Read Wancho Naga Ezekel 31 Bible Online

Ezekel 31 - Wancho Naga bible

Ezekel 31

¹Kwom zanda ang kople paokya füima zanglao 11 lükya to lyetjang azom ma pongwang nyix kha, JOWANPAe ku füi zangwün.

²Chixe thüi: “Ziün angkya khünak, Ijip nok wanghompa hia chix khünaknu pangnusa füi akaxkox: Nang chemtukux tsak-zongle tüipuix! Kue nang chem füi apyen le wünüi?

³Nang a Lebanon angkya sedar pünnu tuita lailaile, Tüle osün müile, omua müikya pünkangbue awangle, Zangfwom to thule ojang tüle lole.

⁴Ija atsün ang ikhama ti tüile ngo, Ilaxle ija tux ang haxmong to shuajenbu tüile ngo. Ija pünnu nyemle tüikya khato ibue ti kox Ilaxle fao ma tüikya pün pangnusa hato shuasabu ahüi.

⁵Ija to ti müile koxle tüikoxle, Ija pün a mamabu füi ataitox le lole tsong. Ija angkya pünkangbu huanuma afak tamchu ojang lole tüi.

⁶Pünkang ibu ma osa nüjene ozopbu zing; Ija zangkhung to faomüibue hosabu puxle chang; Chix zangkhung ma chaxwannu nok jatlibue nazak kop.

⁷Ija pün osün chemtukux müikya dai— Ojang tüle lo, pünkangbu fak-fak-lak le tüi. Ija püntsing a haxmong tokya tijenbu ha alople ju.

⁸Zang tsawat mong angkya sedar tuita chu ija füi apyen ang chitho. Pün tüta ningkya angchu ija ningle okang-olang füi chitüi, Ija powan müikya ningle powan müikya pün tuita chitüi. Zang tsawat kha angkya pün ngaxchu ija ningle osün müikya tuita chitüi.

⁹Fak-fak-lak le ija pün sün kue amüi. Zang tsawat kha, Eden ma tüikya pün pangwüie ija to asing.

¹⁰“Zangfwombu ha alople tsongle tüikya ija pün to athax chemle chang angkya hex, JOWANPA kue akax fang. Ija chemtukuxle tsongle hüipuix itukuxle mongngam;

¹¹ikhoma kue ija awütdaoa, mixnok wangpa tuitae ija naxlaxkox. Ija pün ang ma ochax khoma ijae chem kopse hex, ija wanghompae naxkox.

¹²Chingcha chitüikya mixnok wanghome ija daküi ilaxle anguakle dantoxüi. Asex le atho daokya chix pünkangbu hia hopupabu haxhua hia haxbang pangnu khato chiakle changüi. Chix zangkhung ma ngole tüikya jat-li onok pangwüi paole samüi.

¹³Osabu nguilaxle nguakle ngokya ija pün to pople zoüi, ilaxle ija pünkangbu ding ma faomüibu ahamüi.

¹⁴Ikhoma athax makhange, tüta ningle ti müile kople ngokya pün changkoxchu ija lailaile zangfwom akaile okho adünle pün tuita chu müntsongüi. Ziün angkyabu ningle hwom pangwüi maxdaoüi, ilaxle amalumchi to ngole tüikyabu füi tomle ngoüi.”

¹⁵Ija a JOWANPA Khüthak Zang kax changpu: “Pün ibu amalum to lekya nyix, mangsopkya aho ang kue, haxmong tokya tibu füi ija to chwop ang tomüi. Shuajenbu kue tsyenle tuiüi ilaxle shuasabu jenle le ang müntom. Ija pün zile paoünkoxle, ija pünkangbu kue Lebanon Haxnu to apüiüi ilaxle faokha angkya pünbu zile zan ang tomüi.

¹⁶Chemtue kue ija amalum to ajoüihex, ija nguakle paokya ozing thoto chaxwannu nok alox ang tomüi. Eden angkya pünbu ilaxle zünle kopkya, okhonguile ti kople ngokya Lebanon Haxnu angkya pünbu ojapang amalum to ngole tüipuix ibu pangwüi chix nguakkya atatlaxle mongmüiüi.

¹⁷Ikhato ngole tüikyabu füi tomle ngo angkya hanpakma hwom a amalum to chix füi tomle dütüi. Ilaxle chix zangkhung ma ngole tüikya jat-libu a chaxwannu nok khato chiakle samüi.

¹⁸“Pün a Ijip nok wanghompa hia chix khünaknu changpu. Eden angkya pünbu ngaxchu ipong tsuale hia osün müile müntüi, ikoxlechu athax a, Eden angkya pünbu lailaile, ija a amalum to juüi ilaxle Zang chilax homtoxle ngokyabu zan ma mik maxkyabu füi tomüi. Kue ija kax akaxdaoa”, le JOWANPA Khüthak Zang-e thüile.