Read Wancho Naga Ezekel 18 Bible Online

Ezekel 18 - Wancho Naga bible

Ezekel 18

¹JOWANPAe ku füi akax,

²ilaxle thüi: “Israel haxtok ma khünaknue noxle-noxle wünkya wanwünkax ija a chem? ‘Nu-pa hwome grepbu sikya sax, Ikoxle su-sa hwom wa mix tsom.’

³“JOWANPA Khüthak Zang-e thüi: Chemle ku ozün ma ngokya Zang tsingtsing hex, ija ningle hünzome Israel ma ija wanwünkax tamchatle noxle münngoüi.

⁴Khünak pangwüi khüzün ku kux changpu, nu-pa hwom khüzünchu tamchu naosom hwom khüzün chuwüi. Owae ochax lyenpuix, mik max angkya mix a chix tix changpu.

⁵“Namthütba müikya khünak tuita tüile, chix a otsao tamchu sukya khünak.

⁶Chixe Israel nok chapabu to münshwom chichangba taxshwomle abaxkya baozang shwomnui to tö koxkya münsax münling. Chixe mix kakonu jik-naile münchang chichangba tutsyen paole ngokya tukma sheko füi jip-pomle münchang.

⁷Chixe owachu mündyen chichangba owa angkyachu pa-lole münlax. Chix angkya omua ma laxkyabue olüi koxle changkyabu chixe achatle koxle; woknuak ma ngokyabu ang chixe süt kox ilaxle tomhua ma ngokyabu ang chixe nyi-za awunle kox.

⁸Chixe olap kop angle ngun koxle münthom. Chixe ochax mwot münmokle angamle ilaxle tütaningle alakya zangwünchu chixe sukya lom ma fün-wün tsuakle kox.

⁹Iningkya khünake ku kaxtombu kax ma laxle ilaxle ku wanlombu khile thomle. Chix a otsao khünak changle, ilaxle chix a ozün ma ngo angkya wüi changpu”, le JOWANPA Khüthak Zang-e akaxdaoa.

¹⁰“Ikoxle ija mixsün ang mixkux pa-lole laxngokya hia mix mik amütkya, owae mapae chimokkya iningkya mwot tütali mokle ngopuix iningkya sasün tuita tüi

¹¹ilaxle taxmokle atsaokya chapa shwomnui to koxkya töbu chixe sax ilaxle mix kakonubu füi nganguile chang,

¹²chixe mix dyenlale chang, mixkux pa-lole lax, omua ma laxkyabue olüi koxle toxkya chixe lax, chix a songsari baozang shwomnui to pao, nushix dongkya chapabu to shwom,

¹³ilaxle olap kop ang ngun koxle apao. Chix ozün ma ngo ang cha? Münngo, nushix dongkya mwot ibu pangwüi chixe mokle tsuakdaoa, ikhoma chix a zi angkya wüi changpu. Chix zik bama owamachu tsaitox-kaxfe angkya müntüi.

¹⁴“Athax anyi-lükya ija mixsün ang sasün tuita tüi. Chixe ochax olom pangwüi hopae mokkya ngünle lax, ikoxle chu chixe ija man chito.

¹⁵Chixe Israel nok chapabu to chishwom chichangba chitsaokya chapabu shwomnui to koxkya töbu chisax. Chixe mix kakonubu füi nganguile chichang

¹⁶chichangba owawa to afangle chithom chichangba owawa kux pa-lole chilax. Bondok ma laxkya khünake olüi koxle toxkya tüi chixe achatle kox. Woknuak mixbu ang chixe süt kox ilaxle tomhua ma ngokyabu ang nyi awunle kox.

¹⁷Chixe ochax mwot münmokle angam ilaxle olap kop ang ngun koxle chiapao. Chixe ku wanlombu thomle ilaxle ku kaxtombu kax ma laxle. Chix a hopa ochax khoma hexle münzi, ikoxle chix a ozün ma ngoüijao.

¹⁸Ikoxle hopae a mix to dyenla ilaxle mixkux pa-lole lax ilaxle pangnu zongto chixe ochax mok. Ile chix jaoe mokkya ochax mwot khoma chix mik max angkya laipu.

¹⁹“Ikoxle nang atüipu: ‘Hopa ochax khomale sasün sik büthüikoxle ngün angkya?’ Ija kaxlan a ile changpu, ija sasüne chem supuix tamchu chem müipuix ijaja mokpu. Chixe ku wanlombu khile thompu ilaxle ibu lom ma lepu, idaile chix ozün ma ngo angkya wüi changpu.

²⁰Owae ochax moklaxpuix chix tix zi angkya changpu. Hopa ochax khomale sasüne sikngün apong angkya müntüi, iningle sasün ochax khoma hopaechu sikngün apong angkya müntüi. Müikya khünakbu to müikya mwot khoma mohimankya tüiüi ilaxle ochax khünakbu a hwom ochax khoma sikngün angkya tüiüi.

²¹“Owawa ochax khünak tuitae ochax mwot mokle ngokya zak ilaxle ku wanlom ma ngole ilaxle chixe chem supuix tamchu chem müipuix ijaja mokle jangchang, chix a münziüi; chix a tütakoxlechu ozün ma ngoüi.

²²Chix ochaxbu pangwüi thailakkya tüiüi, ilaxle chix a ozün ma ngoüi chemthüikoxle chixe chem supuix ija mokdaoa.

²³Ochax khünakbu zikkya ngünlaxle ku ang mongmüile le nange thütpuix nyi?”, le JOWANPA Khüthak Zang-e atüi. “Ile münchang, itülüi kue hwom künlop-monglüi laxle ozün ma ngokya ngünse tsupu.

²⁴“Ikoxle otsao khünak tuitae müikya mwot mokkya dan ilaxle ochax mwot pangwüi mok ang süt, ochax khünakbue mokkya nushix dongkya mwotbu a, chix a ozün ma wüi ngo angkya le hia? Ile münchang! Chixe mokle ledaokya müikya mwot tuita chu texle ngo angkya müntüi. Chix mongong athokya hia ochax khoma chix a zi angkya wüi changpu.

²⁵“Ikoxle nang thüipu, ‘Zang-e chem mokpuix ija a sukya münchang.’ Ku kax to apalax, hünzom Israel nok. Kue mokkya olom münsule hünzome thütpuix nyi? Chisukya a hünzome ajangkya olom mix changpu.

²⁶Chemtue otsao khünak tuitae mwotmüi mokkya zakle changpuix ilaxle ochax mwot moklaxle chix zipuix, chix a chixe mokkya ochax mwot khoma zilaxpu.

²⁷Ochax khünak owawae ochax lyenle ngokya zak ilaxle chem supuix ijaja mokle jangchang, chixe ma khangkho sünpu.

²⁸Chixe chem mokle hüidaopuix ibu chimüikya mwot changpule chixe awanle lax ilaxle ochax lyenle ngokya zak, idaile chix a zi angkya münchang ikoxle ozün ma ngole le angkya changle.

²⁹Hünzom Israel noke thüitüi, ‘Jowanpa mwot ija a münchang.’ Hünzome ku mwotlom a chichangkya lomle thütle, changpuix nyi? Chisukya a hünzom lomtang mix changpu.

³⁰“Athax JOWANPA Khüthak Zang kue hünzom Israel nok füi akax ngopu, kue hünzom pangwüi mae chemle mokle hüidaopuix ija ningle kaxfün faüi. Hünzome mokle ngokya ochax lom pangwüi tokya hünzom mong chatlax, ilaxle hünzome hünzom ochax to ma amüt ang taxtom.

³¹Hünzome mokle ngokya ochax pangwüi danle toxdao, ilaxle hünzom ma künzün-mongzün donglax. Hünzom Israel nok zise büthüikoxle tsupu?

³²Kue opupuchu naxzile münthüt. Hünzom ochaxbu tokya mongchatle changlax, le JOWANPA Khüthak Zang-e akaxle.”