Read Wancho Naga Joel 2 Bible Online

Joel 2 - Wancho Naga bible

Joel 2

¹Nyazong mütkox; khünak mong asa ang Zang otsao haxnu, Zaion haxkho to. Abünlax, Judah angkya khünaknu! JOWANPA Hanpak-zanghan chwonle nguingole.

²Ija a zangnak tamchu kochidongkya nyix ang changüi, naktukle zangfwom atyenkya nyix a. Zazwop-kuknu süpahibu chongkya süsox-süsoxle soxle hüi haxnubu to alumle zangnaknu hüikya ningle. Ija ningle chemchu machangtox, ilaxle füichimachu ile münchangtoxüi.

³Pünbu zokle ashunkya wün ningle. Hwom tunthoma haxtok a Eden Tsawatkha ningle, ikoxle hwom tokfüi ma a haxkozan tata. Hwome pangwüi olithule ama.

⁴Mik-hu zongma hwom a manbu lailaile; ibu a zankat manbu zik ma zik.

⁵Hwom haxnukhobu to dongle changpongma, ibu zangzingchu man-kanlinbu azingkya lailaile azing; ibu a, wün to hingzang shunpongma azingkya ningle azing. Ibu a, zan to sing ang chongkya süpahi othom achwonpupu le zyenle pya.

⁶Ibu süsox-süsoxle soxkya zuma, pangnusa wüi abüt-aban; pangnusa ang wüi thünza huishole chang.

⁷Hwome naomüibu zansing ma sing; süpahibu ningle hwom katuk-khobu to nga. Hwom pangnusae wüi achutle chichatle küithole single pao ilaxle hwom nong-tsax to cheichakle chichang

⁸chichangba tata lom lyetle chichang. Zan noke ziakople thomdaokya ziamong ahakle ozyem male, ilaxle chemechu hwom awaxle azak ang chitho.

⁹Hwom tingnu chito zikle ngui; hwom katuk-kho to ngale le; hwom homkho-homkho to nga ilaxle ahuxmixbu lailaile thangmikbu tokhange hommong to nop.

¹⁰Hwom süsox-süsoxle soxpongma chaxwannu jao sile alox; zangdingkho sile abün. Lyetnu hia zanghan khisumle khi, ilaxle lyettsibue chu athaxpi chinyan.

¹¹JOWANPA zangtsak-zangdunge chix süpahibu ang kaxtom kox. Chix kax ma laxle tüikya zankat naomüibu huanuma tamchu tsak-zongle tüikya. JOWANPA Hanpak-zanghan a chemtukux zadünkya hex! Ija thoto owa paole azan thoüi?

¹²“Ikoxle athax ngaxchu”, le JOWANPAe thüile, “chisax-chilingle atsaokya zangjop füi sople tamchu mongmaxle künlop-monglüilax ilaxle ku hato chatlax.

¹³Nang mongtsik-mongma a nang mong ashixkya ma aholax; nang nyi-za akyetkya ija a chemchu münchang.” JOWANPA, hünzom Zang hato chatlax. Chix a chingcha hia jajae awangle tüikya Zang changle; chixe okuilole adule ilaxle chix tsaotsüt otia ma thomle; sik-chiangün homtoxle thaikya alak angkya hanpakma chix a jento achwon ngole.

¹⁴Owatsing, JOWANPA, hünzom Zang-e chix mong alüixlaxle saxziak-tuaziak okhonguile müi ang tomle hünzom to mohiman lechu changtsuak. Ifüima hünzome chix ang saxziak tö hia grep-ti tö fa ang tsuaküi.

¹⁵Zaion Haxnu ma nyazong mütkox; chisax-chilingle zangjop angkya kaxtom koxle khünaknu tusüi ang tomkox!

¹⁶Khünaknu pangwüi ngui ang tomkox; hwom huxsa nguazua hanpakma achwon ang tomkox; Azupi hia azupa hwomchu apüikox; naosom hwomchu asox ang tomkox naolaksabu ngaxchu taxtox. Chwonchwonle kako tankya tuinu-tuipa hwom chuwüi ma homhax toxlaxle ngui angkya changpu.

¹⁷Tötsap hia Zangshwom-Hom nyi bama JOWANPA thothale ngokya nguapabue, “JOWANPA, nang khünaknu to chingchahüi. ‘Hünzom Zang oja?’ le adix-adakya kax füi mixnokbue kwom thajao ang taxtom” le hwome sople zangjop angkya wüi changpu.

¹⁸Ifüima JOWANPAe chix haxtok hato chingcha aho; chixe chix khünaknu to chingcha.

¹⁹Chixe hwom zangjop to lan: “Athax kue hünzom ang saxziak hia grep-ti tamchu olip münga koxüi, ilaxle hünzom a wokfwot-tilan müile ngoüi. Athax mixnoke hünzom to chemtuechu thajao-wünhaile münchangüi.

²⁰Shuakuxchi tokhange nguikya zazwop-kuknu süpahibu kue apaoüi ilaxle züizüi sak-hax chito jwonle apaoüi. Hwom khama tunpa thom a Omang Tinu khato jwonle apaoüi, hwom füikomle tüikya thom a Mediterenian to jwonle apaoüi. Hwom zikya omangbu tüle nom-sya le changüi. Hwome hünzom to chempangle mokdaopuix ibu khoma kue hwom max ang tomüi.

²¹JOWANPAe hünzom hanpakma mokkya pangnusa khoma Haxtokbu, hünzom taxza, ikoxle pwonla dongle mongmüikox

²²Faomüi-janyaxbu, hünzom taxza. Hünzom fumtsütnui to fum hingshüi tüile; pünzuabue ma-pün ziakziak ziakle, ilaxle fupsa hia grep okhonguile tüile.

²³“Mongmüilax, Zaion angkya khünaknu, hünzom hanpakma JOWANPA, hünzom Zang-e chempang mokdaopuix ibama mongmüikox. Chixe hünzom ang watun zangwat okhonguile koxdaoa; chixe zangwa ma zangwat hünzom hato thokle ajodaoa ilaxle tsosa zangwat chuwüi amipongkya ningle koxdaoa.

²⁴Athaxpi tap a saxziake awangle changüi; Grep hia olip fyetnui a grep-ti hia olip müngae awangle tüiüi.

²⁵Zazwop kuknue hünzom saxziak komkaile sax pongma hünzome chem amütdaopuix ija kue hünzom ang achatle koxüi. Ija süpahibu hünzom zan to akatkya a ku changkya changpu.

²⁶Athax a hünzom huanuma tüinangle ngoüi, ilaxle okhonguile changüi. Hünzome JOWANPA hünzom Zang achuak-achenle changüi. Chix a hünzom hanpakma ohünotün mwot mokle fakya Zang changpu. Ku khünakbu tamchatle thajao-wünhai ang müntom.

²⁷Ifüima, Israel, hünzome ku hünzom khama tüikya awanle laxüi; ku a JOWANPA hünzom Zang changpu, ku boma Zang mama tam-müntüi, le hünzome tsingle laxüi. Ku khünakbu chatle thajao wünhaile chang ang müntom.

²⁸“Ifüima kue ku Chasa pangnusa ang thokle koxüi; hünzom sasün hia sacha hwome ku kaxho apuküi; hünzom zunu-zupabue wünmangbu ngünüi, ilaxle hünzom tsünzünbue mikza wünmangbu ngünüi.

²⁹Ipongma kue ku Chasa, dabu, sheko hia lüka pangnusa ang wüi thokle koxüi.

³⁰“Ija nyix bama kue kaxkhün koxle changüi, zangdingkho hia chaxwan tok ma; aji ajenkya, wün, tamchu wünkhut zangfwombu tüiüi.

³¹Zanghan a nakle paoüi, ilaxle lyetnu a aji lailaile khile paoüi, ija za-adünkya JOWANPA Nyix nguiüi thoma a.

³²IKoxle opange JOWANPA ang asunhüile thüiüihex, hwom khosünkya tüiüi. ‘Züizüi Jerusalem to paole azangüi; kue zünle kopdaokyabu azangüi’ le JOWANPAe akax daokya ningle.”