Read Wancho Naga Hosia 10 Bible Online

Hosia 10 - Wancho Naga bible

Hosia 10

¹Israel khünakbu a oziak füikya grep zu ningle tüikya. Hwom chemtukux ahak-aluale tüipuix, itukux lüile hwome tö-tsapbu zing. Hwom haxtok ma chemtukux puamün ang koppuix, itukuxle osün amüile hwome shwomle ngokya longlobu zing.

²Khünak opang mong mix dyenkyae awangle tüipuix, athax hwome ma ochax khoma sikngün apong angkya wüi, Hwom tö-tsapbu Zang-e pünle awütüi ilaxle hwom otsao longlobu amaüi.

³Lebama wüi ibu khünakbue thüiüi: “Kwom ang wanghom müntüi chemthüikoxle kwome JOWANPA thua münza. Wanghome kwom ang chem alan faüi?”

⁴Hwome chemchu chichangkya kaxbu zexle ilaxle othai to tsaosaxle tamchu katzua laxle. Manzai haxtok ma khunhing füikya hingzang nyemkya ningle sukya tsaifün-kaxwün a chisukya tsaifün-kaxwün ang achangle.

⁵Samaria tingnu ma ngokya khünakbu a zaüi ilaxle hwom hun maihupong samkya bama ija mang sople changüi. Bethawen ma. Hwom ilaxle ija chapa thothale ngokya zompu-zangpabu ija mang sopüi. Osün müile aza-apua thomkya ija hun sikle awütkya zuma hwom pangwüi sopüi.

⁶Ija chapa a Asiria nok to tuita chongwang süi ningle koxle apaoüi. Hwome mixkax saxle hüikya khoma Israel khünaknu a chingcha angkya chitüile asamüi ilaxle zakkop ang tomüi.

⁷Titok to püntho chwotkya ningle hwom wanghom a kople paoüi.

⁸Awen angkya haxhua ma zaile tüikya baozang to shwomkya otsao nui, ojongkha ma Israel khünakbue chapabu to shwompuix, ija a amaüi. Hwom tö-tsap ding ma hingzang hia kongbüi-zu nyemüi. Khünaknue haxnubu nyaklaxle: “Kwom khomhüi!” tamchu haxhuabu nyaklaxle “Kwom to chwop-hüi!”, le thüiüi.

⁹JOWANPAe thüi: “Israel khünaknue Gibeah ma ochax lyenkya makhange wanglaxle ku zongto ochax lyenle ngokya mazak. Ikhoma Gibeah zane hwom ha alopüi.

¹⁰Ibu ochax khünakbu to kue singüi ilaxle sikngün ang tomüi. Jat-libu hwom zan to ka ang athütüi, ilaxle hwome mokle hüidaokya ochaxbu khoma hwom ang sikangünüi.

¹¹“Hanpak tuita ma Israel khünakbu a, tsaxnak ang achwonle tüikya, mwot anodaokya maihu ningle tüikya. Ikoxlechu osün müikya hwom dingkux ma mui-dang alikle kox angkya kue mongzangwünle tsuakdaoa ilaxle sütsakkya mwot mok ang she atsangüi. Kue Judah ang han ma be ang tomdaoa ilaxle Israel-e muidang linüi.

¹²Kue thüi: ‘Hünzom hanpakma haxzün khutlax, ilaxle ku to jop-tole changkya mohiman ma kopkya puamün hünzome zütlax. Ija a, ku, hünzom JOWANPA hato mongchat angkya hanpak changle, ilaxle ku nguilaxle hünzom ang mohiman thokle koxüi.’

¹³Ikoxlemix hünzome ochax mix ali-akan ilaxle ija puamün züt. Hünzome hünzom kaxthai zangwün makhange alaikya pünziak saxdaoa. “Hünzome hünzom man-kanlinbu to tamchu huanuma tüikya hünzom süpahibu to mongongkya khoma,

¹⁴hünzom khünaknu hato zan-hok hüiüi, ilaxle hünzome ziakople thomkya zanhunuibu komkaile amaüi. Ija a wanghompa Shalman-e azanlaxle mixnu naosom pangwüi langle changpongma Betharbel tingnu amütkya nyix ningle changüi.

¹⁵Bethel angkya khünaknu, hünzom to chang angkya a ija changle. Ija a hünzome mokdaokya khom-atsikkya ochaxbu khoma changüi. Zanhok owang wangkya füi tomle Israel wanghompa ziüi.”