Read Wancho Naga Ezekel 21 Bible Online

Ezekel 21 - Wancho Naga bible

Ezekel 21

¹JOWANPAe ku füi akax.

²Chixe thüi: “Ziün angkya khünak, Jerusalem dantox dao. Khünaknue shwom-tole ngokya kha dantox dao. Israel haxtok ang

³JOWANPAe akax ngokya ija kaxkhün laxkox: Ku hünzom zanpa changle. Kue ku changlo syetüi ilaxle chimüikya khünak hia müikya khünak tomwüile, hünzom pangwüi langle changüi.

⁴Shuakux makhange shuathong alople kue noknusa hanpak ang ku changlo twonüi.

⁵Kue ku changlo sukdaoa ilaxle ija tamchatle latüi münchangle noknusae awan ang kopüi.

⁶“Ziün angkya khünak, nang mongmaxkya tukuxle awaole sopkox. Noknusae nang hu ang koptsuak angkya onui ma awaole sopkox.

⁷Chemtue hwome nang büthüikoxle awao ngopule atüiüihex, ipongma nang awao ngokya a, athax füichi ma hüiüi tüikya kaxho khoma soppu le hwom ang apuale laxkox. Chemtue ija nguile hüiüihex, ipongma hwom mongkha chazakyae awangle changüi, hwom chakbu a faile changüi, hwom mongchongle ngokya mong athoüi, ilaxle hwom chikux ahongüi. Ija ningkya hanpak nguile ngole; ija ikhama tüile.” JOWANPA Khüthak Zang-e ija akaxdaoa.

⁸JOWANPAe ku ang thüi:

⁹“Ziün angkya khünak, aje-kox. JOWANPA, kue akaxle ngokya kax ija khünaknu hama wünkox: Changlo tuita, changlo tuita a wunle anaxdaoa ilaxle fwotle atsyetdaoa.

¹⁰Ija a mik-amüt angkya hanpakma wunle anaxkya changle, zangchangjep ningle fixfax le ajep ang fwotkya changle. Athax mongmüi hanpak müntüi, chemthüikoxle ku khünaknue sikngün-zothup hia khünzai angkya kax pangwüi hwome ahaidaoa.

¹¹Changlo fwotle atsyetkya a, ija twon ang achwonkya tuita changpu. Ija a wunle anaxdaoa ilaxle fwotle atsyetdaoa, mix mik amüt angkya khünak tuita chak to kox angkya hanpakma.

¹²Mongmale akhong kox, ziün angkya khünak; ija changlo a ku khünaknu hanpak ma changle ilaxlechu Israel lompabu pangnu hanpakma changle. Hwom a lang angkya changle mama khünak noknusa füi tomle a. Künmax-mongshanle ma khaxtok to fitlax!

¹³Kue ku khünaknu to thwontsing ngopu, ilaxle hwome künlop-monglüi ang chitsu, ibu pangwüi hwome apongle hüiüi.

¹⁴“Athaxpi, ziün angkya khünak, aje-kox. Nang chak akhaokox, ilaxle changloe chatwüi chatle hütüi. Ija changlo a mik amüt angkya changlo, chabüt-lasün ang tom angkya changlo ilaxle dingsom angkya changlo.

¹⁵Ijae ku khünaknu ang mong ahik tamchu chikho suale chang ang tomle. Kue hwom tingnubu changlo tuita füi aza-ana ngopu Ija a zangchangjep ningle jikjeple tamchu mik amüt ang achwonle tüile.

¹⁶Nong hia tsax to hütkox, nang anaxkya changlo! Nang alopkya pangnu chito hütkox.

¹⁷Kue chuwüi ku chak akhaoüi, ilaxle ku mongtsik baküi. JOWANPA, kue ija akaxdaoa.”

¹⁸JOWANPAe ku füi akax.

¹⁹Chixe thüi: “Ziün angkya khünak, Babilon nok wanghompa chix changlo füi ngui ang tho angkya lomkua anyi to shin koxle thomlax. Pangnyi wüi onok tuita makhange owang wang angkya changpu. Ija lompong-fak ma lomkua mün apütle thomkox.

²⁰Khünak tuitae wanghompa hama Amon nok tingnu Rabbah tole angkya lom tamchu Judah nok tole angkya lom tamchu ziakople thomkya Jerusalem tingnu tole angkya lom ahole koxüi.

²¹Babilon nok wanghompa lompong-fak ma tüikya lomkua ahole apüt thomkya longkhao hama ajong. Ochichi lomkua tole angkya hex ang chixe naxhixbu sile alox; chixe chix chapa ma tik-to; chixe tö ang koxkya müi okhax to hule wan.

²²Athaxpi! Chix tsaxchi chak ma Jerusalem chizing ma laikya naxhix san koplaxle ngo. Ijae chix ang ikhato paolaxle long katuk wo angkya, zankhong tinglyet angkya, katuk füi tomwüile hax thokle atsua laxle zanhunui zing angkya hia thapbu thole ziakop angkya aho.

²³Hwome nokmüi angkya zangwün tsuakle thomkya tuita tüikya khoma Jerusalem ma ngokya khünakbue ija to chiong. Ikoxlechu ija ajekax a hwom ang hwom ochaxbu texle atak ang tom angkya tamchu hwom a kople pao angkya changle lükya kaxkhün kox angkya hanpak changkya.

²⁴Idaile JOWANPA Khüthak Zang-e, kue akaxle ngokya kax a ija changle: Hünzom ochaxbu a kotok to angaidaoa. Hünzom chemtukux thaidao le noknusae tikle ngole. Hünzome hünzom ochaxbu a hünzome mwot pangwüi ma ahole. Hünzom a wünhaidaokya ajongle ngowüi, ilaxle kue hünzom a zan-nokbu chak to kox angkya changpu.

²⁵“Hünzom chichang-chizangkya, hünzom Israel nok lompa chitsaokyabu, hünzom hanpak-zanghan, hünzome oshuk sikngün apong angkya nyix a hüile ngole.

²⁶JOWANPA Khüthak Zang, kue akaxdaoa. Hünzom khohom hia khang-ngüi-nyi suklax. Otyatya ma chemchu münngoüi. Chitüi-chinangbu asale nwonle tsak-zong ang tomkox! Apün-awangle ngokyabu hax to athai kox!

²⁷Pünle, pünle! Changle, kue tingnu a tuita pünle awütkya nui ang achangüi. Ikoxle ija a kue kamle thomkya tingnu thama adün angkya mix nguile machang tanto ija ile münchangüi. Kue ija chix ang kox angkya changle.

²⁸“Ziün angkya khünak, aje-kox. Israel nok ajaole ngokya Amon nok füi JOWANPA Khüthak Zang kue chemle akax ngopuix, ija khuapukox. Hwom hama thüikox: Thama adün angkya hanpakma changlo tuita achwonle tüile; Ija a mix lang ang tamchu zangchangjep ningle naxajep ang fwotle atsyet thomle.

²⁹Hünzome ngünkya mikngün-ohünbu a othai changpu, ilaxle hünzome ajele thomkyabu a othai. Hünzom a chichang-chizangkya tamchu ochax khünakbu, ilaxle hünzom hanpak nguile hüile, hünzome oshuk sikngün apong angkya hanpak a. Changlo a hünzom dingkux ma ate angkya changle.

³⁰“‘Changlo sholax! Hünzom zingkya onui ma, hünzom puxkya haxtok ma kue hünzom to kaxfün fa angkya changle.

³¹Kue ija wünkhix ningle hünzom khangkho ma danle apaokya zuma hünzome ku mongtsike pokya awanle laxüi. Ilaxle kue hünzom a, tuikhex chitüikya khünakbu, thama adün ang ataxle awan ngokyabu chak to kox angkya changle.

³²Hünzom a wün füi olithu ang tom angkya changle. Hünzom ajibu a hünzom haxtok ma wüi thok angkya changpu, ilaxle hünzom a owaechu texle chiatakle amütüi.’” JOWANPAe ija akaxdaoa.