Read Wancho Naga Hosia 2 Bible Online

Hosia 2 - Wancho Naga bible

Hosia 2

¹Ma füikya Israel nok “Zang khünaknu” tamchu “JOWANPAe Mongkünkyabu”, le nyakkyabu.

²Ku naosombu, hünnu to jox-naile changlax: she ku zongto kakonu tuita chichang koxlechu, ilaxle ku chix kakopa ang chichang koxlechu. Chinunchakkai hia ma tsangtsa hangle ngokya she mwot shongzak-hüile jox-naile akaxlax.

³She-e ojao na chitha thüiningle, pux pongma she chemle tüikya dai, ile ohua ang achangle she to kue chakmoküi. Kue she a chem pünsa-zuasa chinyemkya haxzan ningle achangüi, ilaxle she a tilan ma ziüi.

⁴Kue she naosombu hato chingcha münaho; hwom a zakmax-thünba le tsangtsa hang laxle kopkya naosom changle. She jaojaoe thüile: “Ku a ku mongkün hwom hato paoüi: hwome ku ang sütling hia tija, toxnyi hia nyidax, olip münga hia grepti-ju, ibu pangwüi koxle.”

⁶She tsyenle thom angkya hanpakma kue hux pün füi tsawat azün ilaxle katuk swon angkya changle.

⁷She a ma mongkün hwom füito ziküi ikoxle she-e hwom kop ang münthüi. She-e hwom lomüi ikoxle hwom chiataküi. Ifüima she-e thüiüi: “Ku a owang pongkya ku kakopa hato chatüi: athax pongkya füi ku chifün amipongma wüi sümüikya changpu.”

⁸She-e she ang saxziak, grepti-ju, olip münga, ilaxle she-e Bal baozang to shwom ang twonkya khop-jan hia hun, ibu pangwüi kue koxpule otuechu chiawan.

⁹Ikhoma puamün tukma kue fakya saxziak hia grepti-ju hingho chatle laxüi ilaxle she-e awun ang koxkya toxnyi hia nyidax, ibu pangwüi kue achatle laxüi.

¹⁰She mongkün hwom tunthoma kue she to chakmoküi, ilaxle kutsak kuzong chak tokya she owaechu pale tüi ang chithoüi.

¹¹Kue she mongmüi-pwonla ashuk ang tomüi: zanglao, lyetjang hia hatdang to puale saxlax ngokyabu a: she zanglom tusoxbu pangwüi a.

¹²She mongkünbue hwom mongzom amüi ngokya khoma koxkyabu le she-e apu-achangle tüikya grep zubu hia fupsa pünbu kue amütüi.

¹³She-e Bal baozang tuntho to so zokle tamchu she likwünbu aza-apua laxle she mowünpabu füito ziküima ku alakle asamkya tu-wan hanpakma kue she to sikangünüi.

¹⁴Ikhoma kue she a tamchatle sak-hax to paoüi; ikhato kue she a ku mongkün zangwünbu füi mongchat ang tomüi.

¹⁵Kue she kux grep haxtok achatle koxüi ilaxle tingtui haxsha a monghom kafülom ang achangüi. She Ijip nok tokya nguitanto, she tuita naocha ma tüipongma ku kax to lankya ningle she-e ikhato ku kax to lanüi.

¹⁶Ifüima tamchatle she-e ku ang ma kakopa le nyaküi: athaxpi she-e ku a Bal baozangle chinyaküi.

¹⁷Kue she ang tamchatle Bal mün lünle chang ang müntom.

¹⁸Ipongma kue faomüi janyax pangwüi füi tsaotsütle changüi, ikhoma hwome ku khünaknu to thomzün maklax ang müntomüi. Kue hwom haxtok angkya zankat chang-pax pangwüi awüt faüi, changlo hia hapnu, ibu pangwüi, ilaxle ku khünaknu a tumüi ma chaza angkya chitüile ngo ang tomüi.

¹⁹Israel, kue nang a ku kakonu ang zingüi; Ku mongong ma thaithaxkya müntüiüi; Kue nang hato chizakle mongkün hia chingcha ahole ngoüi ilaxle jento nang a ku kux ang achangüi.

²⁰Kue ku kaxtsao thomüi ilaxle nang a ku kux ang achangüi, ilaxle nange ku a JOWANPA changpule ngaiüi.

²¹Ipongma kue ku khünaknu Israel nok zangjop to lanüi. Kue chaxwan tok to zangwat ang tomüi, ilaxle chaxwane saxziak hia grep ziak ilaxle olip, ibu puamün ang tomüi.

²³Ija haxtok ma kue ku khünakbu zingle alaiüi ilaxle hwom ahak-aluale chang ang tomüi. “Mongkün Chikopkyabu”, le wünkya pangnusa hato kue mongkün ahoüi. “Ku khünaknu Münchang”, le awüt thomkyabu hatochu ku mongkün tüiüi. Kue thüiüi: “Hünzom a ku khünaknu changle”, ilaxle hwome lanüi: “Nang a kwom Zang changle.”