Read Wancho Naga Hosia 5 Bible Online

Hosia 5 - Wancho Naga bible

Hosia 5

¹“Ija to apa koplax, hünzom nguapabu! Mongkoxle apalax, Israel khünaknu! Apalax, wanghom füikya haxnu-homsabu! Hünzome sukya olom ma kaxfün fase changhupu: ikhoma kaxfün a hünzom khangkho ma dütüi! Hünzom a Mizpah ma nutkya tai ang achang, Tabor haxnu ma pünkya sha ang achang,

²Akasia Tingnu angkya tswomkha ang achang, ilaxle kue hünzom pangwüi to sikngün ang tomüi.

³Israel chemningkya hex kue awan ngopu: she a ku thoto azwon ang müntho. She a mongong chitüitoxle ngole hüile, ilaxle she khünaknu a ku to shwom-tole chang ang münasu.”

⁴Khünaknue mokdaokya ochaxe hwom Zang hato chat ang chitomle kople thomle. Chapa shwomkyae shingmongle hwom to kople thomle, ilaxle hwome JOWANPA ang tüipule münthüi.

⁵Israel khünaknue hwom kax-kax ma chilaxlaxba le tüikya tutexe hwom zongto apüile akhong ngole. Hwom ochax hwom asu ang tamchu ati ang tomle, ilaxle Judah angkya khünakbu chuwüi hwom füi tomtomle atile.

⁶Hwome JOWANPA ang tö kox ang hwome chun hia maihubu apüile, ikoxlechu ijae hwom fün amüikyakha müntüi. Hwome chix chiataktsuak, chemthüikoxle chixe hwom dantox daokoxle.

⁷Hwome JOWANPA to mongong chithom; hwom su-sabu a chix kux münchang. Ikhoma athax a hwom tamchu hwom haxtok a chwonle amütdaoüi.

⁸Gibeah ma zankhong nyazong mütkox! Ramah ma khong tinglyetkox! Bethawen ma zankat sungdünle changkox: Benjamin khünakbu, zan to ka ang a!

⁹Sikngün kop angkya hanpak hüile ngole, ilaxle Israel a maxüi. Israel khünaknu, ija a changtomtaüi!

¹⁰JOWANPAe thüile: “Ku ang mongtsikle chemthüikoxle Judah angkya lompabue Israel tingtakle ilaxle she haxtok ahuxle laxle. Ikhoma tichen ningle kue hwom hato sikngün thokle ahüiüi.

¹¹Israel a mixfang to ngokya sikngün ma tüile; she süntswon wüi changkya haxtok she-e amütdaoa, chemthüikoxle hwom ang kox angkya chemchu chitüikya khünakbu to fong angkya hwom tsangmüt ang lax.

¹²Kue Israel nok hato omüt apüiüi ilaxle Judah hato thama apüiüi.

¹³“Chemtue ma tüle kakle maxkya Israel-e ngünle laxpuix ilaxle Judah-e ma ma mak-khakya ngünle laxpuix, ipongma Asiria nok chongwanghompa hato ofong-otsox lomle pao, ikoxle chixe hwom kaklakbu amüile chifa tamchu hwom makchakbu amüile chifa.

¹⁴Kue Israel hia Judah to mailangpa lailaile shingle hüiüi. Kujaoe hwom ashikle akhixlaxle dantoxüi. Chemtue kue hwome linle paoüihex, owaechu hwom khosünle kop ang chithoüi.

¹⁵“Hwom ochax khoma okhonguile hwome sikngün apongle machang tanto tamchu ku lomle mangui tanto kue ku khünaknu awütle thomüi. Hwom sikngün tokhange ngaxchu hwome ku lom ang cha.”