Read Wancho Naga Ezekel 40 Bible Online

Ezekel 40 - Wancho Naga bible

Ezekel 40

¹Ija a, kwom zanda ang kople paokya füima zanglao 25 lükya tamchu Jerusalem pünle amakya füima zanglao 14 lükya, zangzün zangpua ma nyix 10 lükya changkya. Ija nyix kue JOWANPA tsak-zong chongkya ku ma nguile kue awanle lax, ilaxle chixe ku tswonle pao.

²Mikngün-ohün ma Zang-e ku a Israel haxtok to pao ilaxle haxnukho atsuakya khama dan. Kue ku tunthoma tingnu tuita lailaikya longhombu huanuma ngünle lax.

³Chixe ku hozui to soxle ahüi, ilaxle kue wi-jan lailaikya khünak tuita ngün. Chixe nyidax ningkya hia janlak ningkya thüt angkya jali chak ma koplaxle zünkai ma ajongle tüikya.

⁴Chixe ku ang thüi: “Ziün angkya khünak, hukoplax. Kue nang hama ahokyabu to zaxhun ma tamchu khile hukoplax, chemthüikoxle ija khomale kue nang ikhato apüipu. Nange chem ngünpuix ibu pangwüi nange Israel nok hama wünle kox angkya changle.”

⁵Kue chem ngünpuix, ija a Zangshwom-Hom changkya, ilaxle ija akhople katuk tüikya. Ija khünake thüt angkya janlak lax, ija a fak anyi lole tüikya, ilaxle chixe katuk thüt. Ija a fak anyi tsua fak anyi khaole tüikya.

⁶Ifüima chix a handün chito thakya zünkai hato hüi. Chix a chifün ma tingle dong, ilaxle okho to chixe fülom thütle ano, ija a fak anyi zule tüikya.

⁷Ija kai laxle, pangnyichi ma atale nyetmixbu ngo angkya nui azom füikya lyetlom oshua tuita tüikya. Nui ibu pangwüi olwot ojang tomwüi tüikyabu changkya, pangnuchi kao wüi fak anyi pong, ilaxle ibu obaba ma tüikya katukbu a fakta okao pong tütle tüikya. Nyetmixbu ngwotnui akailaxle lyetlom oshua tuita tüikya, ojang ma fak anyi lelaxle Zangshwom-Hom chito thale tüikya nui fülom hato le le tüikya.

⁸Chixe ija nui thütle ano ikoxle fak anyi okao zule bang. Ija thuile Zangshwom-Hom hato süsoxkya lyetlom ang lax, ilaxle ija ashukkya chakza chito katukbu a fakkao pong tütle tüikya. (

⁹

¹⁰Ija lyetlom ajale tüikya nyetmixbu ngwotnui a olwot-okhao tomwüi-tomwüi tüikya, iningle obaba to tüikya katukbu chuwüi tawüi-tawüi tütle tüikya.)

¹¹Ija füima, ija mixsüne zünkai ma tüikya lyetlom okhao thütle ano. Ija pangwüi athütle fak ali tüikya, ilaxle dapkya fülombu oba angkya onui a fak azom tüikya.

¹²Nyetmixbu ngokya nui pangnu tunthoma süthomdao le katuk tuita tüikya, ija a sok tukux tsuale tamchu sok tukux tütle tüikya. (Nuibu a ozem-ojong pangwüi sok azok pongle tüikya.)

¹³Ifüima chixe nyetmixbu ngokya nui katuk kaochi makhange kaochi kople thütle ano koxle katuk makhange katuk alople sok 24 bang.

¹⁴Ija nui chakzachi lopsha alople thongnubu tsyenle küile tüikya. Chixe ija nui thütle ano koxle okhao ma sok 23 bang.

¹⁵Fülom tokna angkya katuk makhange nui akiakya chakzachi katuk alople, ija lyetlom ojang ma sok 48 tüikya.

¹⁶Nui pangwüi ma toknachi kao angkya katuk hia nui-nui oba angkya katukbu ma hidao pong thangmikbu zole tüikya. Lyetlom chito thale tüikya nui katukbu ma pam pün muabu zingle tüikya.

¹⁷Ija lyetlom makhange ija mixsüne ku lopsha to dün. Toknachi katuk füi asaole nui 30 zaile tüikya, ilaxle ibu nui tunthoma long nunle zingkya onui tuita tüikya.

¹⁸Ija onui a lopsha akhople tüikya. Ija homtho lopsha a hommong angkya lopsha füi süthomdao le tüikya.

¹⁹Hommongchi lopsha to dong angkya fülom tsuadaole tuita tüikya. Ija mixsüne fülom anyi oba thütle ano, ikhama sok 96 bang.

²⁰Ifüima ija mixsüne kotho lopsha chito lekya shuakuxchi angkya fülom thütle ano.

²¹Lyetlom atale tüikya nyetmixbu ngokya nui azom, ibu obama tüikya katukbu, ilaxle nam-nopkya nui pangwüi ma othüt handünchi angkya füi tomwüi tomwüile bang. Ija lyetlom ojang ma sok 48 okhao ma sok 24 le tüikya.

²²Namnopkya nui, thangmikbu, iboma pam pün mua zingkyabu pangwüi handünchi fülom ma tüipupule tüikya. Ikhama fülom hato dong angkya chifün anüt zaile tüikya, ilaxle namnopkya nui ozongchi a lopsha chito thale tüikya.

²³Handünchi kao ma tüikya ningle ija lopsha akaile shuakuxchi fülom makhange mama lyetlom nuimong tokya lopsha hato alyetle tüikya. Ija mixsüne ija lyetlom anyi oba thüt koxle sok 96 bang.

²⁴Ija füima, ija mixsüne ku shuathong chito jo, ilaxle ikhatochu kukhie lyetlom mama ngün. Chixe ija katuk omongchi ilaxle namnopkya nui, ibu thüt koxle, ibu chuwüi mamabu lailaile bang.

²⁵Mama chito bangkya ningle ija lyetlom ma tüikya nuibu machuwüi thangmikbu tüikya. Ija lyetlom ojang ma sok 48 okhao ma sok 24 le tüikya.

²⁶Ikha alople dong ang chifün anüt zaile tüikya, ilaxle ikha angkya namnopkya nui chuwüi chakza chikao a lopsha chito ahole tüikya. Lyetlom chito ahole tüikya hommongchi katukbu ma pam pün omuabu zaile tüikya.

²⁷Ikhama chuwüi, nuilua angkya lopsha to alyet angkya lyetlom tuita tüikya. Chixe ija anyi lükya lyetlom atsaikya thüt koxle sok 96 bang.

²⁸Ija mixsüne ku shuathongchi lyetlom makhange nuilua tokya lopsha to apüi. Chixe ija lyetlom thüt, ikoxle ija chuwüi mama kao katukbu ma tüikya lyetlombu füi tawüi bang.

²⁹Ija ma tüikya nyetmixbu ngokya nuibu, namnopkya nui, ilaxle omongchi angkya katukbu thüt koxle pangwüi mama kao tokya lyetlombu füi tomkhak le bang. Ija lyetlom angkya nuibu ma chuwüi thangmikbu tüikya. Ija lyetlom a ojang ma sok 48 okhao ma sok 24 tüikya.

³⁰

³¹Ija ma namnopkya nuilua a mama lopsha chito ahole tüikya, ilaxle lyetlom fole katukbu ma pam omuabu apütle tüikya. Ija fülom ha alople dong ang chifün achyet tüikya.

³²Ija mixsüne ku handünchi fülom makhange hommong angkya lopsha to apüi. Chixe ija lyetlom thütle ano, ija chuwüi mamabu füi tomwüi bang.

³³Ima tüikya nyetmixbu ngokya nuibu, ija ma namnopkya nui, ilaxle ija angkya hommongchi katukbu thüt koxle mama lyetlom tokyabu füi tomkhak le bang. Ikhama chu, namnopkya nui to apüile akhopkhakle thangmikbu tüikya. Ija ojang ma sok 48 okhao ma sok 24 tüikya.

³⁴Namnopkya nui a homtho angkya lopsha chito hule tüikya. Lyetlom fole pam pün omuabu zingle apütle tüikya. Ija fülom ha alop ang chifün achyet dongle tüikya.

³⁵Ifüima ija mixsüne ku shuakuxchi zünkai to apüi. Chixe ija thüt, ikoxle ijachu mama kao tokyabu füi tomkhak le bang.

³⁶Ibu ma tüikya lailaile ija ma chuwüi nyetmixbu ngokya nuiluabu, aza-apale tüikya katukbu, namnopkya nuilua, ibu akhople thangmikbu, ibu pangwüi tüikya. Ija a ojang ma sok 48 okhao ma sok 24 le tüikya.

³⁷Namnopkya nui a homtho lopsha hato ahole tüikya. Ija lyetlom fole katuk ma pam pün omuabu zaile apütle tüikya. Ija fülom ha alop ang chifün achyet dongle tüikya.

³⁸Fülom angkya thongnu zui ma kahak namtüile nuilua tuita tüikya. Ikhama hwome zokle ashunle koxkya tö so.

³⁹Namnopkya nui ma anyi-nyi pong atale tsap ali tüikya. Tö ang kox angkya müibu, otom ma lanle zokle ashunle kox angkya tö wüi changlax, ochax tö hia tsangthom tö wüi changlax, ibu pangwüi hwome tö-tsap ibu ding ma lang.

⁴⁰Shuakuxchi fülom ma anyi pong atale homtho tochu ilailaikya tsap ali zaile tüikya.

⁴¹Tö ang kox angkya müibu lang angkya hanpakma tsap pangwüi athüt koxle 8 tüikya: ali a lopsha mong ma ali a homtho male.

⁴²Asop le tüikya nui ma tüikya tsap ali a, oja otom ma lanle zokle ashunle kox angkya töbu achwon ang twonpuix, ibu a long zütle zingkyabu changkya. Ibu a sok pong tsuale tüikya, ilaxle ibu othün a okhao ma sok anyi pong komkomle tüikya. Tö kox angkya müibu lang angkya chang hia bit pangwüi ikhama danle thom.

⁴³Ilaxle tö kox ang langkya fo to müi bünle asha thom angkya hanpakma katuk akhople chakbap pong ababa laxle fakbu bünle tüikya. Tö ang kox angkya müi pangwüi tsap ding ma danle thom.

⁴⁴Ifüima chixe ku a omong tokya lopsha to dün. Ija lopsha ma tsaingao mixbu ngo angkya nuilua anyi tüikya, tuita a shuakuxchi fülom chito ahole shuathongchi ma ilaxle ata a shuathongchi fülom chito ahole shuakuxchi ma.

⁴⁵Shuathongchi to ahole tüikya nui a Zangshwom-Hom ma thothale ngokya zompu-zangpabu ngokya nui changle,

⁴⁶ilaxle shuakux chito thale tüikya nui a tö-tsap ma thothale ngokya zompu-zangpa hwom ngwotnui changpu. Zompu-zangpa hwom a pangwüi Zadok sixli hwom changpu; Liwi hwom khama JOWANPA ngwotnui to donglaxle chix thothale chang angkya hwom tix zünle koppu, le ija mixsüne ku hama akax.

⁴⁷Ija mixsüne hommong angkya lopsha thütle ano, ija homkha ozem-ojong pangnyi ma sok 96 pong bang. Zangshwom-Hom a hannopchi kao ma, ilaxle ija tunthoma tö-tsap le tüikya.

⁴⁸Ifüima chixe ku a Zangshwom-Hom ma namnopkya nuilua to dün. Chixe ija lyetlom thütle ano: ija a sok azom zule ilaxle sok 16 khaole tüikya, ilaxle katuk a pangnuchi wüi sok 2 okao pong khaole tüikya.

⁴⁹Namnopkya nui to dong ang chifün zingle tüikya, ija a sok 23 khaole tamchu pangnuchi wüi sok 14 pong tütle tüikya.