Read Wancho Naga Ezekel 3 Bible Online

Ezekel 3 - Wancho Naga bible

Ezekel 3

¹Zang-e thüi: “Ziün angkya khünak, ija laitün saxlax; ifüima paokox üntoxle Israel khünaknu füi akaxkox.”

²Ikhoma kue ku wikha aka, ilaxle chixe ku ang ija laitün sax ang kox.

³Chixe thüi: “Ziün angkya khünak, kue nang ang koxkya ija laitün saxlax; ija füi nang wak afwot ang tomlax.” Kue ija sax, ija a ku zongma nax-ti büta tile tüikya.

⁴Ifüima Zang-e akax: “Ziün angkya khünak, Israel khünaknu hato paokox ilaxle kue nang füi chem akax ang tompuix ija akaxkox.

⁵Kue nang a nange chitsing mixnok zangwün ma wünkyabu hato apaokya münchang ikoxle Israel nok hato apaopu.

⁶Kue nang a nange hwom zangwün chitsingkya chongkya onok tuita hato apaokoxba, hwome nang zangwün to apase.

⁷Ikoxle Israel nok owaechu nang zangwün to apasele müntsupu; hwome ku zangwün to ngaxchu münapa. Hwom pangwüi kheba chithüikya mongtsakkya khünakbu changpu.

⁸Athax kue nang a hwom mong chemle kheba chithüile tüipuix ija ningle mongtsak mix tuita ang achangüi.

⁹Kue nang a chimok longnu tuita ningle tamchu thalix long tuita ningle tsak ang tomüi; ibu alün-aloxle tüikya khünakbu thua taxza.”

¹⁰Chizakle Zang-e akaxle: “Ziün angkya khünak, nathale apalax ilaxle kue nang füi zangwünkya pangwüi mong ma koplax.

¹¹Ifüima nang a zanda ang kople paothomkya nok hato paokox; hwome chiapakox apakox, ku JOWANPA Khüthak Zang-e hwom füi chemle akax ngopuix ibu apuale laxkox.”

¹²Ifüima Zang chasae ku nwon, ilaxle ku tokfüichi makhange tüle-tüle chongkya kaxzing tuita kue ile atat: “Zangkangting thakchi to JOWANPA fuazangkya achuak kox!”

¹³Kue zangwin to zünmokbue baozangbu tomle fitle azingkya atat, tamchu ochakanbu anguixkya zing bütixsi pongkya zing ningle atat.

¹⁴Ku hato JOWANPA tsak-zong tüle zongle hüi, ilaxle chix chasae ku tswonle paopongma ku hato mongtsik mongma hüi.

¹⁵Ikhoma ku Tel Abib to Kebar Shuanu zuito ngui, ilaxle kue chempang ngünle tamchu atatle laxdaopuix ibue lütle ku ikhato nyix anüt nui.

¹⁶Hanpak nyix anüt kaile lekya füima, JOWANPAe ku füi zangwün.

¹⁷Chixe thüi: “Ziün angkya khünak, kue nang a Israel nok to hu-mix ang zingpu. Kue nang ang fakya kaxkhün zangwünbu nange hwom hato taile ho angkya changle.

¹⁸Ikoxle kue owawa ochax khünak zi angkya changle le tsing ang tom ikoxle nange chix ang mong alüix angkya hanpakma chix ang ija kaxkhün chikox, chix a ochax ma wüi zile paole jangchang thüiningle ija zile paokya hünlit kue nang akhang ma khoüi.

¹⁹Ikoxle nang ija ochax khünak ang kaxkhün kox ikoxlechu chixe ochax mwot mokle wüi ngo, chix a ochax ma wüi ziüi, ikoxle ija khoma nang ma tsaitox kaxfekya müntüiüi.

²⁰“Müikya khünak owawa ochax mwot mok ang süt ilaxle kue chix hato thama ahüi, ija bama nange chix ang kaxkhün chikox thüiningle chix a zile paoüi. Chix a chix ochaxbu khoma zilaxpu: chixe mwotmüi mokle changdaokyabu texle münngo: ilaxle chix zikya bama kue nang ma feüi.

²¹Nange ija müikya khünak hama ochax chimok angkya kaxkhün koxle jangchang tamchu chixe nang ka ma lax ilaxle ochax mwot chimokle jangchang, chix a ozün ma ngoüi, ilaxle nang khüzün chuwüi kuimüi zangmale ngo ang tomüi.”

²²JOWANPA tsak-zong chongkya ku hato hüi ilaxle: “Zokox ilaxle haxsha to paokox”, le chixe ku füi zangwünkya kue atat.

²³Ikhoma ku haxsha to laile pao, ilaxle ikhato kue JOWANPA fuazang ngün, ija a kue Kebar Shuanu ta ma tamngün daokya ningle tüikya. Kue thün haxchi to ahole akhux,

²⁴ikoxle Zang chasa ku ma ngui ilaxle ku ajong. JOWANPAe ku ang thüi: “Hom to chatlax ilaxle nang hom hak üntoxle ngolax.

²⁵Ziün angkya khünak, nang to zu füi khadaoüi ilaxle nang a noknue ngünle tu to lai ang münthoüi.

²⁶Ibu alün-aloxle tüikya khünakbu hato kaxkhün zangwün fakya chitüi angkya hanpakmale kue nang le atangle thomüi.

²⁷Ifüima, chemtue kue nang tamchatle zangwün tamchu nang wün ang tsuakle chang ang tomüihex, JOWANPA Khüthak Zang-e akaxle ngokya kax nange hwom hato hoüi. Züizüie nang kax to apaüi ikoxle züizüie ojao chiapaüi, chemthüikoxle hwom a alün-aloxle hüikya jat-libu chang koxle.”