Read Wancho Naga Ezekel 27 Bible Online

Ezekel 27 - Wancho Naga bible

Ezekel 27

¹JOWANPAe ku füi akax:

²“Ziün angkya khünak, Tair nok hanpakma mangsop tsai ngaokox,

³ija tingnu a tinu kax ma ngolaxle tinu kax to ngole tüikya nok pangnu füi thalexle chang. JOWANPA Khüthak Zang kax ija she hato hokox: “Tair, nang a ma sünmüi bama mongngam.

⁴Nang homhax ang tinu shinthuk lax. Zingpabue nang a osün müikya khua tuita ningle zing;

⁵Hwome Hermon Lingnu khatokya pün lax Ilaxle thongnu fakngombu ang Lebanon angkya sedar pünbu lax.

⁶Khuacheilakbu zing ang hwome Bashan tokya zak pünbu lax; Saipras tokya pain pün füi hwome nang wakhuabu zing Ilaxle ibu ma luakzong apütle kox.

⁷Nang khuachei nyibu a nyidax füi zing, Ijip noke takkya nyidax a, Tsailo tokhangechu chwonpai ma ngün ang kople. Hünzom homtok hapnyi a müikya nyi füi zing, Saipras shuazo tokya nakle khikya nyi füi a.

⁸Nang khuachei mixbu a Sidon hia Arwad tokyabu. Mwt awankya nang khünakbu a khua ma humixbu changkya.

⁹Khua zingpabu A mwot anole laxdaokyabu Biblos nokbu changkya. Tinu mongto ahamkya khua pangwüi angkya ma humixbue Nang khua makhange thalex.

¹⁰“Parsia, Lidia, ilaxle Libia nok tokya süpahibue nang süpahibu mwot mok. Nang süpahi pombu ma hwome hwom di hia khohom, ibu bün. Nang hato fuazang apüikya a ibu changle.

¹¹Arwad tokya süpahibue nang katukbu nye, ilaxle Gamad tokya süpahi thome nang zanhunuibu nye. Ibue hwom dibu nang katukbu ma bün. Nang sün amüi fakya a ibu changpu.

¹²“Nange Spain nok to thalex ilaxle tuinabu okhonguile koxlaxle khop, jan, tam, ilaxle hotu ibu apüi.

¹³Grik, Tubal, ilaxle Meshek, ibu nok füi thalex ilaxle nang tha-juabu da hia wi, ibu shak ang kox.

¹⁴Beth Togamah nok tokya, mwot mok angkya man, azan angkya man, ilaxle mantsak, ibu shak ang nang tha-jua kox.

¹⁵Rod angkya khünakbue nang füi thalex; tinu kax to ngole tüikya onokbue nang tui-na shak ang luakzongbu hia chopünbu apüi kox.

¹⁶Siria khünakbue nang hato hang angkya tui-mwot hia zingle tsuakdaokya nang mwot-katbu huanuma apüile kox. Hwome hinghingbütkya thalix long, nyikhiknu, noksa apütle takkya nyi, müikya jaknyi, koral hia agat thalix long, ibu hangjokyali nang tui-mwotbu füi ashak-asün le pao.

¹⁷Judah hia Israel noke nang tui-na otha ang wonglai tsax, nax-ti, olip münga, ilaxle hingbu tsyasa ibu kox.

¹⁸Damaska angkya khünakbue nang hato hangjokyali tuinabu hia zingle tsuakdaokya nangmwot nangkatbu apüile kox, ibu mün to Helbon ang ju hia Sahar angkya muzi, ibu kox. Nang tuina ibu hanpak ang hwome thupdaokya janbu apüile kox.

²⁰Nang tuinabu hanpak ang Dedan nokbue ngwotnui ma nomkya nyinubu apüile kox.

²¹Arab nok hia Kedar nok apün-awangkyabue hangkya nang tui-mwotbu shak ang chun hosabu, chunbu, ilaxle zwonbu kox.

²²Nang tui-mwot hanpak ang Sheba hia Ramah nokbue nang ang likwünbu, hun, ilaxle hingbu tsyasa, ibu amüimüi kox.

²³Haran, Kaneh, ilaxle Eden tingnubu, Sheba angkya thalex mixbu, Ashur hia Kilmad tingnubu—ibu pangnusae nang füi thalex-juatai le chang.

²⁴Hwome otha lixkya nang nyibu, baxnat nyinu, noksa zingle takkya nyi, aza-apale zingkya wanlom-nyi, ilaxle müile fwonle zingkya zu, ibu hangle kox.

²⁵Hang angkya nang tui-mwotbu a tui-mwotbu pokya khua chongkyabu ma pao. “Nang a tinu khatokya khua tuita Müimamale hünzing laxle ngokya lailaile.

²⁶Chemtue nang khuachei mixbue tinu khatokya cheile alaipuix, Handünchi winjepe nang haxza füi atsaile ochu to jeple pao.

²⁷Hang-jo angkya nang tui-mwot pangwüi, Khua ma tüikya khuaham-mixbu pangnusa, Nang khua zingpabu hia thalex mixbu, Khua ma ngale tüikya süpahibu pangwüi— Pangwüi, komkaile tinu khato max Nang khua ti ma maxle changpongma a.

²⁸Ti ma maxkya khua ham mixbu akhongkya Haxza tokhange atat ang kop.

²⁹“Athax khua pangwüi dantoxdaoa, Khua ham mixbu pangwüi kakax to laidaoa.

³⁰Hwom pangwüie nang hanpakma mongto kakle sop, Hwom khang to haxbu füi fu ilaxle labu khato atui.

³¹Nang hanpakma hwome kho ong Ilaxle hwome nyikhwonbu awun. Hwom sople changpongma mongto tüle kak.

³²Hwome nang mangtsale tsai ngao: ‘Tair füi owa apyen ang thoüi, Athax tinu khato dangjale maxdaokya Tair füi a?

³³Chemtue nang tui-mwotbu tinu tale paopuix, Pangnok jating to khünaknue lomkya tuina apongle kox. Wanghom hwom tüinangkyabu ang achang Nange apongle koxkya tui-mwotbu makhange a.

³⁴Athax nang a tinu khato dütle maxün; Nang a tinu shinthuk othong alopün. Nang tui-mwot hia nang mwot mokle koxkya khünakbu Nang füi tomle tinu mongto maxdaoa.’

³⁵“Nang shoma ngünlaxle tinu kax ma ngole tüikya onokbu pangwüi abütle. Ibu wanghombu ngaxchu abütle, ilaxle hwom khangpong ma khomtsikya ahole.

³⁶Nang a samdaoa, tam ngünle toxüi münchang, ilaxle zangfang angkya thalex mixbu abüt-abanle, ilaxle nang shoma ma nak-womfa le chazale.”