Read Wancho Naga Joel 1 Bible Online

Joel 1 - Wancho Naga bible

Joel 1

¹Ija a Pethuel sasün Joel hato JOWANPA kaxho changle.

²Mongkoxle apahüi, hünzom püzu tüichongbu; Judah angkya noknusae apahüi. Otuechu iningkya tüchangdai ma hünzom tsün ma chichangba hünzom pupa hwom tsün to a?

³Ija bama hünzome naosombu hama wünkox; hwomechu hwom naosombu hama wünüi, ija ningle ibue chuwüi füisu-füisa hwom hama wünüi.

⁴Kuknu ozyem tok to ozyem saxziak ma pax; kuknu tuitae danle toxkya ifüi angkya kuknue sax.

⁵Zolax ilaxle soplax, hünzom jutok mixbu; soplax, hünzom julingle tok-ngakyabu; ju zün langsepa grep ziakbu a amadaoa.

⁶Zazwop kuknu süpahibue kem haxtok to single; hwom tüle tsak-zong füi tamchu e ang chithole tüile; hwom wabu a mailang wabu lailaile jao anaxle.

⁷Ibue kem grep zubu amadaoa ilaxle kem fupsa pünbu shaole akhixdaoa. Hwome pünkhwonbu thuakthuakthang le achangdaoa, okang-ozabu tsezale achangdaoa.

⁸Soplax, hünzom khünaknu, naocha tuitae ma tuipa mang sopupu le.

⁹Athax Zangshwom-Hom ma kox angkya saxziak chichangba grep ziak chemchu chitüi; JOWANPA ang tö kox angkya chemchu chitüikya khoma nguapabu mongma.

¹⁰Manzai haxtok kohwon ang changdaoa; saxziak komle thomjole chang koxle haxtok ang mongmale sop, grepbu pangwüi azandaoa, ilaxle olip pünbu a zile paoüna.

¹¹Mongmalax, hünzom manzai mixbu; soplax, hünzom opange grep zutong molaxpuix, chemthüikoxle wonglai tsax, tsaxsa tula, changle saxziak pangwüi amütdaoa.

¹²Grep zu hia fupsa pünbu komkaile zanle zidaoa; pünziak füikya pünbu pangwüi hüilaxle zidaoa. Khünaknu mongmüi a athodaoa.

¹³Nyikhwon awunlax ilaxle soplax, hünzom tö-tsap ma thothale ngokya nguapabu! Zangshwom-Hom to nguilax ilaxle zang angaile soplax! Hünzom Zang ang tö kox angkya saxziak hia grepti-ju chemchu müntüi.

¹⁴Chisax-chilingle atsao angkya kax koxlax; khünaknu sele asoxlax! Lompabu asox ang tomlax ilaxlechu Judah angkya khünaknu pangwüi JOWANPA hünzom Zang Zangshwom-Hom to nguilaxle chix hato sople ozing adün ang a!

¹⁵JOWANPA hanpak zanghan nguile, Khüthak Zang-e thama apüi angkya nyix a. Ija nyix thamakya huanu zadün changüi!

¹⁶Kem saxziak komkaile ama füima mongtex samle keme hungopu. Kem Zang Zangshwom-Hom ma mongmüi ojao müntüi.

¹⁷Saxli-tuali komkaile chaxwan zan to zile pao. Athünle thom angkya saxziak tuita chitüi, ikhoma ahuasakle ngokya pungbu büile hüi.

¹⁸Müibu khosam ashukle osüt lomle samle aham chemthüikoxle hwom hanpakma fumtsüt nui ojao chitüi; ija ningle chun zyembu chuwüi samle aham.

¹⁹JOWANPA, kue nang to nyakpu, chemthüikoxle fum-sui hia pünzua komle zandaoa, wün to shunpupu le zanle zidaoa.

²⁰Faomüibue ngaxchu wüi nang nyakle akhongle shuasabu komle zople zanünkoxle.