Read Wancho Naga Ezekel 47 Bible Online

Ezekel 47 - Wancho Naga bible

Ezekel 47

¹Ija mixsüne ku Zangshwom-Hom dünlom to laxlaxle chat. Zangshwom-Hom homthün thale tüikya chima, ija dünlom makhange handün chito jenle jule ti fuakle laingokya kha tuita tüikya. Ija shuasa a Zangshwom-Hom shuathong chikao makhange tö-tsap zongma shuathongchi akaile jenle ju.

²Ija mixsüne ku Zangshwom-Hom wankam angkya ku shuakuxchi zünkai makhange tatok to alai ilaxle handün chito thale tüikya zünkai akhople aham. Ija zünkai zongma shuathong chikao makhange shuasa tuita jenle jule tüikya.

³Chix chak angkya thütkya janlak makhange ija mixsüne shuasa handün chito fak ma fak 560 thütle ju ilaxle ku ang ija shuasa fole ju angkya akax. Ikhato ti a ku chiding to tüikya.

⁴Ifüima chixe anaolechu fak 560 tamthüt, ikoxle ikhato ti a ku chikuxkho to bang. Tamchatle fak 560 thütle jukoxle ti a ku khiadax to bang.

⁵Chixe tamchatle fak 560 thüt, ikoxle ikhato ti a müimamale zule chang koxle ku fole ju ang chitho. Ikhato ti a akhaile lüwüi chichangba ahamle tang chimüile zule bang.

⁶Chixe ku ang thüi: “Ziün angkya khünak, ibu müile akhax koplax.” Ifüima ija mixsüne ku shuakax to alai.

⁷Kue ikha alopkya zuma, ikhato shuakax atale pünbu huanuma ngün.

⁸Chixe ku ang thüi: “Ija ti a handünchi kao to jenle Jordan Haxsha to ngui ilaxle Omang Tinu alop. Chemtue ija Omang Tinu to jenle dütpuix, ijae chix ma tüikya titsao Tinu kha tokya humti füi alüix.

⁹Ojongkha to ija shuasa jenle jupuix, ikhato faomüi-janyax pangwüi tüiüi. Ija shuasae Omang Tinu kha tokya ti titsao ang achangüi, ilaxle ija chempang khato jenle jupuix, ijae khüzün apüiüi.

¹⁰Engedi shuasa makhange Eneglaim shuasa ha alople, tinu kax ma nyaxkop mixbu tüiüi, ilaxle hwome ikhato hwom shabu lom e changüi. Mediterenian ma tüikya tukuxle ikhato nyax oli afikle tüiüi.

¹¹Ikoxlechu tinu kax ma tüikya fatua hia tüküibu angkya ti a titsao ang chiachang. Ibu a hum alai angkya otong ang ngole nui.

¹²Shuasa kax pangnyichi ma wüi süt koxkya tuita ang saxli pünziak füikya pünbu nyemüi. Ibu pünchak otuechu dütle münpao, ilaxle ibue oziak ziakkya otuechu ahuale münngo. Ibu ma lyetfo le pünziak hozünzün ziakle ngoüi, chemthüikoxle ibu a Zangshwom-Hom makhange jenle jukya shuasae ti koxle. Pün ibue süt koxüi, ilaxle ibu pünchak ang khünaknu kak amüi ang twonüi.”

¹³JOWANPA Khüthak Zang-e thüi: “Homjen 12 bama ahanle lax angkya haxsüt longzibu a ibu changle; ikhama Jusep homjene othom anyi kop angkya changle.

¹⁴Kue ija haxtok hünzom ang kox angkya hex-ole hünzom putong hwom füi kue tsaotsütle changdaoa, idaile athax hünzome ija tomwüi-tomwüi tom-hanle laxlax.

¹⁵“Shuakuxchi longzi a Mediterenian Tinu makhange handün chitole le Hethlon tingnu hia Hamath Lomnu kai laxle Zedad tingnu,

¹⁶ilaxle Berothah hia Sibraim tingnu nyi (tingnu ija nyi a Damaska wangting hia Hamath wangting nyi zo ma tüile), tamchu Tikon tingnu (ija a Hauran haxsüt longzipong ma tüile) to nguile tüile.

¹⁷Ikhoma shuakuxchi longzi a Mediterenian makhange handün chito Enon tingnu chitole le, shuakuxchi ma Damaska hia Hamath nyi longzi füi azitle hüile.

¹⁸“Handünchi longzi a shuathong chitole le, Damaska hia Hauran nyi haxsüt füi azitkya makhange, hannopchi ma Jordan shuanu a, hannopchi ma Israel nok ilaxle handünchi ma Gilid nok füi long azile, Omang Tinu ma tüikya Tamar to nguile le.

¹⁹“Shuathongchi longzi a shuathong-hannop chitole le Tamar makhange Kadesh Meribah ma tüikya faothwop alop, imakhange Ijip nok longzi achole le le Mediterenian Tinu alop.

²⁰“Hannopchi longzi ang Mediterenian thuile lax, imakhange shuakux chito dongle Hamath Lomnu zongma hannopchi ma laile.

²¹“Ija haxtok a hünzom homjenbu bama tom-hanle laxlax;

²²ija a jento hünzom kux ang ngoüi. Hünzom khato ngole tüikya mixnokbu ilaxle opange ikhato supux-sapaile ngole tüipuix, hwome chuwüi hünzome ija haxtok tom-hanle changpongma hwom süntswon kop angkya changpu. Ibu to Israel nok nokpu tuita ningle huüi ilaxle hwome chuwüi Israel nok homjenbu füi tomle hwom haxtok kop angkya hanpakma chizing tswon ang tom angkya changle.

²³Ngole tüikya mixnok wünpa ibue, hwom opupu füi tomle ngole tüipuix, ibu Israel nok homjenbu khato hwom haxsüt kop angkya changle. Ija kax, JOWANPA Khüthak Zang, kue akaxpu.”