Read Wancho Naga Ezekel 14 Bible Online

Ezekel 14 - Wancho Naga bible

Ezekel 14

¹Israel nok lompabu züizüi JOWANPA mongtex bama atüi ang ku hato ngui.

²Ipongma JOWANPAe ku füi zangwün.

³Chixe thüi: “Ziün angkya khünak, khünak ibue hwom künmong chapabu ang koxdaoa ilaxle ibu chapabue hwom ochax to alyet ang tomle ngole. Kue hwom kax to lanüile hwome thütlaxpia?

⁴“Athax hwom füi akaxkox ilaxle JOWANPA Khüthak Zang-e hwom füi akaxle ngokya ija zangwün hwom hama wünle laxkox: Hünzom Israel khünak pangwüi, opange ma künmong chapabu ang koxlaxle ma ochax lom to alyet ang tom ilaxle ija bama tsaitik-kaxsho ang aje tuita hato nguile changlaxpuix, ija khünake ku makhange kaxlan kopüi: oja kaxlan hünzom chapabu ang kox ang asule tüipuix!

⁵Chapa ibu khokho ma Israel noke ku hato tok aho angkya laipu, ikoxlechu ku kaxlan makhange hwom ku kax ma laxle ngo ang mongchatle ahüiüile ongpu.

⁶“Idaile athaxpi JOWANPA Khüthak Zang, kue hwom füi akaxle ngokya kax hwom hama apuakox: Mong chatlax ilaxle hünzom zakkop chapabu dantoxlax.

⁷“Chemtue Israel khünak tuita chichangba Israel nok khato ngole tüikya mixnok sün tuita owawa ku hato tok aho laxle chapabu to shwom-tole, ilaxle aje tuita hato tsaitik-kaxsho ang nguile changpuix, ipongma JOWANPA, kue hünzom kax to lanüi!

⁸Kue hünzom zongto anongle changüi. Kue hünzom makhange apyen angkya tuita zingüi. Kue hünzom a ku khünaknu tu angkya atsai ang tomüi, ikoxle tix hünzom pangwüie ku a JOWANPA changle le awanle lax ang kopüi.

⁹“Ajebu owawae othai kaxlan fa angkya dyenle jangchang, ija a JOWANPA, kue hwom dyenle thomkoxle changpu. Kue hwom a Israel nok tukha angkya atsai ang tomüi.

¹⁰Ajebu hia hwom ma tsaitik-kaxshole changkyabu pangwüie sikngün tomwüi apongüi.

¹¹Israel noke ku chilaxle chiawüt angkya tamchu hwom ochaxbu tokhange hwom chitsaokya ang chiachang angkya hanpakmale kue ile mok angkya changpu. Hwom a ku khünaknu ang changle ngo angkya, ilaxle ku a hwom Zang ang changle ngo angkya changpu.” Ija a JOWANPA Khüthak Zang-e akaxdaoa.

¹²JOWANPAe ku füi zangwün.

¹³Chixe thüi: “Ziün angkya khünak, Onoke ochax lyen ilaxle ku to mongong thomkya chitüile jangchang, kue ku chak thüiüi ilaxle hwome sütling kop-lole ngokya olom amaüi. Kue hwom hato tuinu-nuaknu ahüiüi ilaxle khünak hia müi tomwüile zi ang tomüi.

¹⁴Ibu mixsün azom, Noa, Danel, üntoxle Job, hwom a ikhato ngole tüikya. Hwome müile tüikyae hwom tsün tata khosünle changüi.” JOWANPA Khüthak Zang-e ija akaxdaoa.

¹⁵“Chichangba haxtok ma khünak tuita aham angkya thama apüile khünaknu mik amüt ang kue faomüibu ahüi ang tsuak.

¹⁶Ibu mixsün hwom azom ikhato ngole tüikoxchu, hwome masu masa hwom ngaxchu sün ang chithole changüi: ija JOWANPA Khüthak Zang, kue akaxdaoa. Hwome ma khang tata azangle pao ang tsuaküi, ilaxle haxtok a khünak chingokya chaxwan ang achangüi.

¹⁷“Chichangba kue ija onok hato ochax-ozan hia thama adün angkya chang-paxbu ahüiüi ilaxle khünak-mixsa hia müi tomwüi olithu ang tomüi.

¹⁸Ibu mixsün hwom azom ikhato ngole tüikoxchu, hwome masu masa hwom ngaxchu sün ang chithole changüi: ija JOWANPA Khüthak Zang, kue akaxdaoa. Hwome ma khang tata azangle pao ang tsuaküi.

¹⁹“Kue ija haxtok hato okak-olak ahüile jangchang ilaxle ku mongtsiktsik ma khünaknu hia müibu mik amütle khüzün huanuma laxle jangchang,

²⁰Noa, Danel hia Job hwom ema tüikoxlechu:JOWANPA Khüthak Zang, kue akaxpu: hwome masu masa hwom khosünle chang ang ngaxchu müntho. Hwom müikya khoma hwom khang tata azang ang tsuaküi.”

²¹JOWANPA Khüthak Zang-e akax ngokya kax a ija changle: “Kue khünak hia müibu mik tomwüi amüt ang, Jerusalem hato ku thama akhokya ali ahüiüi: ochax-ozan, otui-onuak, faomüi, ilaxle kaklak, ibu a.

²²Owawa ozün ma tüi ilaxle hwom su-sabu sünle thomkya jangtüi, hwom nang hato nguikya zuma hwom to hule koplax. Hulax hwom chemtukuxkya ochaxbu hex ang, ilaxle kue Jerusalem hato ahüile ngokya zothup a asunpule pongle laxlax;

²³ifüima kue chempang mokpuix ibu tokfüi ma fe ang müikya zangwün tüidaokoxngünale texlax.” JOWANPA Khüthak Zang kue ija akaxdaoa.