Read Wancho Naga Ezekel 6 Bible Online

Ezekel 6 - Wancho Naga bible

Ezekel 6

¹JOWANPAe ku füi akax,

²“Ziün angkya khünak, Israel nok haxhuabu to hulax ilaxle ibu hato ku kaxho laxkox.

³Israel haxhuabu hama JOWANPA Khüthak Zang kax atat angkya akaxkox:JOWANPA Khüthak Zang, kue, haxnu, haxhua, longkun longlua hia haxsha: Onüi ibu, ojong khato khünakbue chapabu to shwomle tüipuix, ibu ama ang kue changlo apaoüi.

⁴Tötsapbu a atsunüi ilaxle ongan müikya so zokkya tö-tsap a pünle awütüi. Ekhato tüikya khünakbu a hwom chapabu tunthoma langüi.

⁵Kue Israel khünakbu mang chiakle saiüi; kue hwom za-tuabu a tö-tsapbu akhople chiaküi.

⁶Israel nok tingnubu pangwüi amaüi, ikoxtix hwom tö-tsap hia chapabu bakle thuple akhixüi, hwome ongan müikya so zokkya tö-tsapbu thuple amaüi, ilaxle hwome zingkya oli chemchu ngün ang chikople amütüi.

⁷Khünakbu a pangkhato wüi langüi, ilaxle opang ozün ma toxlaxpuix hwome ku a JOWANPA wüi changpule ngaiüi.

⁸“Kue züizüi changlo fang ma lamse azangle pao ang tomüi ilaxle hwom a pangnu khato chiakle sam ang tomüi.

⁹Hwom ikhato zandabu ang achangle ngoüi. Ekhato hwome ku tikle laxüi ilaxle hwom to sikangünkya hia zak akopkya a, ku changpule hwome awan ang tomüi, chemthüikoxle hwom hopa hwome ku to mongong chithomkya künmong füi jatle awüt ilaxle chapabu to mix künle kop. Ilaxle mae mokle hüikya ochax hia zakkop mwotbu khoma hwome alüile thajao wünhai ataküi.

¹⁰Hwome ku a JOWANPA changpu tamchu kue hwom to ohua to aza-anakya münchangle tikle laxüi.”

¹¹JOWANPA Khüthak Zang-e akaxle: “Hünzom chak akhaokox! Hünzome chithom thongkox! Israel noke mokle hüidaokya chichangchizang mwot hia zakkop mwot, ibu hanpakma mongmale sopkox. Hwom a chax-zan ma chichangba woknuak ma chichangba kaklak ma mik max angkya changle.

¹²Tsailo to ngokyabu, hwom kaküi ilaxle zile paoüi; nuisox to tüikyabu zan ma maxüi; ozün ma tüikyabu a woknuak ma ziüi. Hwome ku mongtsik janzüi ibu pangwüi apongle hüiüi.

¹³Mangbu a chapabu tham to tamchu tö-tsapbu akhople chiaküi, haxkho tsuale tüikya pangkhato chiaküi, haxnukho pangkhato chiaküi, püntong hex athüithüi to chiaküi ilaxle zak pünnu tong to tiale chiaküi, hwom chapabu ang tö koxle changkya pangkha towüi chiaküi. Izuma tix noknusae ku a JOWANPA wüi changpule awanle laxüi.

¹⁴Changpu, kue ku chak thüiüi ilaxle hünzom chaxwan amütüi. Shuathongchi sak-hax makhange shuakuxchi ma Riblah tingnu alople kue oziak chidünkya haxtok ang achangüi, ile Israel nok ngole tüikya ojongkhachu danle müntox. Ifüimatix ku a JOWANPA jao changpule noknusae awanle lax ang kopüi.”