Read Wancho Naga Ezekel 20 Bible Online

Ezekel 20 - Wancho Naga bible

Ezekel 20

¹Kwom zanda ang kople paokya füima ija a zanglao anüt lükya to lyetjang aga angkya nyix bün lükya changkya. JOWANPA mongtex bama tsaitik-kaxsho angkya hanpakmale züizüi Israel nok lompabu ku hato ngui ilaxle ku tunthoma thung.

²Ipongma JOWANPAe ku füi zangwün.

³Chixe thüi: “Ziün angkya khünak, JOWANPAe hwom füi akaxle ngokya ija zangwün lompa ibu hama apuale laxkox: Hünzom a ku mongtex tik-to ang nguipu, changpuix nyi? Ku a ozün ma tüile ngokya Zang changle, kue hünzom ang chemchu tik-tole chang ang müntom. Ija JOWANPA kue akaxdaoa.

⁴“Ziün angkya khünak, nange ibu ang kaxfün fa ang achwonle tüichami? Jangtüiba ile mokkox. Hwom pu-pa hwome nushix dongkya zakkop mwotbu mokle hüikya hwome texle atat ang tomkox.

⁵Kue hwom füi akax ngokya kax hwom hama wünkox. Chemtue kue Israel zünle koppuix, kue hwom füi tsao tuita sax. Kue hwom hato Ijip nok to ku ngaile aho laxle akaxpu: Ku a JOWANPA, hünzom Zang changle.

⁶Ilaxle epongma kue hwom Ijip nok tokya alaile pao angkya ilaxle kue hwom hanpakma zünle kopkya, tüle ahak-aluale tamchu haxzaoe awangle tüikya haxtok, zangfang ma sümüipupa haxsüt, ikhato apüi angkya tsaosax.

⁷Hwome mongkünle ngokya nushix dongkya chapabu awüt angkya ilaxle Ijip nok othai baozangbu füi hwom chitsaokya ang chiachang angkya kue hwom füi akax, chemthüikoxle ku, JOWANPA a hwom Zang changle.

⁸Ikoxle ngaithole hwome ku kax aba ilaxle ku kax ma münlaxpule angam. Hwome nushix dongkya hwom chapabu chiawüt chichangba Ijip nok baozangbu hwome danle chitox. Ijip nok towüi ku a hwom ang ku mongtsik janzüi komkaile apong ang tomüile achwon ngokya.

⁹Ile chang koxle ku münma angwüi changüile thütlaxle kue ile chimok, chemthüikoxle hwom tomwüi ngole tüikya mixnokbu tunthoma Israel nok hato kue hwom Ijip chaxwan tokya alaile pao angkya kax ngaile kop.

¹⁰“Ija lailaile kue hwom Ijip nok tokya sak-hax to zunle alai.

¹¹Ibu kax ma laxle changkya hato khüzün apüi angkya ku kaxtombu hwom ang kox ilaxle ku wanlombu anole kox.

¹²Kwom ba angkya tsaotsüt tuita ningle tamchu hwom otsao ang achangle fakya a JOWANPA ku changpule texle ngo angkya hanpakmale kue hwom ang Sabath nyi nui angkya kox.

¹³Ikoxle sak-hax to ngaxchu hwome ngaithole ku kax ma chilaxle angam. Hwome ku wanlombu pünle awüt ilaxle ku kaxtombu kax ma chilaxle tüi; ibu tole jangchang thüikoxle hwom pangwüi ang khüzün tüisepa. Sak-hax ikhato wüi kue hwom ang ku mongtsik janzüi komkaile apong ang tom angkya tamchu olithule hwom amüt angkya ku achwonle tüikya.

¹⁴Ile chang koxle ku münma angwüi changüile thütlaxle kue ile chimok, chemthüikoxle hwom tomwüi ngole tüikya mixnokbu tunthoma Israel nok hato kue hwom Ijip chaxwan tokya alaile pao angkya kax ngaile kop.

¹⁵Ikhoma kue hwom a, tüle ahak-aluale tamchu haxzaoe awangle tüikya, zangfang ma sümüipupa haxtok to hwom apüi angkya kue tsaosaxle changdaokya ningle kue ija hwom ang koxle thomkya haxtok to hwom münapüile sak-hax to tüipongma wüi tsaotsüt.

¹⁶Hwome ku kaxtombu chilaxle awüt, ku wanlombu amale awüt, ilaxle Sabath nyix tsaolyenle chang ilaxle hwome hwom chapabu to shwomkya wüi amüikya ang lax, ikhokho ma kue tsaotsüt angkya laipu.

¹⁷“Ikoxlechu ofüima kue hwom to chingcha. Kue hwom sak-hax ikhato chilang angkya mongzangwünle tsuak.

¹⁸Ikoxle kue hwom khama tüikya tsünzün thom ang kaxkhün koxle thüi: Hünzom pu-pa hwome zingkya wanlombu taxthom ngo; hwome bangkya zanglom-saikha taxto ngo chichangba hwom chapabu füi hünzom chitsaokya ang taxachang.

¹⁹Ku JOWANPA a hünzom Zang changle. Ku wanlombu tamchu ku kaxtombu kax ma laxle tüilax.

²⁰Sabath nyix a otsao nyix ang achang kox, ikoxtix wüi ija a kem bama tsaotsüt tüikya manwan tuita ang changüi, ilaxle ijae ku a hünzom zongto JOWANPA hünzom Zang changpule texle atak ang tomüi.

²¹“Ikoxle ibu tsünthombue chuwüi ngaithole ku kax aba. Hwome ku wanlombu pünle ama ilaxle ku kaxtombu kax ma chilax; ijabue kax ma laxle tüikyabu pangwüi ang khüzün fase pa. Hwome Sabath tsaolyen. Ekha sak-hax towüi hwom ang ku mongtsik janzüi zongbakle apong ang tom ilaxle hwom pangwüi langle awüt ang ku achwonle tüikya.

²²Ile mokkoxle, Ijip nok tokya Israel khünaknu kue zunle apüikya ngünle laxdaokya jat-libu tunthoma ku mün oma ang changüi changpue kue ile chimok,

²³Ikhoma kue sak-hax to chatle mama tsaosax. Izuma kue hwom a chaxwan tok pangkha to chiakle asam angkya tsaosax.

²⁴Hwome ku kaxtombu chilaxle awüt, ku wanlombu pünle ama, Sabath nyix tsaolyenle chang, ilaxle hopu-hopa hwome thothale hüikya chapabu to hwome shwom, ile changkya khoma kue ija ile mok.

²⁵“Ifüima kue hwom ang chimüikya wanlombu kox ilaxle khüzün chikop angkya kaxtombu kox.

²⁶Kue hwom a, hwome koxkya töbu makhange hwom alüile chitsaokya ang chang ang tom, ilaxle hwom ang tüichongsasa tö kox ang tsan. Ija a hwom to sikangün ang tamchu ku a JOWANPA changpule aho angkya hanpakmale chang.

²⁷“Athax a, ziün angkya khünak, Ku, JOWANPA Khüthak Zang-e hwom füi chem akaxle ngopuix, ija zangwün Israel nok hama wünkox. Ija a hwom pupa hwome ma mongong athokya makhange ku ajao-ahai angkya olom mama changpu.

²⁸Kue hwom ang koxüihex-ole tsaole thomkya haxtok to kue hwom apüi. Chemtue hwome haxkho tsuakyabu hia hingkwonkya pünbu ngünle laxpuix, ibu pangnu chitong ma hwome töbu kox. Hwome zokle tö koxkya hia tö ang ju thokle koxkya, ibu makhange hwome ku ang mong atsikle.

²⁹Kue hwom ma atüi: Hünzom paokya kha onui tsuakyabu a chem? Ikhoma anyix kople ibu ang ‘Haxhua Tsuakyabu’ le nyakle hüi.

³⁰Athaxpi Israel nok hama kue akaxle ngokya ija kax apuakox: Hünzome büthüikoxle hünpu hünpa hwome mokle hüikya ochax mokle hwom chapabu hato pao angkya?

³¹Anyixchu hünzome ibu chapabu tuitata ang wüi wün ma masu masabu zokle ashunle tö koxle hinghobu koxkya makhange ma alüile chitsaokya ang achangle. Ilaxle hünzom Israel khünaknu ku hato ku mongtex bama atüi ang nguingotüi! Ku a JOWANPA ozün ma ngokya Khüthak Zang changle, idaile kue hünzom ang ku ma chemchu tiksho chang ang müntomüi.

³²Hünzome hünzom chuwüi mixjat-mixlibu, opang mix haxtok to ngolaxle long-pünbu to shwomle ngopuix, ibu lailaile chang angkya mong ma zangwünle tsuakdaoa. Ikoxchu ija otuechu ile münchangüi.

³³“JOWANPA ku ozün ma ngokya Khüthak Zang-e, janzüi füikya ku chak hia ku tsak-zong füi kue ku mongtsiktsik ma hünzom to apünle chang angkya kaxkhün koxpu.

³⁴Kue chemtue mixnok chaxwan to chiakle ngokya hünzom asox-atomle changüihex, ipongma kue hünzom hato kutsak kuzong hia mongtsik ahoüi.

³⁵Kue hünzom a ‘Mixnokbu Sak-hax’ to apüiüi ilaxle ikhato hünzom thün ma takle ajaoüi.

³⁶Kue chemle hwom Sinai Sak-hax to tüipongma hünzom pupa hwom tha-ajaopuix ija lailaile kue hünzom tha-ajaoüi”, le JOWANPA Khüthak Zang-e akaxdaoa.

³⁷“Kue hünzom to shingmongle akumathumüi ilaxle hünzom ang ku tsaotsüt kax ma laxle ngo ang tomüi.

³⁸Kue hünzom kha angkya alün-aloxle tüikya hia ochax khünakbu tswonle paoüi. Kue hwom a athaxpongma hwom ngole tüikya haxtok angkya paoüi, ikoxle kue hwom a Israel nok haxtok to chatle tamchat ang müntom. Ifüima hünzome ku a JOWANPA changpule tsingle lax ang kopüi.”

³⁹JOWANPA Khüthak Zang-e akaxle: “Ilaxle athax hünzom Israel khünak pangwüi, hünzom achwonlax! Paolax ilaxle hünzom chapabu thothale changlax! Ikoxlechu kue kaxkhün koxpu, athax ifüima hünzome ku kax ma laxle chang angkya wüi ilaxle hünzom chapabu ang hingho-chaktwonbu koxle changkya makhange ku otsao mün amale ngokya zak angkya oli changle.

⁴⁰Haxtok chukhato, ku otsao haxnukho ma, Israel ma atsuakya haxnukho ma, Israel khünak hünzom pangnusae ku to shwom angkya changle. Ku ang hünzom füi mongmüiüi, ilaxle hünzome ku hato sümüikya töbu, hünzom töbu amüikya hia hünzom otsao hinghobu apüile kox angkya changle le mongongkya tüiüi.

⁴¹Hünzom chiakle tüikya haxtokbu tokya kue hünzom apüilaxle asox-atom ang tomkya füima, hünzome apüilaxle zokle ashunle koxkya töbu kue pongle kopüi, ilaxle jatlibue ku a otsao changle le ngün ang kopüi.

⁴²Kue hünpu-hünpa hwom ang koxüihex-ole tsaokya haxtok to chemtue hünzom apüipuix, ipongma ku a JOWANPA changle le hünzome awan ang kopüi.

⁴³Ipongma hünzome chemtukuxle zakkop mwot mokle hüidaopuix tamchu hünzom chitsaokya ang achangle hüidaopuix ibu hünzome texle ataküi. Hünzome mokle hüidaokya ochax mwot pangwüi makhange hünzom a alüile nushix dongle thütüi.

⁴⁴Chemtue kue ku chuak-chongkya kho-awa angkya mwot mokle changüihex, hünzom Israel noke ku a JOWANPA changle le awan ang kopüi, chemthüikoxle kue hünzom füi hünzom chichangchizangle tüikya hia ochax mwotbue lomkya ningle kue hünzom to chihwon.” JOWANPA Khüthak Zang-e ija akaxdaoa.

⁴⁵JOWANPAe ku füi akax.

⁴⁶Chixe ku ang thüi: “Ziün angkya khünak, shuathong chito hulax. Shuathongchi füi akaxkox ilaxle shuathongchi angkya fao hanpakma aje-kox.

⁴⁷JOWANPA Khüthak Zang-e akax ngokya ija zangwün shuathongchi fao füi akaxkox: Hulax! Kue wün alai ang sütpu, ilaxle ijae nang ma tüikya pün, ohing wüi changlax ozik wüi changlax, pangwüi zokle ashunüi. Ija wün chem makhangechu amüt ang müntho. Ija a shuathong tokhange shuakux chito lünle tsale paoüi, ija noknusae ija wünkham khamkya awanle laxüi.

⁴⁸Ija wün a JOWANPA kue atsatkya changpu ilaxle ija owaechu amüt ang münthoüile hwome ngünle laxüi.”

⁴⁹Ikoxle kue akax: “JOWANPA Khüthak Zang, ku ang ija ile mok ang taxtom! Kue tsaisong-kaxnong-nong ma akaxle le noknusae jento kaxthup-ngaotünkya tüile.”