak tokya, tuinuak chak tokya, tamchu kaklakbu chak tokya azangle chang ang tomüi, ikoxle tix hwom mwot chemtukuxkya zangkop mwotbu changdaopuixle ikha mixnok chaxwan to awanle lax ang tomüi ilaxle ku a JOWANPA changpule awanle laxüi.”

¹⁷JOWANPAe ku füi zangwün.

¹⁸Chixe thüi: “Ziün angkya khünak, fongsax pongma nang anyonlax, ilaxle ti lingle changpongma zale abünlax.

¹⁹Kaxho ija a hwom haxtok ma ngole tüikya Jerusalem angkya khünaknu ang koxkya kaxho changpule zangfang pangnu nok hato apuakox: Hwome fong zangale saxüi ilaxle ti a mong-shunzole lingüi chemthüikoxle ikhama ngokya owaechu wanlom chilax homtoxle ngokoxle hwom haxtok a zuazoxle dantoxüi.

²⁰Anyix khünake awangle tüikya tingnubu a amütüi, ilaxle hwom chaxwan a tüta puamün chitüikya haxtok ang achangüi. Ifüima hwome ku a JOWANPA changle le awan ang kopüi.”

²¹JOWANPAe ku füi zangwün.

²²Chixe thüi: “Ziün angkya khünak, Israel noke wanwünkax ija noxle-noxle büthüikoxle zexpuix: ‘Hanpak a kaile lengo ikoxle ajekax chem angchu chichang?’

²³Ikoxle athax JOWANPA Khüthak Zang, kue ija bama chem akaxse hex hwom hama apuakox. Kue ija wanwünkax ashuk ang tomüi. Ija kax Israel noke otuechu tamchatle chiwünüi. Itülüi hwom ang thüikox: Hanpak nguidaoa, ilaxle aje kaxbu asütle hüile!

²⁴“Israel khünaknu khato othai mikngünbu hia othai jekaxbu müntüi angkya changle.

²⁵Hwom füi JOWANPA ku jaoe wünüi, ilaxle kue chem akaxpuix ija mokle changüi. Ija mok angkya shenle münngo. Hünzom ozün ma tuipong ma wüi, hünzom alün-aloxle tüikyabu, hünzom ang kue chem moküihex-ole kaxkhün koxdaopuix ija kue mok angkya changpu. JOWANPA kue thüipu, ija kue akaxdaoa.”

²⁶JOWANPAe ku füi akax.

²⁷Chixe thüi: “Ziün angkya khünak, nang mikngün hia jekax bama Israel noke tsailo tokya mo wünle ngopuixle thütle.

²⁸Idaile hwom hama thüikox, JOWANPA kue hwom füi akax ngopu: Athax shenle ngoüi münchang. Kue chem akax daolaxpuix ija mok angkya changpu. Ija JOWANPA kue akaxdaoa!”