Read Wancho Naga Hosia 4 Bible Online

Hosia 4 - Wancho Naga bible

Hosia 4

¹Ija haxtok ma ngokya khünakbu hanpakma tsaitox-kaxfekya zangwün apüi angkya JOWANPA ma kax tüile. Israel, chixe chem akaxpuix ija to apalax: “Haxtok ma mongong hia mongkün müntüi, ilaxle khünaknu ku ang Zang changpule mün-e.

²Hwome tsaosaxle chang ilaxle ibu a chithom; hwom atse, mix mik amüt, ahux, ilaxle chinunchakkaile chang. Zikmüt mangkho onüi, tuita füima tuitale mikmüt mwot tsale hüi.

³Ikhoma haxtok a zanle paoüi, ilaxle ima ngokya pangwüi zile paoüi. Faomüi hia o-jux pangwüi, janyax to lünle zile paoüi.”

⁴JOWANPAe thüi: “Owaechu khünaknu ma tsaitox-kaxfekya tamchu samakya taxtüi: ku kaxthup-ngaotün a nguapabu hanpakma changpu.

⁵Zangnak zangngai hünzome mix fün amale ngo, ilaxle ajebu chu hünzom füi onüi müipule chichang. Kue hünzom honu, Israel max ang tomüi.

⁶Hwome ku ang ku le chinyakkya khoma ku khünaknu a maxdaoa. Hünzom nguapabuechu ku mün laxsele chitsu ilaxle ku hwon-nwot jaono awütle chang, ikhoma kue chu hünzom chilaxle awütdaoa tamchu hünzom su-sabu a ku nguapabu changpule kue e-ma münlax.

⁷“Hünzom nguapa chemtukux huanuma tüipuix, itukuxle hünzome ku zongto ochax lyen, ikhoma kue hünzom achuak-achenkya a e-me chilaxle tüikya ang achangüi.

⁸Ku khünaknu ochax tokhange hünzom ahak-aluale tsong, ikhoma hwome ochax sisile naxlyen le hünzome thüt.

⁹Khünaknu füi tomwüile hünzomechu sikngün apongkya tüiüi! Kue hünzom to sikngün ang tomüi ilaxle hünzome achax daokya tsangthomle chang ang tomüi.

¹⁰Hünzome tö koxkya kha angkya hünzom süntom saxüi, ikoxlechu wokno-tilanle wüi ngoüi. Oziak-opua fa angkya baozang to hünzome shwomüi ikoxlechu hünzom ma su-sa chitüile ngoüi, chemthüikoxle mama baozangbu füito azuiüima hünzome ku hato tok ahodaoa.”

¹¹JOWANPAe thüi: “Ju, odom hia ozia pangnyie ku khünaknu ang hwom tutex asam ang tom ngole!

¹²Hwome pünfunsa tuita ma mikngün ohün lomle ngole! Kiathox tuitae wüi hwom hama hwome chem tsingse tsupuix ija awankoxle! Hwome ku dantoxdaoa. Mixcha tuita tsangtsa hangkya mixcha ang achangle paokya ningle, hwome ma alüile mix baozangbu chak to koxdaoa.

¹³Hwome haxnukho to otsao nui to töbu koxle, ilaxle haxhuabu to chongkya pünnu hia fakfakchak le tüikya pünnubu tong to hwome so zokle shwomle, chemthüikoxle ija zangkhung zakzui ang müile tüikoxle! “Ikhokhoma, hünzom sacha hwom tsangtsa hangkya shekobu ang achang, ilaxle hünzom nomcha hwome chinunchakkaile chang.

¹⁴Ikoxlechu ija khomale kue hwom to sikngün ang müntom, chemthüikoxle hünzom tomtata ngaxchu baozang shwomnui to ngokya tsangtsa hangkya mixcha hwom hato paokoxpu, ilaxle ibu füi tomlaxle hünzome bao shwomle töbu koxkoxpu. Wanwün kax ma tüikya ningle, ‘Tutex chizaikya khünakbu maxüi.’

¹⁵“Israel khünaknu hünzom ku zongto mongong chitüile tüikoxchu, Judah hwom tix ile tix taxnaktüi hom a. Gilgal chichangba Bethawen, ma shwom tole taxchang chichangba ikhama ozün ma tüikya JOWANPA mün ma tsaotsütle taxchang.

¹⁶Israel khünakbu a mansabu lailaile mongwüi batuk le. Wundom to chun tuxkya ningle kue hwom chemle tuxthoüi?

¹⁷Israel khünaknu a chapabu chajik-muashem fang ma tüile. Hwom ma lom to naxle-kox.

¹⁸Hwome tokle ju lingkya füima, tsangtsa hangkya ma mongzom müi, ilaxle chingcha chitüikya chifün mix achuaksele tsu.

¹⁹Hwom a zangwin to jeple paopupule paodaoüi, ilaxle hwom a songsaribu koxkya töbu. Bama azak zi