Read Wancho Naga Danel 11 Bible Online

Danel 11 - Wancho Naga bible

Danel 11

¹Chix a ku to fong angkya hia ku kho awa angkya bama hünlit laxkya mix ang changle.

²Ilaxle athax kue nang füi chem akax angkya tüipuix ija a otsingtomtata changpu.” Kaxtaimix-e thüi: “Parsia nok a wanghom azome apünüi, ifüima ali lükya ibu pangnusa füi huanuma ahak-aluale tüikya wanghome apünüi. Chix ahak-aluale tüikya hia tsak-zongle tüikya ma mongchong laxle chixe Grik wangting tsiaüi.

³“Ifüima naomüi mong füikya wanghom tuita ngaiüi. Chixe haxtok chongkya to ole apünüi ilaxle chix mongtextex ma mokle changüi.

⁴Ikoxlechu chix ile tsak-zongle ngopongkhae chix wangting a othom ali ang achangle ahak-ahanle paoüi. Chix man ma chix makhange hüikya chichangkya wanghom tuitae apünüi, ikoxlechu chix ma tüikya tsak-zong ibu ma müntüiüi.

⁵“Ijip nok wanghompa a huanuma tsak-zongle tüiüi, ikoxlechu, chix süpahi lompa hwom khama tuita ma ataxle tsak-zong tüiüi ilaxle süchongkya wangting chixe apünüi.

⁶Zangpua sükaile changkya füima Ijip nok wanghompa-e Siria nok wanghom füi nokmüi ang changüi ilaxle chix ang sasün sacha aju-asomle koxüi. Ikoxle ija nokmüi a okuilole chingoüi, ilaxle she, she kakopa, she sasün ilaxle she füi tomle nguikya dabu pangwüi langle awütüi.

⁷Alüile chingo homtoxle she füikya mamix wüi wanghom ang achangüi. Chixe Siria nok süpahibu to singüi, hwom pan daple dongüi, ilaxle hwom to anaoüi.

⁸Ibu nok baozangbu ang atsaole koxle tüikya baozang chapabu hia khopbu chixe Ijip nok to laxlaxle chatüi. Ile obibi zangpua hexle tumüile ngofüima

⁹Siria nok wanghome Ijip nok tingtakle changüi, ikoxlechu chix a anongle achatüi.

¹⁰“Siria nok wanghompa sasün hwome azan ang achwonüi ilaxle süpahibu huanuma asoxle changüi. Hwom kha angkya mixsün tuita a tichen lailaile thule zan-nokbu zanhunui to single changüi.

¹¹Chix mongtsik ashukle Ijip nok wanghompa a Siria nok zan to kaüi ilaxle chix süpahibu huanuma hwople kopüi.

¹²Chix a ija zanhok ma süpahibu huanuma lang ang thokya hia chixe wüi lütle tsuakkya khoma chix a tüle ngamle changüi.

¹³“Siria nok wanghompa a anongle chatüi ilaxle amipongkya to kaile chixe süpahibu tamchatle asoxüi. Chemtue asukhakkya hanpak nguile hüipuix, müile zankat mandaokya süpahibu koplaxle chix a anongle chatüi.

¹⁴Ipongma khünaknubue Ijip nok wanghompa füi alünle ajongüi. Ilaxle Danel, nang chaxwan angkya tüle shixkya khünakbue, hwome mikza ma ngünle laxkya oli tuita tüikya khoma alünle ajongüi, ikoxlechu hwom towüi anaoüi.

¹⁵Ikhoma Siria nok wanghompa-e ziakop laxle thomkya tingnu hwople kopüi. Ijip nok süpahibue azankya zaküi; hwom khama naomüipa ma ngaxchu azan angkya janzüi chitüile changüi.

¹⁶Hwom tingtakle nguikya Siria khünake hwom to chix mongtextex ma hwonüi, chix füi alün angkya mix chitüiüi. Chix a Tsaotsüt Haxtok ma ajongüi ilaxle chix chak ma pangwüi kopüi.

¹⁷“Siria nok wanghome, chix süpahibu pangwüi koplaxle, chaxwan khuakhople aham angkya mongzangwünle tsuak. Ifüima, chix zanpa hwom nok amüt angkya hanpakma chix füi nokmüi zingle sacha wangchasa aju-asomle kox; ikoxle ija mix mwot a tsuakle chihüi.

¹⁸Ifüima chixe ibu nok to tinu makhange nguilaxle singüi ilaxle süchong tukux hwople kopüi. Ikoxle mixnok lompa tuitae chix to lütüi ilaxle chix mong ngamkya oshuk ang achangüi; ile chixe Siria nok wanghompa mongngam ma hato alüile ahüilaxüi.

¹⁹Wanghompa a chix haxtok angkya zanhunuibu to chatle chatüi, ikoxlechu chix to lütüi, ilaxle ija a chix shuk shukya ang changüi.

²⁰“Chix man ma mama wanghom tülaiüi; chixe chix wangting ma tuina ma ahak-aluale chang angkya hanpakma, chixe chix khünaknu ma süisaile, onok chix fangfang ma wüi thom angkya hanpakma nguakax-wangkhobu tsanle apao. Alüile chingo homtoxle ija wanghompa a langle awütüi, ikoxle ngaithole münchang chichangba zanhok ma münchang.”

²¹Kaxtaimix-e chizakle wünle pao: “Siria nok ma ifüi angkya wanghom a, wanghom ang chang ang jao chiasukya ochax khünak tuita changüi, ikoxle chix a texle-chile ngopongkhae lailaxle huxtsing-loptsang makhange chix a wanghom ang achangüi.

²²Owawae chix kax to anongle lanle jangchang, Zang thothapa Nguakho wüi changlax, chixe otam chitoxle amüt.

²³Chixe haxtok hidaoküsa wüi apünkya mix changkoxchu, nokmüi zingzing laxle chixe mixnokbu dyen, ilaxle chix ma tsak-zong sütüi-sütüile tüile pao.

²⁴Tüinangkya nok to chixe athule single hüi ilaxle hwom pupabu owaechu chimokkya mwot chixe mok. Ifüima hwome zan ma kopkya tuinabu chix füito azuile changkya khünakbu füi ahanle lax. Chixe mix zan chwonbu to sing angkya olom zing, ikoxlechu chix hanpak-zanghan a chwonle wüi paoünüi.

²⁵“Chixe Ijip nok wanghom to sing ang mongchong laxle süpahibu huanuma zingle alai; ibu a hwom füi tsak-zong huanuma tüikya süpahibu füi azan ang achwon angkya changle. Ikoxle Ijip nok wanghompa a dyenüi ilaxle chixe chithoüi.

²⁶Jali olom adangle fale chix füi sümüile sox-nam ngokya mixe chix dyenüi. Chix süpahibu a huanuma langüi, ilaxle chix zankat naomüibu a bakle amütüi.

²⁷Ifüima ija wanghom anyi tomle fongsax ang tsap tuita ma thungüi, ikoxle hokhi mongtex a oma changüi, ilaxle hokhie tata dyenle changüi. Hwome chem kopse tsupuix, ija hwome chikopüi, chemthüikoxle ile chang angkya hanpak a mahüi.

²⁸Siria nok wanghompa a chixe hwople kopkya tuinabu koplaxle hom to chatüi, ikoxle chix mong ma a Zang khünakbu zanglom oli thule amüt angkya. Chix zongma chemle müipuix chixe ile moküi ilaxle chix haxtok to chatüi.

²⁹“Ofüima chixe Ijip nok tamchatle singüi, ikoxle izuma a mamali le changüi.

³⁰Rom nokbu khua ma nguiüi ilaxle chix abaxüi, ilaxle chix aza-anale changüi. “Ifüima chix mongtsik ashukle chatüi ilaxle Zang khünakbu zanglom amüt ang azongüi. Ija zanglom ahaile dantox daokya khünakbu kax ma chixe laxüi.

³¹Chix süpahibu züizüie zanglom ma otsao chichangkya Zangshwom-Hom zingle alaiüi. Hwome nyixfo to koxle ngokya tö kox zaküi ilaxle Nushix Dongkya. Mwot alaiüi.

³²Wanghompa dyenkya makhange chixe ma zanglom awütle toxdaokyabu machi ma kopüi, ikoxlechu Zang mantole ngokyabue anongle azanüi.

³³Jetüi-hwonzaikya lompabue hwom je-hwon khünakbu füi tomhanle changüi. Ikoxlechu onox ma hwom züizüi a zanhok ma langüi, ilaxle züizüi angkya tuina tsui paoüi ilaxle zandabu ang achangüi.

³⁴Ile mix lang mix-mixhuakkle ngopongma, hwomkha to womkya züizüibue mahuak hanpak ang mokle changkoxchu, Zang khünakbue ofong-otsox hidaole kopüi.

³⁵Hwom kha angkya jetüi-hwonzaile tüikya lompabu züizüi a langle awütüi, ikoxlechu ija a khünaknu atsaokya ang changüi. Ija a, Zang-e tyale thomkya hanpak ashukle machang tanto chizakle ile wüi ngoüi.

³⁶“Siria nok wanghompa-e chix mongtextex ma moküi. Chix a baozang pangnu füi chix wüi achongkya changpu, Khüthak Zang füi ngaxchu chix wüi achongkya le angam.

³⁷Chix pupa hwome thothale hüi baozang tamchu shekobue mongkünkya baozang, ibu wanghompa-e ajao-ahaile changüi. Changle, chixe baozang pangwüi ajao-adale changüi, chemthüikoxle chix mongto ibu pangwüi füi chix wüi achongkya changpule chixe thüt.

³⁸Itülüi, zanhunui ziakople thomkya baozang towüi chixe achuak-achen. Chix pupa hwome shwom-tole machangkya baozang ang chixe hun, khop, likwün hia thalix hingho chakzunbu koxle changüi.

³⁹Chix zanhunui pan nyele ziakop angkya hanpakma, chixe mixnok baozangbu to shwomkya khünakbu danüi. Chix a lompa tuita changpule pongle kopkyabu to chixe e-sele chang ilaxle hwom a nguakax-wangkhobu ang achang ilaxle chix hingho chaktwon ningle chixe hwom ang haxtok koxle changüi.

⁴⁰“Chemtue Siria nok wanghompa hato hanpak oshuk nguile hüipuix, Ijip nok wanghompa-e chix to single changüi. Siria nok wanghome, man-kanlin, man hia khua, ibu chixtsak chix ong koplaxle zongbakle anongle azan. Tichen lailaile chixe obibi nok to hexle singüi.

⁴¹Chixe Tsaotsüt-Haxtok to lünle tingtakle hüiüi ilaxle jatbün jattsa to lünle jao langüi, ikoxlechu Edom, Moab hia Amon nok to ota toxle changkyabu a paole azangüi.

⁴²Chemtue chixe ibu haxtokbu tingtakle changüihex, chixe Ijip nok ngaxchu danle müntox.

⁴³Ijip nok ma khomle thomkya hun hia khop tamchu mama tuinabu chixe tsui paoüi. Chixe Libia hia Etheopia. Nok to ngaxchu lütle kopüi.

⁴⁴Ikoxlechu handünchi hia shuakux chitokhange hüikya kaxhoe chix ang mong ahiküi, ilaxle chix ziamale jao, khünaknu huanuma langle jao azanüi.

⁴⁵Chixe chongkya chix wanghom Nyihom tinu hia haxhua nyi zo ma, Zangshwom-Hom ajongle tüikya khama zingüi. Ikoxle chix to asunle fa angkya mix tuita chitüile chix a zile paoüi.”