Read Wancho Naga Ezekel 38 Bible Online

Ezekel 38 - Wancho Naga bible

Ezekel 38

¹JOWANPAe ku füi zangwün.

²Chixe thüi: “Ziün angkya khünak, Magog haxtok angkya Meshek hia Tubal nokbu khama lompa akhokya Gog tha ajaokox. Chix adakox

³ilaxle JOWANPA Khüthak Zang, ku a chix zanpa changpule chix hama wünkox.

⁴Kue chix anguile ahamüi, chix nakua ma jankuix füi huküi. Chix süpahibu, manbu hia ibu khoma ngale talailaikya zapua laxlaxle o-echithole tüikyabu, di hia chang-paxbu koplaxle tüikya süpahibu pangwüi chix füi tomle linle paoüi.

⁵Parsia hia Etheopia tamchu Libia a chix füito tüile, ilaxle hwom pangwüi ma di hia khohom, ibu pangwüi tüile.

⁶Shuakuxchi Gomar hia Beth Togarmah haxtok tokya zankat naomüibu pangwüi chix füi tüile, ija ningle mama-mama onok tokya khünakbu chu tüihule.

⁷Chix ang achwonle ngo angkya tamchu chix süpahibu chix kaxtom kax ma laxle pangwüi achwonle chang angkya kax laxkox.

⁸Obiobi zanglao lekya füima, chaxwannu onok-onok tokya asox-asüilaxle apüile thomkya khünaknu, athax opang ochax-ozan chemthua za angkyachu chitüile ngole hüipuix, ibu to sing angkya hanpakma kue chix tomüi. Kaiponge wüi khünak chingo tamchu thom-manzaikya chitüile awütle thomkya haxtok, ojongkha ma athax chem chaza angkya chitüile khünakbu ngole tüipuix, ija Israel nok haxnubu to chixe singüi.

⁹Chix ilaxle chix süpahibu tamchu chix füi tomle chaxwannu onok obiobi koplaxle, zangchei zangwat bütale single ilaxle haxtok to zangfwom füi chwopkya ningle chwopüi.”

¹⁰Ija a JOWANPA Khüthak Zang-e Gog füi akaxkya kax changpu: “Chemtue ija hanpak nguile hüiüihex, nang mongto chichangle mok angkya ochax mongtex hüiüi.

¹¹Kothongaizakya nok, ojongkha to khünaknu mongsom ma tamchu tumüi-lomkhaole, pan ngax chizaile tamchu zanhukya chemchu chitüile chingcha-ashukle ngole tüikya, ija nok tingtakle chang angkya nang mongto zangwünle tsuaküi.

¹²Amipongma pünle ama thomkya tingnubu ma ngole tüikya khünaknu to thomjo laxle tsuile paoüi. Ibu a chaxwannu onok-onok tokya asüile asox thomkya khünakbu changkya, ikoxlechu athax hwom a chaxwannu lompongsox ma ngolaxle tsom-pom hia tingtok-tuinabu huanuma tüile ngokya.

¹³Sheba hia Dedan khünakbue ilaxle Spain tinglongbu tokya thalex mixbue nang ma atüiüi, ‘Nange nang süpahibu asoxlaxle ibu thomjole tamchu tsuile pao ang sing pia? Nange thoma ikhato hun hia khop, tsom-pom hia tuina, ibu huanuma bangüi üntoxle nang a ibu tsuile koplaxle chatüi le texlaxpia?’”

¹⁴Ikhoma JOWANPA Khüthak Zang-e, chixe Gog füi akax angkya ija kax tüikya chix hama apua ang ku tsanpu: “Athax ku khünaknu Israel nok chem chaza angkya chitüile ngoponge, nang a, shuakuxchi tsailo nok tokya

¹⁵chaxwannu nok tokya asüikya, huanuma tüikya süpahibu, pangwüi mankho ma ngalaxle, ibu thothut le nang laile achexüi

¹⁶Chaxwan alyem le zangchei zangwat hüikya ningle nange ku khünaknu Israel nok to singüi. Chemtue ija hanpak nguipuix, ipongma kue nang a, chaxwannu nok hato ku owahex ija aho angkya hanpakma ku haxtok to sing ang apaoüi, ilaxle ku otsao ngaile aho angkya hanpakma nang makhange kue mwot moküi.

¹⁷Kaintan towüi, ku dapa Israel nok ajebu makhange, nyixnyixta a Israel nok to sing angkya mix owawa kue apüiüi, le akaxle ngokya a nang mo wünle akax ngokya changpu.” JOWANPA Khüthak Zang-e, kue ija akaxpu.

¹⁸JOWANPA Khüthak Zang-e akax: “Oja nyix Gog-e Israel nok to single changüihex, ku ang huanuma mongtsiküi.

¹⁹Ku mongtsik mongkham füi kue akaxpu, ija nyix Israel haxtok ma bütix-tixnu siüi.

²⁰O-jux hia müi-nyax, chongkya hixkya zünmok pangwüi, tamchu chaxwannu thün ma ngole tüikya khünaknu ku thua zakyae abünle changüi. Haxnubu nguaküi, longzakzyenbu tsunüi, ilaxle long katuk pangwüi tsunle nguaküi.

²¹Kue Gog nok a thama-thomshix pangnuli thoto abüt ang tomüi. Ija kax JOWANPA, kue akaxpu. Chix khünakbue hwom chang-paxbu a tata to jannong alüi ang twonüi.

²²Okak-olak hia aji ajenkya füi kue chix to sikangünüi. Thuple thuple watkya zangwat hia jundütkya, ifüi tomle wün hia khat, ibu a chix tamchu chix süpahibu ding to anaolechu chix chikao ma sele tüikya mixnokbu ding to düt ang tomüi.

²³Ijaningle ku a achongkya tamchu otsao changpule zangfangja hato kue ngaile ahoüi. Hwome ku a JOWANPA changpule awan ang kopüi.”