Read Wancho Naga Ezekel 36 Bible Online

Ezekel 36 - Wancho Naga bible

Ezekel 36

¹JOWANPAe thüi: “Ziün angkya khünak, Israel nok haxnubu füi zangwünle, hwom hanpak ang

²JOWANPA Khüthak Zang-e, ku ma tüikya kaxho ija to apa angkya akaxkox: Israel nok zanpabue hwom wanjaile akaxle, ‘Athaxpi kaikya haxnu ibu a kem kux changle!’

³“Aje-kox, ilaxle ku, JOWANPA Khüthak Zang-e akaxkya kax ija tsingang tomkox: Chemtue tomzi nokbue Israel haxnubu hwople koplaxle amale changpuix, noknusae Israel nok wanjaile chang.

⁴Idaile athaxpi, JOWANPA Khüthak Zang, kue, haxhuabu hia haxnubu, shuasa hia haxbangbu, amale dantoxkya onuibu, ilaxle khünak chingole dantoxkya pünle amatox tamchu tomzi nokbue chanyile tüikya tingnubu, hünzom pangnusa füi akaxkya kax to apahüi.

⁵“Ku, JOWANPA Khüthak Zang-e, ku mongtsik zangkham abakle tomzi nokbu füi akaxdaoa, tamnüile chu Edom nok füi akaxpu. Hünzome ajao-adakya füi tamchu zong ma laxle ku haxtok hia müi tsomnuibu laxle changpu.

⁶“Idaile Israel haxtok zongto aje-kox. Chaxwannu noke hwom to ajaole tamchu adix-adale changkya ngünlaxle, JOWANPA Khüthak Zang-e, kue, ku nüfux mongtsik füi zongbakle akaxkya kax, haxnubu, haxkhobu, shuasabu, haxshabu, ibu pangwüi hama wünkox.

⁷Ku, JOWANPA Khüthak Zang-e tsaosaxle thüipu, tomzi nokbu ang thünkhux-thajao koxüi jaojao.

⁸Ikoxle ku khünaknu Israel nok haxtok ma a, pünbu ma ochak chatle chuiüi ilaxle hünzom hanpakma ibue pünziak ziakle koxüi. Hünzom a lebama wüi hom to chatle ngui angkya changpu.

⁹Ku a Hünzom chima tüile, idaile kue thüipu, tütakoxlechu hünzom haxtok ma tamchatle thomo-manzaile puamün ang tom angkya changpu.

¹⁰Kue hünzom khünak huak pu-tsale chang ang tomüi. Hünzom a tingnubu ma ngoüi ilaxle pünle ama toxdaokyabu pangwüi chatle zingle amüiüi.

¹¹Kue ku khünaknu hia müibu pu-tsale chang ang tomüi. Hünzom a amipongma ile otuechu matüitox le tsaüi, ilaxle hünzom ang susabu huanuma tüiüi. Kue hünzom a ngohomkya ningle ikhama ngo ang tomüi, ilaxle amipongkya to kaile hünzom a ahak-alua ang tomüi. Ifüima hünzome ku a JOWANPA changpule awan ang kopüi.

¹²Kue Israel nok, hünzom ku khünakbu, ija haxtok ma ngo ang tamchatle apüiüi. Ija a hünzom haxtok ang changüi, ilaxle ikhama hünzom susa hwom tamchatle woknuak tilan ma ngo ang müntom.

¹³“Ku JOWANPA Khüthak Zang-e akaxpu: Haxtoke khünaknu saxle ilaxle ijae chaxwannue angkya hünzom naosombu pale laxle le khünaknue wünkya zangwün a otsing tomtata changle.

¹⁴Ikoxle athax makhange ijae khünaknu chisaxüi ilaxle hünzom chak tokya hünzom susa hwom pale chipaoüi. Ija kax, ku, JOWANPA Khüthak Zang-e akaxdaoa.

¹⁵Haxtoke she tha ajaole ngokya onok kax ma laxle chang angkya chichangba ija angkya khünaknue tsuile paokya ngün angkya oli chemchu müntüi. Haxtoke she ma tüikya khünak sasün hwom pale paokya müntüiüi. Ija kax, JOWANPA Khüthak Zang, kue akaxdaoa.”

¹⁶JOWANPAe ku füi zangwün.

¹⁷Chixe thüi: “Ziün angkya khünak, chemtue Israel khünakbu hwom haxtok ma ngole tüikya hex, hwom ngokya zanglom-saikha hia mokkya mwot makhange hwome ija chitsaokya haxtok ang achang. Kue hwom zanglom-saikha a shekobu tutsyen paole changpongma zanglom ma chitsaokya ang tüikya füi tuita ang laxpu.

¹⁸Hwome haxtok ma mix mik amütle changdaokya hia chapabu to shwomle haxtok chitsaokya ang achangkya khoma hwom füi tsikkya ku mongtsik janzüi füi kue hwom to po ang tompu.

¹⁹Hwom ngole hüikya hia mokle hüikya chitsaokya lomtang khoma kue hwom ajaopu, ilaxle hwom a mixnok chaxwan pangkha to chiakle sam ang tompu.

²⁰Hwome ojong khato paopuix, hwome ku otsao mün ama, chemthüikoxle khünaknue thüi: ‘Ibu a JOWANPA khünakbu changle, ikoxle hwome chix haxtok dantox angkya laipu.’

²¹Israel noke hwom apaopao pangnu khato ku mün amale changkyae, ku ang ku otsao mün tuitex le chang angkya hato ahüi.

²²“Idaile athaxpi, hwom hanpakma ku, JOWANPA Khüthak Zang ma tüikya kaxho Israel nok hato laxkox. Kue chem mok angkya tüipuix ija a hünzom Israel nok hanpakmale münchang, ikoxle hünzom apaopao pangnu khato amale thomdaokya ku otsao mün hanpak ang changpu.

²³Chemtue kue tüle chongkya tsaothakya ku mün: mün oja hünzome hwom tuntho to thajao ang tompuix, ija mwot makhange angaile aho pongma, hwome ku a JOWANPA changpule awan ang kopüi. Ija a JOWANPA Khüthak Zang, kue akaxdaoa. Chaxwannu nok hato ku a otsao changle le aho angkya hanpakma kue hünzom twonüi.

²⁴Pangnok jating tokya kue hünzom chatle hünzom chaxwan to apüiüi.

²⁵Kue hünzom to titsao füi saküi ilaxle kue hünzom pangwüi, chapabu mwot hia mama-mama hünzom chitsaokya ang achangle thomkya mwot pangwüi tokya atsaole danüi.

²⁶Kue hünzom ang tutex mongtsang hozün faüi. Kue hünzom ma tüile ngokya kax ma chilaxle künkhüi-mongdüi alaile awütüi ilaxle kax ma laxle tüi angkya künno-mongnaikya koxüi.

²⁷Kue hünzom ma ku chasa shole koxüi ilaxle hünzome kue fakya wanlombu hia kaxtombu pangwüi thomle changlaxma hexle ija to huüi.

²⁸Ifüima hünzom a kue hünzom putong hwom ang koxkya haxtok ma ngoüi. Hünzom a ku khünak ang changüi ilaxle ku a hünzom Zang ang ngoüi.

²⁹Hünzom chitsaokya ang achang angkya oli pangwüi chak tokya kue hünzom sünle thomüi. Hünzom hato tuinu nuaknu tamchihüi angkya hanpakma kue saxziakbu ang sütle saxtobu dün angkya kaxtom koxüi.

³⁰Hünzom pünziak-laimo hia haxtok manzai puamün müimamale atsatüi, ifüima zangfang ma otui-onuak hia tingtui chemchu chitüile ngoüi.

³¹Hünzome mokle changdaokya ochax hia thaikya mwotbu hünzome texle ataküi, ilaxle hünzom ochax lyenle hia thaile changdaokya khoma ma füi alüile nushix dongle changüi.

³²Israel khünaknu, kue ibu ile mokkya a hünzom hanpak ang mokkya münchangle hünzome awankoxle müisele thütpu. Hünzome mokle ngokya bama hünzom ang thünzak hia mongmakya naxtüi le texpu. Ija kax, JOWANPA Khüthak Zang, kue akaxpu.”

³³JOWANPA Khüthak Zang-e thüile: “Chemtue kue ibu ochaxbu tokya hünzom atsaole danpuix, kue hünzom a hünzom tingnubu ma tamchatle ngolaxle ibu zingle amüi ang tomüi.

³⁴Hünzom manzai haxtok to ahamkya pangnusae wüi ibu a fume limle fao ang achangkya ngün ang kopdaoa, ikoxlechu kue hünzom ang ibu haxtok ma tamchatle manzai ang tomüi.

³⁵Noknusa ija haxtok mo wünle, tam ija a faonu ang achangle toxdaokya ikoxle athaxpi Edem tsawatkha lailaile achangdaoa, tingnubu bakle atsunle, tsuile paole, komkaile amale toxdaokya, athaxpi khünak ngo tamchu pan zailaxle ziakople tüidaoale thüiüi.

³⁶Ifüima ozün ma tüikya tomzi nokbue, tamchatle tingnubu zingle amüikya hia manzaile haxtok ma ali-akanle chang ang tomkya a JOWANPA ku changpule awan ang kopüi. JOWANPA kue ija ile moküile tsaodaoa, ija mokle changüijao.”

³⁷JOWANPA Khüthak Zang-e thüi: “Israel khünakbu ang, tamchatle fonghüile ku füi akax ang tomüi, ilaxle kue hwom a chunzyem tsapupule khünak huak pu-tsale chang ang tomüi.

³⁸Anyix pünle ama thomkya tingnubu a, pangpwon tuk ma, tö ang kox ang apüikya chunbue Jerusalem awang pupule khünaknue awangle chang ang tomüi. Ifüima hwome ku a JOWANPA changpule awan ang kopüi.”