Read Wancho Naga Ezekel 39 Bible Online

Ezekel 39 - Wancho Naga bible

Ezekel 39

¹JOWANPA Khüthak Zang-e thüi: “Ziün angkya khünak, Gog tha ajaokox. Chix a Meshek hia Tubal nokbu lompa tüichong changle, ilaxle ku a chix zanpa changpule thüikox.

²Kue chix a mama lomkua hozün to alyetüi ilaxle Israel nok haxnubu hato mangui-manguile chix a shuakuxchi tsailo nok tokya ahüiüi.

³Ifüima kue chix nongchi chak angkya hapnu hia chix tsaxchi chak angkya san fitle awütüi.

⁴Gog hia chix süpahibu tamchu chix füikya hozuibu Israel nok haxnubu ma omang ang achangle nguaküi, ilaxle kue hwom mangbu a osabu hia faomüibu süt ang achangüi.

⁵Hwom a kothofa to nguakle ziüi. Ija kax JOWANPA Khüthak Zang, kue akaxpu.

⁶Kue Magog haxtok hia tinu kax achole tüikya onokbu, ojong khato khünaknu owaechu chipox-chino le ngopuix, ikhato wüi laile changüi, ilaxle noknusa ang ku a JOWANPA changpule tsing ang tomüi.

⁷Kue tütakoxlechu ku khünaknu Israel nok ang ku otsao mün awan ang tom angkya wüi, ilaxle otuechu kue ku mün amale chang ang müntox. Ifüima zangfangjae ku a JOWANPA, Israel nok otsao Zang changpule awan ang kopüi.”

⁸JOWANPA Khüthak Zang-e akax: “Kue akaxle ngokya ija nyix a hüiüi jaojao.

⁹Tingnubu ma ngole tüikya Israel khünakbue paolaxle, awütle toxkya chang-paxbu a ha ang tak ang tswonle athünüi. Hwome zanglao anüt mong ma ojao chibakle, di, haxnu, sanhap, pax, pünthom, ibu füi wüntakle changüi.

¹⁰Hwome kotho tokya ha afox angkya tamchu faokha tokya pün dakle ngo angkya münchang, chemthüikoxle hwome tak ang okhonguile awütle toxkya chang-pax omangbu tüile. Hwom tuinabu tsui ilaxle hwom to chakmok-janlangle changdaokyabu pangnu to hwome chakmok janlangle changüi ilaxle hwom tuinabu tsuile laxüi.” JOWANPA Khüthak Zang-e ija akaxpu.

¹¹JOWANPAe akax: “Chemtue ibu pangwüi changle hüipuix, kue Gog ang Israel haxtok ikhato, Omang Molo Tinu zongma handünchi kao. Wünhammix Haxsha ma akhün angkya zukting koxüi. Gog hia chix füikya khünakbu pangwüi ima akhünüi, ilaxle ija haxsha ang ‘Gog Süpahibu Haxsha’ le nyaküi.

¹²Mangbu pangwüi akhünle haxtok atsao ang Israel noke lyetjang anüt laxüi.

¹³Onok ma tüikya noknusae mang ibu akhünkya mwot to asunle changüi, ilaxle ija mwot khoma tho-lünle changkya nyix kue hwom achuakle changüi. Ija kax JOWANPA Khüthak Zang, kue akaxpu.

¹⁴Ija lyetjang anüt kaile lekya füima, chizukyabu mang jangbangba ibu akhünle chaxwan tamchatle atsao angkya hanpakma haxtok faole aham angkya khünakbu zünüi.

¹⁵Khünak ibu dong-dong-ju le aham pongma, hwome khünak za-tuabu atakle changpongma, ija hozui ma fan watle toxüi, ilaxle akhün angkya khünakbu nguilaxle ibu paole hwome ‘Gog Süpahibu Haxsha’ ma akhünüi.

¹⁶(Süpahi mün ma ija hozui ma tinglong tuita tüi angkya changle.) Ikhoma haxtok a tamchatle atsaole dan angkya changle.”

¹⁷JOWANPA Khüthak Zang-e ku füi akaxle thüi: “Ziün angkya khünak, kue hwom hanpak ang achwonle thomkya tö sax ang pangnu chitokya o-juxbu sele asox kox. Israel nok haxnu ma ija a tuita chongkya püntut ningle changkya, ikhato hwom müibu sax ilaxle ajibu lingle chang ang thoüi.

¹⁸Hwome süpahibu tsangtsa müi sax angkya changle ilaxle chaxwan apün-awangle ngokyabu aji ling angkya changle; ibu pangwüi chunla, chun hosa, zwon, maihupong, ibu langkya ningle lang angkyabu changle.

¹⁹Chemtue kue khünak ibu tö tuita ningle langle changüihex, fao osabu hia faomüibue ibu ozao a wokfwot müile sax ilaxle ibu aji a tilan müile ling angkya oli changpu.

²⁰Ku tsap ma hwome wok ma shakya tukuxle man hia ija ahamkyabu, süpahi hia zankat mixbu sax angkya changpu. Ija kax JOWANPA Khüthak Zang, kue akaxpu.”

²¹JOWANPAe thüile: “Ku fuazangkya hia sukya kax füi apüi angkya hanpakma kue ku tsak-zong chemle twonpuix, ija kue zangfangja hato aho angkya changpu.

²²Ija makhange Israel noke ku a JOWANPA, hwom Zang changle le awan ang kopüi.

²³Israel noke ku zongto ochax lyenle changkya khoma hwom a mixnok chaxwan to zanda ang paole thomkya changpule zangfangjae tsing ang kopüi. Kue hwom hato tok aho ilaxle zan nokbue hwom to lütle zanhok ma hwom lang ang tom.

²⁴Hwom chitsaokya hia chichangchizangle tüikya khoma chem kopse hex ija hwom ang kox, ilaxle kue hwom hato tok aho.”

²⁵JOWANPA Khüthak Zang-e thüile: “Ikoxlechu athax kue Jakop susa hwom, Israel nok hato chingcha ahoüi, ilaxle hwom a tamchatle ahak-aluale chang ang tomüi. Kue ku otsao mün kho awa angkya changle.

²⁶Chemtue hwom ma haxtok ma tamchatle chem chaza angkya chitüile ngopuix, hwom aza-ana angkya mix owachu chitüile a, hwome ku khohangle changkya khoma apongle hüidaokya thama alakle asam ang tsuaküi.

²⁷Chaxwannu nok hato ku a otsao changpule aho ang, hwom zanpabu ngole tüikya chaxwan to ngole tüikya ku khünakbu, pangnok-jating tokya wüi tamchatle apüiüi.

²⁸Ipongma ku khünakbue ku a JOWANPA, hwom Zang changpule awan ang kopüi. Ija hwome awanüi, chemthüikoxle hwom a kue zanda ang koxle apaopu, ilaxle athax a tokfüi to tuita danle chitoxle asox-asüilaxle pangnusa wüi hwom haxtok to tamchatle apüile danpu.

²⁹Kue kue khünaknu Israel nok khangkho ma ku chasa thokle koxüi ilaxle hwom hato otuechu kue tok münaho. JOWANPA Khüthak Zang, kue ija akaxpu.”