Read Wancho Naga Ezekel 22 Bible Online

Ezekel 22 - Wancho Naga bible

Ezekel 22

¹JOWANPAe ku füi akax.

²Chixe thüi: “Ziün angkya khünak, mütkop mixe awangle tüikya tingnu tuita ang kaxfün fa ang nang achwonle ngolax ma? She hama she-e mokdaokya zakkop mwot pangwüi tsaothale apua laxkox.

³Ija tingnu hama JOWANPA Khüthak Zang kue akaxle ngokya ija kax apuale laxkox: Hünzome ma khünakbu huanuma mik-amütle changdaokya khoma ilaxlechu chapabu tong shwomlaxle hünzome ma alüile chitsaokya ang achangkya khoma, hünzom hato hünzom hanpak chwonle hüiüna.

⁴Ibu mik langkyabu tokhange hünzom a thaikyabu ang changdaoa ilaxle hünzome chapabu zingle alaikya makhange hünzom a chitsaokyabu ang achangdaoa, ikhokho ma hünzom hanpak tunu nguile hüile, hünzom ang hanpak lekya ang changle! Ikhoma kue jat-libu ang hünzom chanyi-wanjaile chang ang tompu ilaxle pangnu jatlibue hünzom to dyen-nganle changpu.

⁵Tomzi nokbu hia tsailo nokbue hünzom a chem tutsyen-wanwün chilax homtoxle ngokya khoma ajao-adale.

⁶Israel nok lompabu pangnusae wüi hünzom janzüi to alüile mongongle ilaxle mik amütkya mütkople.

⁷Tingnu ma hünzom opupuechu manu-mapa hwom chathua zakya mix müntüi. Hünzome mixnokbu dyenle ilaxle zomnu hia khaxsa-zasabu to jemle.

⁸Hünzom ang otsao nuibu hanpak ang chathua zakya ojao müntüi, ilaxle hünzome Sabath nyix atsaole münthom.

⁹Hwom mik amüt angkya hanpakma hünzom kha angkya züizüie owawa hanpakma kaxthai zangwün alaile khualople. Hwom züizüie chapabu ang koxkya töbu chuwüi saxle. Züizüie a jento mix mikzalokya mongzom amüile ngole.

¹⁰Hwom züizüi a mapa kakonu füi jip-pomle. Züizüie a shekobu tutsyen paole ngopongma hwom füi nga-nguile chang angkya atsangle.

¹¹Züizüie chinunchakkaile changle, ilaxle züizüibue a ma nomcha hia mali manao hwom to twon-jao le.

¹²Hünzom züizüie omün koxlaxle mix mik amütle. Züizüie mamix Israel khünak tomtom ang thashe koxkya sasün füi achatle laxle, iningle chitüi-chinang tsang-hangkya füi hwom ahak-aluale. Hwome ku alakle awütdaoa.” JOWANPA Khüthak Zang-e ija akaxdaoa.

¹³“Pa-lole laxngokya hia mix mik amütkyabu khangkho ma kue ku chak ajoüi.

¹⁴Kue hünzom to mwot tsuakle mokkya zuma hünzom ma chachen-mongchen toxüi chichangba nang chak nwon ang thole hünzom ma janzüi tüiüile hünzome thütpia? Ku, JOWANPA Khüthak Zang-e ija akaxdaoa, ilaxle kue ija ku kax thom angkya changle.

¹⁵Kue hünzom khünakbu a chaxwannu nok pangting-jahax towüi chiakle pao ang tomüi, ile kue hünzom ochax mwotbu olithu ang tomüi.

¹⁶Ija ningle mixnokbue hünzom adix-adale changüi, ikoxle hünzome ku a JOWANPA changpule tsingle laxüi.”

¹⁷JOWANPAe ku füi akax,

¹⁸“Ziün angkya khünak, Israel khünaknu a ku zongto laxli ojao müntüi. Hwom a khop achukle laxüima chilaxle tuinabu: wi, tata, jan, ilaxle hotu, ibu chilaxli tuina dantoxkya ningkyabu changle.

¹⁹Idaile athax ku JOWANPA Khüthak Zang-e akaxle ngopu, hwom a ibu tuinabu ningle chilaxle ang changle. Kue hwom pangwüi Jerusalem to nguile asox-atom ang tomüi.

²⁰Ija a wün to zok angkya hanpakma khop-jan, wi, jan, tu hia ta ma afox-atomkya ningle changüi. Jan ibu wüne zokle achukkya ningle ku küntsik-mongmae hwom achuk angkya changpu.

²¹Changle, kue hwom a Jerusalem ma asox-atomüi, hwom fang ma wün taküi ilaxle hwom a ku mongtsik füi achukle changüi.

²²Chemle khop wün ma achukpuix ilailaile hwom a Jerusalem ma achuküi, ilütix hwome JOWANPA mongtsike pokya awanle lax ang kopüi.”

²³JOWANPAe ku füi tamchatle zangwün.

²⁴Chixe thüi: “Ziün angkya khünak, Israel nok hama, hwom haxtok a müntsao, ikhoma kue ku mongtsik füi hwom to sikangünpu, le thüikox.

²⁵Lompabu a, mailangbue hwome langle changdaokya müi to tsele ahungkya ningle changle. Hwome khünakbu lang, ibu kux tuina tsuakpupu hwome lax, ilaxle hwom chak ma maxkya khünakbue kakonubu thanucha ang achangle dantoxkyabu huanuma tüi.

²⁶Nguapabue ku wanlom pünle ama ilaxle otsaole thüikya to chathua zakya ojao chitüi. Hwome chitsaokya hia tsaokya nyi ojao münsüi. Hwome chitsaokya hia tsaokya oli süile chiano, ilaxle hwome Sabath nyix wünhaile. Ikhokhoma Israel khünaknue ku chathua zakya müntüi.

²⁷Tingpün-nokwangkyabu a, hwom langdaokya müimang ma atinle ashik-akhixle saxkya shwonbu ningle. Hwom ahak-aluale chang angkya hanpakma hwome mix lang mix.

²⁸Homzai mixbue katuk to thun füi pale atsyet toxkya ningle ajebue ibu ochaxbu pyenle thom. Hwome mikngün-ohün othaibu ngün ilaxle othaibu aje. Hwome JOWANPA Khüthak Zang kax taipu le akaxle, ikoxle JOWANPA kue hwom füi zang ojao chiwün.

²⁹Hakpabue dyen-ngan ilaxle pa-lole chang. Hwome mixshix-zasa hwom to chichangle hwom ilaxle mixnok wünpabu to zongzong ma hwon.

³⁰Long katuk tuita zingle tsuak angkya mix, khünak owae katuk atsunkya longbu athün thomkya khama ajong ilaxle ku mongtsike ibu amüt ang thüipongma ija kho awale tsuak angkya khünak to kue hule ngo, ikoxle kue tuita ngaxchu chiatak.

³¹Ikhoma kue ku mongtsik hwom khangkho to awütüi, ilaxle wün lailaile kue hwom, hwome chem mwot tsuakle hüidaopuix, ikhatokya hwom amütüi.” JOWANPA Khüthak Zang-e ija akaxdaoa.