Read Wancho Naga Danel 8 Bible Online

Danel 8 - Wancho Naga bible

Danel 8

¹Belshazzar wanghom ang achangkya zanglao azok lükya to, kue anyi lükya mikngün-ohün tuita ngün.

²Mikngün-ohün chito ku a allele Elam haxtok angkya long katuk füi tuklaxle tüikya Susa tingnu ma nui. Ku a Ulai Shuanu zui ma ajongle tüikya,

³ilaxle ija shuajen zui ma kue ozong lowüilole tüikya chunla tuita ngün, oja ozong tuita a ata füi ataitoxle lo ibomachu zongzün dongkya ningle tüikya.

⁴Kue ija chunlae ozong füi, hannop, shuakux hia shuathong, ibu chito thukya to hule ngo. Chemningkya müiechu ija abax ang chitho chichangba chix tsak-zong thoto paole azang ang chitho. Chixe chix mongtsutsu ma mok ilaxle owachu e-sele chichang.

⁵Ija chem hanpak chang koxpu, le ku khosam ashukle ngopongma, hannop chitokya zwon tuita zikle nguiüi kue ngün; ija zwon ochae hax to chilyet hia lyetkya nyi bama momle zik. Chix ang omik anyi obama shingmongle ozong tuita tüikya.

⁶Shuanu kax ma ajongle kue ngünle chunla chito, chix janzüi ibibile zongbakle zikle hüi.

⁷Kue chixe ija chunla to thule ngokya to hule ngo. Chixe ija chunla to mongtsik ashukle zongbakbak ma thule ija angkya ozong anyi adüt. Ija chunla ang alün angkya janzüi chitüile chang. Chix a hax to thule anguak ilaxle ocha füi nak, ilaxle chix chak tokya ija khose ang owa ngaxchu chitüi.

⁸Ija zwon a sisile azo-angamle chang, ikoxle chix zaxzangle tüipongkhama chix ang ozong khaile pao. Ija man ma ozong ali shingmongle laile hüi; ozong ibue machi chito hile tüikya.

⁹Ija müizong ali kha angkya hixkya müizong tuita lai; ija tsak-zong a shuathongchi hia handünchi ilaxle Tsaotsüt Haxtok chikao to o-le tüikya.

¹⁰Ija a zangkangting süpahibu hia lyettsibu füi jao azan ang tsuakle janzüi tüile chong, ilaxle ijae züizüi a hax to tswonle awüt ilaxle ibu ding ma cha füi ting.

¹¹Ijae zangkangting süpahi khama Wanghom ngaxchu chitsaokya ang achangle, chix ang nyixfokya to koxle ngokya tö kox azak, ilaxle Zangshwom-Hom ama.

¹²Tö koxle ngokya otya tö koxle changkya füi khünaknue ochax lyen ilaxle otsingtsing zanglom a haxkha to tswonle awüt. Ijae mokkya pangnu lom ma ija müizonge tsuakle hüi.

¹³Ifüima kue kaxtaimix tuitae ata kaxtaimix ma ile atüikya atat: “Ija mikngün-ohün ma ngünle ngokyabu chemtukux okuilole ngoüi? Nushix dongkya ochax nyixfokya to koxkya tö füi chemtue alüixle ngünüi? Zangkangting süpahibu hia Zangshwom-Hom to chemtukux cha füi tingle thomüi?”

¹⁴Mama kaxtaimixe lankya kue atat: “Ija a 2, 3000 zangnak hia zangngai, oja bama tö chikoxle zakle ngoüihex, ibibi wanmong ma ngoüi. Ifüima Zangshwom-Hom a tamchatle ajongüi.”

¹⁵Ku-a ija mikngün-ohün a chem hanpak chang koxpule awan ang azongle ngokya, ipongkhae allele ku tunthoma owawa ajong.

¹⁶Ulai Shuanu akaile owawae nyakkya ozing kue tuita atat: “Gabriel, chixe chempang ngünlaxpuix ibu chem hanpak-hexle chix hama wünle laxkox.”

¹⁷Gabriel nguilaxle ku hama ajong, ikoxle ku huanuma zalaxle hax to akhuxle nguak. Chixe ku füi akax: “Ziün angkya khünak, ija chem hanpak-hex awanle koplax. Ija mikngün-ohün a chaxwannu shuk hanpak changle.”

¹⁸Chix akaxle ngopongma ku a haxkha to nguak, ile ku ang khangka sam. Ikoxle chixe ku to künle kop, ku cha ma ajongle kox,

¹⁹ilaxle akax: “Kue nang hama Zang mongtsikkya zuma chemle changüihex ija ahole ngopu. Mikngün-ohün a chaxwannu shuk hanpak changpu.

²⁰“Nang müizong anyi füikya chunla tuita ngünkya a Medi hia Parsia nyi wangting hanpak changpu.

²¹Zwon a Grik wangting hanpak changpu, ilaxle, ilaxle omik anyi bama shingmongle ozong tuita tüikya a pongwang lükya wanghompa hanpak changpu.

²²Ija müizong tuita pakle paokya füima müizong ali laikya a, owang pongkya ningle tsak-zongle chichangkya wangting ali ang achangle wangting ija ahan pao angkya hanpak changle.

²³“Chemtue wangting ibu ashuk angkya otu nguile hüipuix, ilaxle sikngün koptangle chemtue hwom chichangchizangle changpuix, ipongma küntsak-mongtsak le changkya tüle huxtsing-loptsang füikya wanghom tuita laiüi.

²⁴Chixe tüle tsak-zongle apünüi: ikoxle chix tsak-zong makhange le münchang. Chixe chongkya thama adünüi ilaxle chix mwot pangnu ma chixe tsuakle changüi. Chixe tsak-zong tüikya khünakbu hia Zang khünakbu hato chongkya thama apüiüi.

²⁵Chix ile huxtsing-loptsang wanghompa tuita changkya khoma, chix huxtsing-loptsang mwot ma chixe tsuakle changüi. Chix a ma bama alüile huanuma mongngamkya tüiüi ilaxle kax-o ngao-o chithüile khünaknu huanuma amütüi. Chixe wanghombu pangwüi thakma wanghompa ngaxchu amaüi, ikoxlechu chix a khünak tsak-zong chilax homtoxle amütüi.

²⁶Hansong hia swomsae tö koxle changkyabu bama oja nang hama apuale fadaopuix, ibu a changle ngaiüi. Ikoxlechu athax ija a huxsa ma thomlax, chemthüikoxle ile changle hüi thoma athax chuwüi hanpak huanuma tüile.”

²⁷Obibi nyix hex ku a mongmale tamchu kakle ngo. Ifüima ku zo ilaxle wanghompa-e ku ang koxle thomkya mwottho to ajong, ikoxlechu ija mikngün-ohüne ku je-apale awüt ilaxle ija chitsingtsuak.