Read Wancho Naga Hosia 7 Bible Online

Hosia 7 - Wancho Naga bible

Hosia 7

¹“Chemtue kue tamchatle ku khünaknu Israel kak-lak amüikoxse tamchu ahak-aluale tüi ang tomse tsupuix, kue ngün ang kopkya a hwom chichangchizangle tüikya hia hwome mokkya ochax mwot boma chemchu müntüi. Hwome tata dyenle; hwome homdap-pungdong le ahuxle; hwome tingjang lomnu ma khünaknu angkya papalo le lax.

²Ibu ochax kue mong ma kople thom angkya le hwon khangka ma ojao chiale; ikoxle hwom ochaxe hwom to akanle kop, ilaxle ibu chingünle kue tsiaktox ang chitsuak.”

³JOWANPAe thüile: “Khünaknue hwom huxtsing-loptsang mwotlom tokhange wanghom hia chix nguakax wangkhobu dyenle chang.

⁴Hwom pangwüi khualopmix tamchu kax ma laxle chitüikya changle. Hwom miktsak a fongbak angkya wün lailaile huxsa ma azwonle ngo, oja to an zingpae an myettu manguiba lüixle chichangpuix.

⁵Wanghom fongkhale sax nyix hwome wanghompa hia chix nguakax wangkhobu ang ju alinglaxle tokle nga ang tom.

⁶Changle, hwome mix tha ama ang tungkya makhange hwom fongbak wün lailaile chua.

⁷“Hwom mongtsik jankham ma hwome hwom lompabu langle awüt. Hwom wanghombu a ta füima tale langle awüt, ikoxlechu opupuechu asunhüile ku to chijop.”

⁸JOWANPAe thüi: “Israel khünaknu a atelanle amyetkya an ningle. Hwome tomzi nokbu to ongle ngo

⁹ikoxle ija mixnok to mongongle ngokyae hwom janzüi asampu le texle chiatak. Hwom hanpak zanghan akiakle thomle, ikoxle hwome ija chitik.

¹⁰Hwom kaxkax ma wüi lax angkya le angamkya Israel nok mongngame hwom zongto apüile sop. Ipongpong le changle hüidaokoxle chu, JOWANPA hwom Zang, ku hato hwom chichat.

¹¹Ongat jua-osa ningle Israel khünak chazangle aham; pongwang ma hwom khünakbue Ijip nok fonghüile se, ifüima hwom Asiria nok hato zik!

¹²Ikoxle hwom ile aham ngopongma nya thalaxle osa amanpupule kue hwom amanüi. Hwome mokdaokya ochax khoma kue hwom to sikangünüi.

¹³“Hwom a maxdaoa! Hwome ku toxdaoa ilaxle ku zongto zan ang changdaoa. Hwom a amütüi. Kue hwom azünse le texhupu, ikoxlechu ku to hwome shwomkya thaile ngo.

¹⁴Hwome ku to mongkoxle chijop, itülüi hwome ma alüile tswonle adüt ilaxle songsaribu lailaile mangsop. Chemtue hwome saxziak hia grep ziak hanpakma zangjople changpuix, hwome songsaribu lailaile ma to alüile züt. Hwom ma adukya chem tüi?

¹⁵Ibu tux-tsomle atsunkya tamchu tsak-zong ang tomkya ku chang koxlechu, hwome ku zan to ka.

¹⁶Hwome tsak-zong chemchu chitüikya baozang hato paoüima ku hato tok ahokya chizak. Hwom a mongong thom ang chimüile chitangkya san ningle changle. Chemthüikoxle hwom lompabue mongngam füi zangwün, hwom a alün-aloxkya ma ziüi, ilaxle Ijip noke hwom cha nyiüi.”