Read Wancho Naga Ezekel 41 Bible Online

Ezekel 41 - Wancho Naga bible

Ezekel 41

¹Ifüima ija mixsüne ku a osungwa angkya Otsao Nui to apüi. Chixe ija nui to dongkya lyetlom thütle ano: ija a sok azok onui zule tüikya

²ilaxle sok 12 khaole tüikya, ilaxle katukbu a pangnu chima wüi sok aga pong khaole tüikya. Chixe ija nui jaojao thütle ano: ija a ojong ma sok 40 okhao ma sok 23 le tüikya.

³Ifüima chix a omong tokya nui to dong. Chixe ikhato nopkya lyetlom thütle ano: ija a sok anyi zule ilaxle sok anüt khaole tüikya, atale tüikya katukbu a sok 8 tütle tüikya.

⁴Chixe ija nui jao thüt, ilaxle ija a ojong ozem sok 23 pong tüikya. Ija nui a osungkha angkya nui le ma tüikya. Ifüima chixe ku ang thüi: “Ija a Ataxkya Otsao Nui changle.”

⁵Ija mixsüne Zangshwom-Hom longhom omongchi angkya katuk thütle ano koxle sok 5 tüle bang. Ija katuk füi asaole, Zangshwom-Hom akhople, sok 6 onüipong khaole tüikya nuisabu ta füima ta le tüikya.

⁶Nui ibu a homthün azom ma tüikya, homthün foto nui-nuibu füi tüikya. Zangshwom-Hom angkya homthün otok katukbu a fang angkya homthün katukbu füi süpakdao-süpakdaole tüikya, ikoxle ibu to bele thom angkya chitüi koxlechu tata katuk kho ma athongle mongle ngo ang tsuak.

⁷Ikhoma Zangshwom-Hom katukbu, chemtue tatok tokhange ngünpuix, homkho alople kotho katukbu a tomwüi tütle paokya ningle ngün ang tsuakle tüikya. Zangshwom-Hom kotho katuk füi asaole, nuibu kotho to, chifünbu zingle long dixtua anyi tüikya, ilaxle ija makhange homtho homthole homthün kho akiakya to alople osungwa angkya nui ma paxle dong ang tsuakle tüikya.

⁸Nui ibu tokna katukbu a sok 5 pong tütle tüikya; Zangshwom-Hom shuakuxchi kao ma nuibu to dong angkya fülom tuita tüikya, ija lailaile shuathongchi angkya nuibu to dong ang chuwüi fülom tuita tüikya. Kue Zangshwom-Hom akhople sok 5 pong khaole shat fang ashale zingle tüikya ngün, ija a hax makhange sok 7 tsuale tamchu Zangshwom-Hom katukbu ma homkha füi ajitkya ozit tüikya füi ajit le tüikya. Homtho shat-sha hia zompu-zangpabue laxkya longhombu obama sok 23 khaole homtho-sha tuita tüikya, ilaxle ija a Zangshwom-Hom füi shuile tüikya.

¹²Homtho-sha otua ma Zangshwom-Hom hannopchi zong ma longhom tuita tüikya, ija a ojong ma sok 84 ozem ma sok 59 le tüikya; ija katukbu a akhople sok azok pong tütle tüikya.

¹³Ija mixsüne Zangshwom-Hom tokna makhange, homtho-sha atüitüi pangwüi womle komkaile thüt koxle sok ma 96 bang. Ilaxle Zangshwom-Hom toknachi tokhange, homtho-sha chuwüi womle hannopchi ma akiakya longhom womle thüt, ima chuwüi sok ma 96 bang.

¹⁴Zangshwom-Hom homthochi, homtho-sha chuwüi womle thüt koxle sok ma 96 bang.

¹⁵Chixe Zangshwom-Hom homjang hannop chito thütle pao, pangnyichi angkya nui dingkhobu chuwüi womle thüt koxle sok ma 96 bang. Zangshwom-Hom ma namnopkya nui, Otsao Nui, ilaxle Ataxkya Otsao Nui,

¹⁶ibu pangwüi to pün füi, wakhua makhange thangmikbu alople chwople tüikya. Thangmik ibu a hak ang tsuakle tüikya.

¹⁷Zangshwom-Hom hommongchi katukbu a, kahakbu kho kaile tsuale tüikya, ilaxle ibu pangwüi noksabu zingkya komkaile pam pün hia ozang füikya zünmokbue chwople tüikya.

¹⁸Pam pün hia zünmokbu adaodao le, nui nui awangle zaile tüikya.

¹⁹Pam pün mua chito thün ahole tüikya khünak thün, ilaxle pün chito othüne hule tüikya tüchi angkya mailang thün, zünmok ibu ma othün anyipong zaile tüikya.

²⁰Wakhua makhange kahakbu kho akhople, katuk awangle ibu ile wüi zingle tüikya

²¹Otsao Nui angkya kapoxbu a zongzongzüi le tüikya. Ataxkya Otsao Nui to dongüi tunthoma

²²pün tö-tsap ningle tuita tüikya. Ija a sok azom tsuale tamchu sok anyi okao khaole tüikya. Ija nukzong angkya thong, ija chifün, ilaxle ija homsambu a pün füi zingle tüikya. Ija mixsüne ku ang thüi: “Ija a JOWANPA ngwotnui ma tüikya tö-tsap changpu.”

²³Otsao Nui to dong angkya lyetlom oshuk ma kahak tuita tüikya ilaxle Ataxkya Otsao Nui to dong angkya lyetlom oshuk machu kahak tuita tüikya.

²⁴Ibu a otanti makhange afithole dapkya kahakbu changkya.

²⁵Otsao Nui kahakbu ma, katukbu ma tüikya ningle a pam pün hia ozang füikya zünmok muabu zinglaxle tüikya. Ilaxle namnopkya nui to dongüi fülom kothochi a pün füi chwople tüikya.

²⁶Ija nui homsamchi ma thangmikbu tüikya, ilaxle katukbu a pam pün noksabu zingle aza-apa laxle tüikya.