Read Wancho Naga Danel 7 Bible Online

Danel 7 - Wancho Naga bible

Danel 7

¹Babilon nok ma Belshazzar wanghom ang achangkya pongwang lükya zanglao ma, kue zangnak ma wünmang chito mikngün-ohün tuita ngün. Kue ija wünmang laiza ma kop, ilaxle ija a ija zale kopkya

²kue ngünkya wünmang changle: Zangwin ang pangnuchi tokhange jeple ngo ilaxle molo tinu thün a tichape awangle tüikya.

³Tinu kha tokya chongkya müi ali laile hüi, ilaxle müi ibu a mai mali.

⁴Pongwang angkya müi a mailang lailaile ngün, ikoxlechu ola ningle ozang füi tüi. Kue hule ngopongma ozang ibu a dütle pao. Ija müi ding to nom ilaxle tangthole ajong ang tom. Ifüima ija ang khünak khangka kox.

⁵Anyi-lükya müi a chep lailaile ochak wüi tsuathale ajong. Ijae samlapza azom tap le tüikya, ilaxle kaxzing tuitae chix füi akax: “Nange chemtukux sax ang thopuix itukux müi saxle ngokox!”

⁶Kue hule ngopongma, mama müi tülai. Ija a fuachax lailaile, ilaxle ija otok ma ozang ali tüikya, ilaxle ija ma okhang ali tüikya. Ijae apün-ada angkya janzüi to hule ngo.

⁷Kue hule ngopongma wüi ali lükya müi lai. Ija a tsak-zong huanuma tüikya, khompuatsik le za-adünkya müi. Faix-tangtangkya jan wa füi akopkop shaole sax, ilaxle chixe ibu to cha füi nakle tox. Mama müibu füi ajele ija ma ozong bün tüikya.

⁸Kue hule ngopongma, ibu ozongbu obama mama zongzün tuita dongle hüikya kue ngün. Ijae laile ngoünkya ozong azom butle adüt. Ija müizong ma khünak mik hia tun tuita tüikya, ija tun makhange kax achongchong akax.

⁹Chemtue kue hupuix, wanghom tüntongbu onui ma dan. Jento ozün ma ngole tüikya tüntong tuita ma thung. Chix nyi a jun büta tsele tüikya, ilaxle kho a paiput tsaotsao ningle tüikya. Ochakan füikya chix tüntong a wünle wüi khisumle tüikya,

¹⁰ilaxle ija makhange wün shua jenle tüikya. Ikhoma chix thotha angkya khünakbu a hajat-hajat tüikya ilaxle chix tunthoma khünaknu a o-e chithole ajongle tüikya. Kaxfün angkya khwa ka mwotwang, ilaxle laipexbu dap.

¹¹Kue hule ngopongma, ija müizong ahixpüsae zamanle tsaichong-kaxbong ngokya zing kue atat. Kue hule ngopongma wüi ali lükya müi langle awüt, ilaxle chix mang a wün chuale ngokya khato tswonle awütle max ang tom.

¹²Mama müibue matsak mazongzong laxlaxle pao ikoxlechu ibu a onox tuita ozün ma ngo ang dan.

¹³Zangnak ma kue ija wünmang ngünle ngopongma, kue khünak ningkya tuita ngün. Chix a kuchi to hüile ngokya. Chix a zangfwome akankhople tüikya, ilaxle chix a jento ozün ma ngole tüikya hato hüi ilaxle ija ku ang kox.

¹⁴Apün-awang angkya tsak-zong, münchong, hia wangtsak-wangzong chix ang kox, ilaxle zangfang angkya khünaknüsa pangnu jat-lie chix thothale chang ang tom. Chixe apün-awangkya ma oshuk müntüiüi, ilaxle chix wangting münashuk toxüi.

¹⁵Kue ngünkya mikngün-ohüne ku mong asale awütle, ilaxle wün ang chimüile ku mong atwop le.

¹⁶Ikha ajongle ngokyabu kha angkya tuita hato ku dong ilaxle ija chem hanpak-hexle atüi. Chixe ija chem hanpak-hex ija ku hama wünle fa.

¹⁷Chixe thüi: “Ibu chongkya müinu-nyaxpabu ali a chaxwannu ma lai angkya wangting ali hanpak changpu.

¹⁸Ilaxle Khüthak Zang to shwomkya khünakbue ija wangting apünkya tsak-zong a hwom chak ma kopüi ilaxle ija jento hwom chak ma thomüi.”

¹⁹Mama müibu füi ajele tüikya ija müinu ali lükya bama kue tamsüile awansele tsu, chemthüikoxle ija a zazabazikya müi tamchu chixe akopkop pangwüi wi-jan chakkhin hia jan wabu füi ibu ashikle akhix ilaxle ibu ding ma chix cha füi ting.

²⁰Ilaxle kue chix khang ma tüikya müizong bün bamachu tsingle laxse tsu, tamnüile chu ofüima zongzün tuita donglaxle tüi ngoünkya ozong azom adüt. Ija ma omikbu hia otun zailaxle tüikya. Ija füi tüile tsaingam-kaxngam le zangwün; ija bama kue tsingle laxse tsu. Ija a mama müibu pangwüi füi za-adünle tüikya.

²¹Kue hule ngopongma, ija müizonge Zang khünakbu füi azan ilaxle hwom to anao.

²²Ifüima othuithuima ozün ma ngokya mix ngui ilaxle Khüthak Zang khünaknu chima sele kaxfün kaxzakdünle akax.

²³Ija bama ku hama akhixle wünle fakya a ija changle: “Müinu-nyaxpa ali lükya a chaxwannu ma lai angkya wangting ali lükya changpu; ija a mama wangting pangfüi wüi ajele tüiüi. Ijae tix zangfang pangwüi thuple akhixüi ilaxle ija to cha füi naküi.

²⁴Ilaxle müizong bün a ija wangting ma apün angkya wanghom bün hanpak changpu. Ifüima mama wanghom tuita laiüi; ija wanghom a tüile ngokya mama wanghombu füi aje thole tüiüi ilaxle wanghom hwom azom to lütlaxle chixe hwom dyetüi.

²⁵Chixe Khüthak Zang adix-adale akaxüi ilaxle Zang khünakbu to zothuple changüi. Chixe ibu zanglom tüikya wanlombu hia hwom pangpwonbu mamale lüi ang azongüi, ilaxle chix tsak-zong chak fang ma Zang khünakbu a zanglao azom lyet azok ngoüi.

²⁶Ifüima zangkangting kaxfün khwa ma kaxfün ang thungüi, ilaxle chix tsak-zong chix angkya paoüi, ilaxle chix a okothomle amütüi.

²⁷Zangfang angkya wangtingbu tsak-zong hia chuak-chongkya pangwüi Khüthak Zang khünakbu chak to koxüi. Ija chongwang wangting a tam münmax, ilaxle chaxwannu angkya apün-awangle tüikya noknusae chix thothale chix kax ma laxle ngoüi.”

²⁸Ija ba angkya zangwün ibibi ma ashukle. Ibu ngünlaxle ku huanuma za ilaxle thün huishole chang, ilaxle kue ibu pangwüi ku hanpakma mong ma akhax-adangle thom.